anurẓm 19 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تامغرا ن‑ولقّاغ

¹ لّيغ ءيزري مايان سفلدغ ءي‑كرا ءيتجهّدن ءيرواس‑يّي تاقّورت ن‑مدّن گّوتنين غ‑يگنّا، ءولّن اوال‑نسن ار‑تّينين: «هالّيلويا، ربّي‑نّغ ا‑يجّنجامن، ءيگ باب لّمجد د‑لقوّا.

² يُغژان لحوكم‑نس، س‑لحقّ ا‑س‑ا‑يتحكام. يوت لعقوبيت ف‑تمگّانت ءيمقّورن لّي‑يسّركان كولّو دّونيت س‑لفساد‑نس. ءيرار‑اس ربّي ف‑يدامّن ن‑يخدّامن‑نس.»

³ الّن‑داغ اوال‑نسن ار‑تّينين: «هالّيلويا، ار‑بدّا‑ياقلاي‑واگّو‑نس، ءور‑سار‑يتمّي.»

⁴ ضرن‑ين ءيلمّا سين ءيد‑مراو د‑كّوژ (24) ن‑ومغار د‑كّوژط لمخلوقات غ‑لگدّام ن‑ربّي لّي‑يسكيوسن ف‑لعرش، سجدن‑اس ار‑تّينين: «امين، هالّيلويا.»

⁵ ءيساول‑د ءيلمّا يان‑واوال زغ‑دار لعرش ييني: «الغات ربّي‑نّغ ا‑يخدّامن‑نس كولّوكن لّي‑ت‑وقّرنين، غويلّي مقّورنين ءولا غويلّي مژّينين.»

⁶ سفلدغ ءيلمّا ءي‑كرا ءيرواس‑يّي ءيواليون ن‑مدّن گّوتنين باهرا، زوند ءيجّيجن ن‑يسافّن ن‑وامان گّوتنين ءولا زوند اقّريان ن‑يگّيگ ءيتجهّدن، ار‑تّينين: «هالّيلويا. ربّي سيديتنّغ ءيتجهّدن، نتّان ا‑يحكامن كولّو ما‑يلّان.

⁷ ا‑نفرح غيلاد، نالّ اوال‑نّغ س‑لفرح، نيني منشك ا‑باهرا‑يگّوت لمجد‑نس. اشكو تروح‑د‑تمغرا ن‑ولقّاغ. ها‑تاسليت‑نس تجّوجاد ءيخف‑نس،

⁸ ءيفك‑اس ربّي تيملسيت لّكتّان ءيشوان ءيغوسن ءيسّمرقيقيين.» لمعنا لّكتّان تگا «ءيفولكيتن لّي‑سكرن ءيمژلاين ن‑ربّي.»

⁹ ييني‑يّي ءيلمّا لمالاك: «ارا اوال‑اد، ‹ءيمباركين اد‑گان غويلّي مي ءيغرا ربّي اد‑د‑اشكين س‑يمنسي ن‑تمغرا ن‑ولقّاغ.› » ءيزايد ييني‑يّي: «غويد گان ءيواليون ن‑ربّي. لحقّ اد‑گان.»

¹⁰ ءيمّا نكّي ضرغ‑ن غ‑دار ءيضارن‑نس ءيريغ اد‑اس‑سجدغ، س‑يّي‑ينّا: «ا‑ور‑تسكرت غمكان. اشكو اخدّام كاد‑گيغ، زوند كيّي د‑ايتماك لّي‑ومژنين غ‑توگّا ن‑ياسوع. ربّي واحدوت ا‑تّعبادت.» اشكو توگّا ن‑ياسوع ا‑يدحاين غويلّي ساوالنين س‑ماد‑اسن‑يمالا ربّي.

امنّاي ف‑وايّيس ءومليل

¹¹ ژرغ ءيلمّا ءيگنّا رژمن، س‑يّي‑د‑يبان يان‑وايّيس ءومليل. امنّاي‑نس، ار‑اس‑تّينين ‹لحقّ› ءولا ‹غوالّي ءيزگان غ‑واوال‑نس›. س‑لحقّ ا‑س‑ا‑يكّات لحوكم ار‑سرس‑يتمّاغ.

¹² ار‑د‑سّوفونت‑والّن‑نس زوند ءيسوفا لّعافيت، ءيلين ف‑يخف‑نس تّيجان گّوتنين. ءيتيارا فلّاس يان‑يسم لّي‑ور‑يسّين يان ابلا نتّان.

¹³ ءيمّغ‑وقشّاب‑نس س‑يدامّن، ءيگ ءيسم‑نس ‹اوال ن‑ربّي›.

¹⁴ ضفورن‑ت لجيوش ن‑يگنّا، لسن لكتّان ءيشوان ءيغوسن ءيملّولن، نين ف‑ييسّان ءومليلن.

¹⁵ ءيفّوغ‑د زغ‑يمي‑نس زوند يات تاژّيت ءيمسادن. را‑سرس‑يوت تيميزار ن‑دّونيت. را‑تنت‑يحكام س‑وعمود ن‑ووزّال، ياضّر اضيل غ‑لمعصّرت ن‑سّخط لّغاضاب ن‑ربّي لّي‑يحكامن كولّو ما‑يلّان.

¹⁶ ءيتيارا يان ءيسم غ‑وقشّاب‑نس ف‑وفلّا ن‑ومصاض‑نس، ءيگا ‹اگلّيد ن‑يگلدان د‑ونمغور ن‑ينمغورن›.

¹⁷ ژرغ ءيلمّا يا‑لّمالاك ءيبيدّ ف‑تافوكت، يالّ اوال‑نس ءيغر س‑يگضاض كولّوتن لّي‑تايّلالنين غ‑يگنوان ييني‑اسن: «اشكاد‑د تمونم ف‑يمنسي ءيمقّورن لّي‑اون‑يجّوجاد ربّي،

¹⁸ ا‑تشتّام تيفيّي ن‑يگلدان د‑يعسكرين د‑ينمغورن لّعسكر، د‑ييسّان ءولا ءيمنّاين‑نسن، ار‑تشتّام تيفيّي ن‑كولّو مدّن، ءيسمگان ءولا غويلّي گانين وين ءيخف‑نسن، ما‑يمژّين ءولا ما‑يمقّورن.»

¹⁹ ژرغ ءيلمّا اغُژن، نتّان د‑يگلدان ن‑دّونيت د‑لجيوش‑نسن. مونّ‑د كولّوتن اد‑مّاغن د‑والّي ءينين ف‑وايّيس د‑لجيش‑نس.

²⁰ ءيمّا نتّا يومژ اغُژن، يامژ ءولا نّابي بو‑تكركاس لّي‑يسكرن لمعجيزات س‑يسم ن‑واغُژن ءيجلو سرسنت غويلّي دار طّابع ن‑واغُژن د‑ويلّي تعبادنين صّورت‑نس. غاكودان سول دّرن ا‑تن‑ين‑يلوح س‑سين غ‑تمدا لّعافيت لّي‑يجدّرن س‑لكبريت.

²¹ ءيزايد ءيلمّا غوالّي ءينين ف‑وايّيس ءينغ ما‑يقامان زغ‑لجيوش‑نسن س‑تاژّيت لّي‑د‑يفّوغن زغ‑يمي‑نس. مونّ‑د فلّاسن ءيگضاض كولّوتن ار‑شتّان تيفيّي‑نسن ايلّيغ شبعان.