anurẓm 2 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تابرات ءي‑ومناگّار غ‑افسوس

¹ «ارا اوال‑اد ءي‑لمالاك ن‑ومناگّار غ‑تمدينت ن‑افسوس: ها‑ما‑ينّا واد يوسين سّا ن‑يتران غ‑وفوس‑نس افاسي ار‑يتّيدو غ‑گر سّا لّحساكي ن‑وورغ.

² سّنغ كولّو ما‑تسكارت ءولا مامنك ا‑تّنهاتافت تصبرت. سّنغ مامنك ا‑تنگارات د‑مدّن أُخشنّين، تارمت ءولا غويلّي ءيتّينين ءيزد ءيرقّاسن اد‑گان، تافت‑تن‑ين ءيس‑ا‑سّكيركيسن ءور‑گين ءيرقّاسن.

³ سّنغ ءيس‑تزگات تصبرت ءي‑تنوكموت ف‑سّيبت ن‑يسم‑ينو بلا‑دا‑تّرمايت.

⁴ «والاينّي ءيلّا سول داري كرا فلّاك: ءور‑سول‑ا‑يّي‑تّيريت غونشك لّي‑س‑ا‑يّي‑تّيريت غ‑يسيزوار.

⁵ سوانگم‑د مانيزغ‑ن‑تضرت. وورّي‑د زغ‑دّنوب‑نّك ار‑تسكارت غمكلّي تسكارت غ‑يسيزوار. ءيغ‑ور‑دي‑توورّيت زغ‑دّنوب‑نّك، را‑ن‑سرك‑اشكغ سّيتّيغ‑اك لحسكا‑نّك زغ‑ودغار‑نس.

⁶ والاينّي سول گيك ءيقاما ما‑يفولكين، اشكو ار‑تّكرهوت ءيسكّيرن ن‑مدّن‑ان ن‑نيكولاوين غمكلّي‑تن‑تكرهوغ نكّي.

⁷ وانّا دار ءيمزگان، ءيقّان‑ت‑يد ا‑يسفلد ءي‑مايد ءيتّيني رّوح لقودوس ءي‑يمناگّارن. كولّو وانّا ءينران، راد‑اس‑فكغ ا‑يشّ زغ‑لغلّت ن‑وسغار ن‑تودرت لّي‑يلّان غ‑تالعرصت لّمجد ن‑ربّي.

تابرات ءي‑ومناگّار غ‑سميرنا

⁸ «ارا اوال‑اد ءي‑لمالاك ن‑ومناگّار غ‑تمدينت ن‑سميرنا: ها‑ما‑ينّا غوالّي ءيگان امزوارو ءيگ امگُّارو، ءيمّت يوورّي ءيدّر.

⁹ سّنغ مامنك ا‑تزريت غ‑تاسّاست ار‑تّژلاطّ، والاينّي س‑صّاحت لخير ءيگّوتن اد‑اك‑يلّان. سّنغ ءيس‑ا‑گيك‑رگّمن غويلّي ءيتّينين ءيس‑گان ايت‑يودايا والاينّي ءور‑گين ايت‑يودايا. هاتي ايت‑تگمّي ن‑تژالّيت ن‑شيطان اد‑گان.

¹⁰ ءيمّا غيلاد، اد‑ور‑تيكساطّ تانوكموت لّي‑را‑فلّاك‑يزري. هاتي را‑ك‑يارم ءيبليس ءيلوح‑ن كرا گيگون غ‑لحبس. را‑ترفوفنت مراو‑ووسّان. زگا غ‑وغاراس‑ينو ار لموت، فكغ‑اك تّاج ن‑تودرت.

¹¹ وانّا دار ءيمزگان، ءيقّان‑ت‑يد ا‑يسفلد ءي‑مايد ءيتّيني رّوح لقودوس ءي‑يمناگّارن. كولّو وانّا ءينران، ءور‑اكُّ‑را‑تي‑تلكم لموت تيس سنات.

تابرات ءي‑ومناگّار غ‑بارگاموس

¹² «ارا اوال‑اد ءي‑لمالاك ن‑ومناگّار غ‑تمدينت ن‑بارگاموس: ها‑ما‑ينّا غوالّي دار تاژّيت ءيمسادن زغ‑سنات‑تسگيو.

¹³ سّنغ مانيغ تزدغت ءيزد ءيلّيغ ءيلّا لعرش ن‑شيطان. تغويت‑بدّا غ‑يسم‑ينو، ءور‑اكُّ‑توورّيت زغ‑وغاراس‑ينو. تامژت گيگي ءولا غ‑ووسّان لّي‑غ‑نغان ءينيگي‑نو ءيزگان انتيباس غين غ‑يزدغ شيطان.

