anurẓm 18 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

لهالاك ن‑تمدينت ن‑بابيل

¹ لّيغ ءيزري مايان ژرغ يا‑لّمالاك ياضني ءيتجهّد باهرا، ءيگّوز‑د زغ‑يگنّا، ءيسفاو كولّو دّونيت س‑نّور لّي‑گيس‑يلّان.

² يالّ اوال‑نس ييني: «تّهلك، تّهلك بابيل ءيمقّورن. ءور‑تگي غيلاد ابلا تازدغت لّجنون، تعمّر س‑كولّو كرا ءيگان رّوح يُخشنّ ءولا كولّو كرا ءيگان اگضيض ءور‑يحلّان لّي‑يسّمسار بنادم.

³ اشكو تسّوا كولّو تيميزار ن‑دّونيت س‑تيسّي ءيكتين لّفساد‑نس، فسادن ديدس ءيگلدان ن‑دّونيت. تسّربح ءيسبّابن ن‑دّونيت زغ‑توگّت ن‑شّهوات‑نس.»

⁴ سفلدغ ءيلمّا ءي‑واوال ياضني زغ‑يگنّا ءينّا: «وا‑مدّن‑ينو، فّوغاد‑د زغ‑دارس، ا‑ور‑ديدس‑تمونم غ‑دّنوب‑نس باش ا‑ور‑ديدس‑تكشمّ غ‑تگوضيوين‑نس.

⁵ هان دّنوب‑نس گودين ار ءيگنّا. ءور‑يتّو ربّي‑نّون كولّو ما‑تسكر يُخشن.

⁶ ءيمّا غيلاد سكرات‑اس غمكلّي‑اون‑تسكر، ترارم‑اس ف‑سنات‑توال ف‑يسكّيرن‑نس، تعمّرم‑اس لكاس س‑تيسّي ءيحرّان ف‑سنات‑توال ف‑تيسّي لّي‑اون‑تسّوا نتّات،

⁷ تعبّرم‑اس تارفوفنت د‑تگوضي س‑لعبرت لّي‑س‑تعبّر ءي‑يخف‑نس لمجد د‑لخير. اشكو ار‑تّيني نتّات غ‑وول‑نس: ‹ها‑يّي تاگلّيتّ اد‑گيغ ف‑لعرش‑ينو. ءور‑گيغ تاهجّالت، ءور‑سار‑كّين ءيمطّاون الّن‑ينو.›

⁸ ف‑غايان ا‑ف‑را‑ستّ‑وتنت‑كولّو‑تگوضيوين‑نس غ‑يان‑واسّ. را‑فلّاس‑يضر‑واطّان د‑تاغوفت د‑وغني، ار‑تّي‑تجدّر لعافيت. اشكو ربّي سيديتون لّي‑را‑فلّاس‑يزّوگز لعقوبيت، هاتي ءيتجهّد باهرا.

⁹ «ءيمّا ءيگلدان ن‑دّونيت لّي‑ديدس‑فسادنين شّن ديدس لخير، راد‑سّغويّون ار‑فلّاس‑الّان غاكود نّا‑ژران اگّو لّعافيت ار‑تّي‑تجدّر.

¹⁰ را‑ن‑بيدّن غ‑توگّوگت، ءيكساضن ا‑ور‑ديدس‑رفوفنّ ءولا نتني، ار‑تّينين: ‹تاگوضي، تاگوضي ايد‑فلّام‑يضرن ا‑تامدينت ءيمقّورن. وا‑تامدينت ن‑بابيل ءيتجهّدن، تاساعت ءيدروسن ا‑غ‑فلّام‑تگّوز لعقوبيت‑نّم.›

¹¹ «راد‑سّغويّون ءيسبّابن ن‑دّونيت ار‑فلّاس‑الّان، اشكو ءور‑سول‑يلّي ما‑يساغن سّلاعت‑نسن

¹² ن‑وورغ د‑نّوقرت د‑تژراتين غُلانين د‑لجوهر د‑لكتّان ءيشوان د‑لحرير د‑تّوب ءيضيلي د‑تّوب اژگُّاغ د‑يكشّوضن لقماري د‑سّلاعت لّعاج د‑وكشّوض يُغلان د‑سّلاعت ن‑واناس د‑ووزّال د‑رّخام

¹³ د‑لقرفا د‑لحنوض د‑توجّوت ءيميمن د‑وسافار لمورّ د‑لبخور د‑وامان ن‑واضيل ءيكتين د‑زّيت د‑وگّورن د‑يردن د‑يموگاين د‑وولّي د‑ييسّان د‑لكرارص د‑يسمگان د‑مدّن تياماژنين غ‑يميغ.

