anurẓm 21 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

ءيگنّا لّجديد ءولا اكال لّجديد

¹ ژرغ ءيلمّا ءيگنّا لّجديد د‑واكال لّجديد. ءور‑سول‑قامان ءيگنوان ءيقديمن ءولا ءيكالّن ءيقديمن، لاح ءولا امدا.

² ژرغ تامدينت تامژلايت، ا‑ستّ‑يگان د‑وروشاليم لّجديد، تگّوز‑د زغ‑يگنّا زغ‑دار ربّي. تفولكي باهرا زوند يات‑تسليت ءيلسان تيملسيت ن‑تمغرا، توجاد ا‑تمناگّار اسلي‑نس.

³ سفلدغ ءي‑يان‑واوال ءيتجهّدن ءيساول‑د زغ‑دار لعرش ييني: «هاتي غ‑گر بنادم ا‑غ‑را‑تيلي‑تزدغت ن‑ربّي، ءيزدغ غيلاد غ‑وامّاس‑نسن، گن ايت‑دارس. ربّي راد‑ديدسن‑ييلي، ءيگ ربّي‑نسن.

⁴ را‑يسفيض كولّو ءيمطّاون‑نسن. ءور‑سول‑را‑تيلي لموت ءولا تاگوضي ءولا تيغويّا ءولا اطّان، اشكو دّونيت تاقديمت ءور‑سول‑تقاما.»

⁵ ءيساول‑د غوالّي ءيسكيوسن ف‑لعرش ييني: «سكرغ كولّو غيلاد زغ‑لجديد.» ييني‑يّي‑داغ: «ارا ماياد. اشكو أُغژانّ ءيواليون‑اد، لحقّ اد‑گان.»

⁶ ءيزايد ييني‑يّي: «هاتي ءيكمّل. نكّي گيغ امزوارو گغ امگُّارو. گغ ءيسيزوار گغ ءيسيگُّرا. وانّا ياغ ءيريفي، را‑ت‑سّوغ زغ‑تالعينت ن‑وامان ن‑تودرت بلا گيس ءيفكا يات.

⁷ ءيمّا وانّا ءينران، راد‑اس‑فكغ لوورت‑اد: راد‑گغ ربّي‑نس، ءيگ نتّا ءيوي.

⁸ ءيمّا غويلّي روولنين زغ‑لحقّ وورّين زغ‑وغاراس‑ينو سّركان ءيخفاون‑نسن ار‑نقّان ار‑تفسادن ار‑سكارن سّيحر ار‑تعبادن ءيلاهات ن‑دّونيت، راد‑فتون نتني د‑كولّو ايت‑تكركاس س‑ودغار‑نسن غ‑تمدا لّي‑يجدّرن س‑لعافيت د‑لكبريت. غمكاد ا‑را‑تگ لموت تيس سنات.»

ءوروشاليم لّجديد

⁹ ياشك‑يد ءيلمّا يان زغ‑سّا لّمالايكا لّي‑وسينين سّا ن‑تاطّاسين لّي‑عمّرنين س‑سّا ن‑تگوضيوين گُّرانين. ءيساول‑د سري ييني‑يّي: «اشك‑يد ملغ‑اك تاسليت لّي‑يگان تامغارت ن‑ولقّاغ.»

¹⁰ ياوي‑يّي س‑تحكيمت ن‑رّوح ار ءيگّي ن‑يان‑ودرار ءيمقّورن ياتّوين، ءيمل‑يّي‑د تامدينت تامژلايت ن‑‹وروشاليم› تگّوز‑د زغ‑يگنّا زغ‑دار ربّي.

¹¹ ار‑تسّمرقيقيي س‑لمجد ن‑ربّي زوند يات‑تژروت تاقرفيت ءيُغلان باهرا، ءولا زوند ادفل ءيصفان.

¹² ءيلولّي‑اس يان‑وغُراب ءيمقّورن ياتّوين، ءيلا سين د‑مراو ن‑يمي. بيدّن غين سين د‑مراو لّمالاك غ‑لگدّام ن‑يماون. كرايگاتّ ءيمي ءيتيارا گيس ءيسم ن‑تقبيلت زغ‑سنات د‑مراوت ن‑تقبيلت ن‑ايت‑ربّي.

