anurẓm 20 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

الف ن‑وسگُّاس

¹ ژرغ ءيلمّا يا‑لّمالاك ءيگّوز‑د زغ‑يگنّا، يوسي تاساروت ن‑تدروت ن‑واكال، تيلي غ‑وفوس‑نس يات‑سّنسلت ءيمقّورن.

² يامژ الگمّاض لّي‑مي‑تّينين ‹ابنكال اقديم› ءولا ‹ءيبليس› ءولا ‹شيطان›، ءيكرس‑ت باش ا‑يقاما غ‑يسكراف الف ن‑وسگُّاس.

³ ءيلوح‑ت‑ين غ‑تدروت ن‑واكال، ءيقّن‑ن فلّاس ءيمي ن‑تدروت، ءيسكر‑اس طّابع باش ا‑ور‑سول‑يجلّو تيميزار ن‑دّونيت ارد ءيزري‑والف ن‑وسگُّاس. تيگيرا ن‑مايان را‑د‑يقّان ا‑ينورژم زغ‑يسكراف يات لوقت ءيدروسن.

⁴ ژرغ ءيلمّا كرا لّعروش غ‑يگنّا. ءيتياوفكا ءي‑ويلّي فلّاسن سكيوسنين لحقّ اد‑تحكامن. ژرغ لارواح ن‑ويلّي مي ءيتياوبّاي ءيخف‑نسن ف‑سّيبت ن‑توگّا‑نسن ف‑ياسوع ءولا ف‑واوال ن‑ربّي. ءور‑ا‑تعبادن اغُژن ءولا صّورت‑نس، ءولا قبلن طّابع‑نس ف‑يگنزي‑نسن ءولا ف‑وفوس‑نسن. نكرن نتني زغ‑لموت ار‑تحكامن د‑لماسيح الف ن‑وسگُّاس.

⁵ غمكاد ا‑تگا‑تنكرا تامزواروت. ءيمّا وييّاض سول قامان غ‑لموت، ءور‑راد‑نكرن ارد ءيزري‑والف ن‑وسگُّاس.

⁶ ءيمباركين د‑يمژلاين اد‑گان غويلّي‑د‑نكرنين غ‑تنكرا تامزواروت. ءور‑را‑تيژضار لموت تيس سنات ا‑تن‑تلكم. راد‑گن ءينمغورن ن‑ربّي د‑لماسيح، را‑ديدس‑حكامن الف ن‑وسگُّاس.

لهالاك ن‑يبليس

⁷ غاكود نّا‑يكمّل‑والف ن‑وسگُّاس را‑يتياوفساي شيطان زغ‑يسكراف‑نس،

⁸ ءيفّوغ‑د ا‑يجلو كولّو تيميزار ن‑دّونيت، ءيسّمون ءيمزدغن‑نسنت ءي‑يميغ. نتني ‹گوگ› ءولا ‹ماگوگ› اد‑گان، ءيگاتن زوند املال ن‑تاما ن‑ومدا،

⁹ ار‑زّيگّيزن ارد كن دّونيت كولّوتّ، سوتلن ءي‑ونتال ن‑يمژلاين ن‑ربّي ا‑ت‑يگان د‑تمدينت لّي‑دارس‑يعزّان. ءيميل تضر‑د فلّاسن لعافيت زغ‑يگنّا تهلك‑تن.

¹⁰ ءيتّلوح‑ن ءيبليس لّي‑تن‑يجلان غ‑تمدا لّعافيت د‑لكبريت لّي‑غ‑يلّا‑واغُژن د‑نّابي بو‑تكركاس. راد‑كولّو‑غين‑ترفوفونّ غ‑ييض ءولا ازال س‑ورفوفن ءور‑سار‑يتمّين.

ارّاتن لّحوكم ءولا لموت تيس سنات

¹¹ ژرغ ءيلمّا يا‑لّعرش ءيمقّورن ءيملّولن، ژرغ ءولا غوالّي فلّاس ءيسكيوسن. لّيغ‑د‑يبان نتّا، روولن زغ‑گيس ءيگنوان د‑واكال، لاح‑تن كولّو.

¹² س‑ژريغ غويلّي مّوتنين، ما‑يمقّورن ءولا ما‑يمژّين، بيدّن كولّو غ‑لگدّام لّعرش. تياورژامن كرا ن‑وارّاتن غاكودان، س‑يتياورژام يان‑وارّا ياضني ءيگان ارّا ن‑تودرت. يوت ربّي لحوكم غاكودان ف‑ويلّي مّوتنين، ءيرار‑اسن ف‑غايلّي سكرن غمكلّي ءيتياران غ‑وارّاتن.

¹³ ءيدحي‑د‑ومدا كولّو ويلّي گيس مّوتنين، تدحي‑د لموت د‑ودغار لّموت كولّو ويلّي گيس لّانين، ءيحكام ربّي فلّاسن كولّوتن ف‑غايلّي سكرن.

¹⁴ تتّلوح‑ن ءيلمّا لموت د‑ودغار لّموت غ‑تمدا لّعافيت. لموت تيس سنات ا‑تگا‑تمدا لّعافيت.

¹⁵ وانّا مي ءور‑يتيارا ءيسم‑نس غ‑وارّا ن‑تودرت، ءيتّلوح‑ن غ‑تمدا لّعافيت.