¹⁴ «راد‑اس‑ينين: ‹لاح‑ام كولّو تيميخار لّي‑تّيريت. ءيتياتّاي فلّام كولّو ما‑س‑ترضيت، تسّفولكيت سرس ءيخف‑نّم. ءور‑سار‑تي‑تژريت‑داغ.›

¹⁵ ءولا ءيسبّابن لّي‑ربحنين س‑سّلاعت لّي‑گيس‑زّنزان، راد‑بيدّن غ‑توگّوگت، ءيكساضن ا‑ور‑فلّاسن‑تضر لعقوبيت ءولا نتني ديدس. ار‑سّغويّون ار‑الّان ار‑تّينين:

¹⁶ ‹تاگوضي، تاگوضي ايد ءيضرن ف‑تمدينت ءيمقّورن لّي‑يلسان لكتّان ءيشوان د‑تّوب ءيضيلي د‑تّوب اژگُّاغ د‑يكُلان ن‑وورغ د‑لجوهر د‑تژراتين غُلانين.

¹⁷ هاتي غير تاساعت ءيدروسن ا‑غ‑كولّو‑لاح تيميخار‑ان.› «بيدّن‑ين غ‑توگّوگت كولّو ويلّي تكّانين امدا، رّوايس ن‑واناون د‑ويلّي گيسن سّودونين د‑ويلّي گيسن تخدامنين.

¹⁸ لّيغ ا‑تمنادن اگّو لّعافيت لّي‑س‑ا‑تجدّر ار‑سّغويّون ار‑تّينين: ‹ءيس‑جّو‑تلّا كرا ن‑تمدينت زوند تامدينت‑اد ءيمقّورن؟›

¹⁹ ار‑الّان ار‑تلوحن اگدرور ف‑يگّي ن‑يگويّا‑نسن ار‑سّغويّون ار‑تّينين: ‹تاگوضي، تاگوضي ايد ءيضرن ف‑تمدينت ءيمقّورن لّي‑يسّرباحن س‑تميخار‑نس كولّو ويلّي دار اناون ف‑ومدا. هاتي غير تاساعت ءيدروسن ا‑غ‑لاح كولّو ما‑گيس‑يلّان.›

²⁰ فرحات اي‑ايت‑يگنّا س‑لهالاك‑نس، تفرحم اي‑يمژلاين ن‑ربّي د‑يرقّاسن‑نس د‑لانبيا، اشكو ءيزّوگز‑د فلّاس ربّي‑نّون لعقوبيت ف‑غايلّي‑اون‑تسكر.»

²¹ غاكودان ا‑ينكر يا‑لّمالاك ءيتجهّدن، ياسي يان‑وژرو ءيمقّورن زوند اژرو ن‑وزرگ، ءيلوح‑ت‑ين غ‑ومدا ييني: «غمكاد ا‑س‑را‑ن‑تّياولواح‑تمدينت ن‑بابيل ءيمقّورن س‑جّهد. ءور‑سار‑كم‑يژري يان.

²² ءور‑سول‑را‑گيم‑سفلدن ءي‑لحسّ ن‑ايت‑لوتار نغد ايت‑ومارگ نغد ايت‑تعوّاتّ نغد ايت‑نّفّار. ءور‑سول‑را‑گيم‑يلين ايت‑تووري، والا را‑گيم‑سلّان ءي‑تاقّورت ن‑وزرگ،

²³ والا را‑گيم‑تفاو تيفاوت لّقنادل، والا را‑گيم‑سفلدن ءي‑واوال ن‑وسلي د‑تسليت. اشكو ءيسبّابن‑نّم، ءينمغورن ن‑دّونيت اد‑گان. س‑سّيحر‑نّم ا‑س‑ا‑تجلّوت كولّو تيميزار.

²⁴ لعقوبيت ا‑يضرن ف‑بابيل اشكو يوفا‑ن گيس ربّي‑نّون ءيدامّن لّانبيا د‑يمژلاين‑نس د‑وين كولّو مدّن لّي‑تياونغانين غ‑دّونيت.»