¹³ لّان كراض ءيماون غ‑تسگا لّي‑زغ‑ا‑تاقلاي تافوكت، ءيلين كراض ءيماون غ‑تسگا تاژلماطّ، ءيلين كراض ءيماون غ‑تسگا تافاسيت، ءيلين كراض ءيماون غ‑تسگا لّي‑غ‑ا‑ن‑تطّار تافوكت.

¹⁴ لّان سين د‑مراو ن‑وژرو غ‑لّساس ن‑وغُراب ن‑تمدينت، تياران گيسن ءيسماون ن‑سين د‑مراو ن‑ورقّاس ن‑ولقّاغ.

¹⁵ لمالاك لّي‑د‑سري‑يساولن، ءيلّا دارس يان‑وعمود ن‑وورغ ما‑س‑ا‑يسّغال، ييري ا‑سرس‑يسّغل تامدينت د‑يماون‑نس د‑وغُراب‑نس.

¹⁶ تنگادّا‑تغزي ن‑تمدينت زغ‑كّوژط‑تسگيو. ءيدّو لمالاك ءيسّغل تامدينت س‑وعمود‑نس. سين ءيد‑والف د‑سين ءيد‑ميّا (2200) ن‑كيليميتر ا‑يلّان غ‑كرايگاتّ تاسگا ءولا غ‑تيدّي‑نس.

¹⁷ ءيسّغل ءولا اغُراب لّي‑اس‑يسوتلن. سّا ن‑يد‑مراو د‑سين (72) ميترو ا‑غ‑ن‑تلّا تيدّي‑نس س‑مكلّي‑س‑ا‑سّغالن مدّن.

¹⁸ ءيتياوبنا‑وغُراب‑نس س‑يژران ءيقرفين غُلانين. تّياوسكار‑تمدينت زغ‑وورغ باهرا ءيصفان، تفاو زوند جّاج.

¹⁹ ءيتياوسكار لّساس ن‑وغُراب ن‑تمدينت زغ‑كيگان د‑يژران غُلانين. امزوارو ءيگا اقرفي، ويس سين ءيگا اژرقي، ويس كراض ءيگا اقهاوي، ويس كّوژ ءيگا ازگزاو،

²⁰ ويس سمّوس ءيگا ابرار، ويس سضيص ءيگا اژگُّاغ، ويس سّا ءيگا اشيبي، ويس تام ءيگا ءومليل، ويس تژا ءيگا اوراغ، ويس مراو ءيگا اخرشوفي، ويس يان د‑مراو ءيگا امشماشي، ويس سين د‑مراو ءيگا ءيضيلي.

²¹ ءيمّا ءيماون‑ان س‑سين د‑مراو گان سين د‑مراو لّجوهر، كرايگاتّ ءيمي ءيگا تالجوهرت. ءيمّا اسوك ن‑تمدينت ءيگا وين‑وورغ ءيصفان، ءيفاو زوند جّاج.

²² ءور‑ژريغ كرا ن‑تگمّي غ‑ا‑تعبادن مدّن غ‑تمدينت، اشكو ار‑گيس‑تعبادن سيدي ربّي لّي‑يحكامن كولّو ما‑يلّان، نتّان د‑ولقّاغ، غ‑يلّيغ لّان نتني.

²³ ءور‑تحتاجّا‑تمدينت اد‑اس‑تّيسفيو تافوكت ءولا ايّور، اشكو لمجد ن‑ربّي ءيگا تيفاوت‑نس، ءيگ‑ولقّاغ لقنديل‑نس.

²⁴ س‑تيفاوت ن‑تمدينت ا‑س‑را‑تّيدون ايت‑تميزار كولّوتن، راد‑اس‑د‑اوين ءيگلدان ن‑دّونيت تيرزّيفين لّمجد‑نسن.

²⁵ ءور‑سار‑قّينّ ءيماون ن‑تمدينت غ‑وزال، ءولا سار ءيلّا ءيض.

²⁶ تيرزّيفين ءولا تيميخار ا‑راد‑اس‑د‑اوين زغ‑كولّو تيميزار ن‑دّونيت.

²⁷ والاينّي ءور‑را‑سرس‑يكشم ما‑يجلخن ءولا ما‑يسّركاون ءولا ما‑يسّكيركيسن. ءور‑را‑سرس‑يكشم ابلا غويلّي مي تياران ءيسماون‑نسن غ‑وارّا ن‑تودرت ن‑ولقّاغ.