¹⁴ «والاينّي لّانت سول داري كرا ن‑تغاوسيوين فلّاك. لّان غ‑گراتون كرا ن‑مدّن ءومژن المّود ن‑بالعام لّي‑يملان ءي‑وگلّيد بالاق مامنك ا‑يجلّو ايت‑ربّي، ايلّيغ ا‑شتّان ما‑يتياوغراسن ءي‑لاصنام ار‑تفسادن.

¹⁵ ءيلين‑داغ غ‑گراتون كرا ن‑مدّن ءومژن المّود ن‑نيكولاوين.

¹⁶ ف‑مايان ا‑ف‑راد‑اك‑ينيغ: وورّي‑د زغ‑دّنوب‑نّك. ءيغ‑ور‑دي‑توورّيت را‑ن‑سرك‑اشكغ غ‑مايد‑د‑ياكمورن، مّاغّ د‑مدّن‑ان س‑تاژّيت ن‑يمي‑نو.

¹⁷ وانّا دار ءيمزگان، ءيقّان‑ت‑يد ا‑يسفلد ءي‑مايد ءيتّيني رّوح لقودوس ءي‑يمناگّارن. كولّو وانّا ءينران، راد‑اس‑فكغ زغ‑وغروم ءينتلن لّي‑مي‑تّينين ‹مانّا›. فكغ‑اس ءولا يان‑وژرو ءومليل، ءيتيارا گيس يان‑يسم لّجديد ءور‑ت‑يسّين يان ابلا غوالّي مي ءيتياوفكا.

تابرات ءي‑ومناگّار غ‑تياتيرا

¹⁸ «ارا اوال‑اد ءي‑لمالاك ن‑ومناگّار غ‑تمدينت ن‑تياتيرا: ها‑ما‑ينّا يوس ن‑ربّي لّي‑مي‑سّوفونت‑والّن زوند ءيسوفا لّعافيت، ار‑سّمرقيقيين ءيضارن‑نس زوند اناس ءيتياومزاين س‑سّقل.

¹⁹ سّنغ كولّو ما‑تسكارت ءولا مامنك ا‑يّي‑تّيريت، تزگات غ‑وغاراس‑ينو ار‑تسكارت تاووري‑نو باهرا، ار‑تّصبارت غ‑تنوكموت نّا‑فلّاك‑يزرين. سّنغ ءيس‑ا‑تسكارت غيلاد ءوگُّار ن‑مايلّي تسكارت غ‑يسيزوار.

²⁰ «والاينّي ءيلّا سول داري كرا فلّاك. ءور‑ا‑تسّفسّات تامغارت‑ان ‹ءيزابيل› لّي‑يتّينين ءيس‑ا‑تساوال س‑يواليون ن‑ربّي. نتّات ار‑باهرا‑تجلّو ءيخدّامن‑ينو س‑ولمّود‑نس ار‑تن‑تّرارا اد‑فسادن ار‑شتّان ما‑يتياوغراسن ءي‑لاصنام.

²¹ فكيغ‑اس امهال ا‑تفل دّنوب‑نس، والاينّي ءور‑تري ا‑دي‑توورّي زغ‑لفساد لّي‑تسكار.

²² هان را‑ستّ‑ين‑لوحغ ف‑تيسي ن‑واطّان ا‑گيس‑تاضن نتّات د‑ويلّي ديدس تفسادنين. غمكاد ا‑راد‑اسن‑سكرغ ءيغ‑ور‑د‑وورّين زغ‑يسكّيرن‑نس.

²³ راد‑وتغ تاروا‑نس س‑لموت. غاكودان ا‑راد‑ژرن ايت‑يمناگّارن كولّوتن ءيس‑گيغ واد ءيسّنّ كولّو ماد‑سوينگيمن مدّن ءولا ما‑تّيرين غ‑وول‑نسن. راد‑رارغ ءي‑كرايگاتّ يان گيگون ف‑ما‑يسكر.

²⁴ «ءيمّا وييّاض غ‑تياتيرا لّي‑ور‑ومژنين المّود‑ان ءولا لمدن ما‑مي‑تّينين ‹تيغاوسيوين نتلنين ن‑شيطان›، ءور‑را‑ن‑فلّاون‑زايدغ كرا ن‑تاژايت ياضني.

²⁵ غير امژات غ‑ما‑دارون‑يلّان ارد‑ن‑اشكغ.

^26-27 كولّو وانّا ءينران ار‑يسكار ماد‑ريغ ار ءيسيگُّرا، راد‑اس‑فكغ تاژضّارت ف‑تميزار ن‑دّونيت غمكلّي‑يّي‑يفكا بابا ربّي. را‑تنت‑يحكام س‑وعمود ن‑ووزّال، ءيرژ‑تنت زوند ءيروكوتن ن‑يدقّي.

²⁸ راد‑اس‑فكغ ءيتري لّي‑يفاون زيكّ صباح.

²⁹ وانّا دار ءيمزگان، ءيقّان‑ت‑يد ا‑يسفلد ءي‑مايد ءيتّيني رّوح لقودوس ءي‑يمناگّارن.