anurẓm 17 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

لعقوبيت لّي‑را‑يضر ف‑تمدينت يُخشنّ

¹ ياشك‑يد داري يان زغ‑سّا لّمالايكا لّي‑وسينين سّا ن‑تاطّاسين ييني‑يّي: «اشك‑يد اد‑اك‑ملغ لعقوبيت لّي‑را‑يضر ف‑تمگّانت ءيمقّورن لّي‑يسكيوسن غ‑گر ءيسافّن ن‑وامان.

² فسادن ديدس ءيگلدان ن‑دّونيت، تسّنوفل ءيمزدغن ن‑دّونيت س‑تيسّي ءيكتين لّفساد‑نس.»

³ ياسي‑يّي غاكودان س‑تحكيمت ن‑رّوح، ياوي‑يّي س‑يان ماني ءيخوان. ژرغ غين يات‑تمغارت تني ف‑يان‑واغُژن اژگُّاغ. ءيطّاف سّا ن‑يخفاون د‑مراو‑واسكاون، تياران فلّاس كيگان د‑يسماون، گان كولّو تيرگّام ءي‑ربّي.

⁴ تلس‑تمغارت‑ان ما‑يضلان د‑ما‑يژگُّاغن، تگ‑ن ءيكُلان ن‑وورغ د‑لجوهر د‑تژراتين غُلانين. تاسي غ‑وفوس‑نس يا‑لّكاس ن‑وورغ ءيعمّرن س‑تجلخيت د‑يركان لّفساد‑نس.

⁵ ءيتيارا ف‑يگنزي‑نس يان ءيسم س‑لمعنا ءينتلن، ءيگا «بابيل ءيمقّورن، ءينّاس ن‑تمگّانين ءولا كولّو ما‑يگان تاجلخيت ن‑دّونيت.»

⁶ ژرغ تامغارت‑ان تنوفل س‑تيسّي ن‑يدامّن ن‑يمژلاين ن‑ربّي د‑وين ءيناگان ن‑ياسوع. لّيغ‑تّ‑ژريغ، تعجّبغ گيس باهرا.

⁷ ييني‑يّي لمالاك: «ماخ ايلّيغ گيس تّعجّبت؟ راد‑اك‑ملغ لمعنا‑ياد فلّاك ءينتلن ن‑تمغارت ءولا اغُژن لّي‑ف‑تني لّي‑يطّافن سّا ن‑يخفاون د‑مراو‑واسكاون.

⁸ اغُژن‑ان ءيكّا‑تّين ءيلّا، ءور‑سول‑ا‑يتبان، را‑د‑يغلي زغ‑تدروت ن‑واكال ءيفتو س‑لهالاك. را‑گيس‑تعجّابن ءيمزدغن ن‑دّونيت لّي‑مي‑ور‑يتيارا ءيسم‑نسن غ‑وارّا ن‑تودرت زغ‑يسيزوار ن‑دّونيت. اشكو راد‑ژرن اغُژن لّي‑ستّين‑يكّان ءيلّا، ءور‑سول‑ا‑يتبان، را‑د‑داغ‑يبان.

⁹ «ما‑يطّافن لعاقل باش ا‑يفهم لمعنا‑ياد؟ اشكو سّا ن‑يخفاون‑لّي، گان سّا ن‑يورار لّي‑ف‑تسكيوس‑تمغارت.

¹⁰ گن ءولا سّا ن‑يگلدان، ضرن زغ‑گيسن سمّوس، ءيسول يان، را‑د‑سول‑ياشك وايّاض. غاكود نّا‑د‑يوشكا راد‑اس‑يتياوفكا ا‑يحكام يات لوقت ءيدروسن.

¹¹ ءيمّا اغُژن لّي‑ستّين ءيكّان ءيلّا ءور‑ا‑سول‑يتبان، نتّان ا‑را‑يگ ويس تام ءيگلدان. ءيكّا‑تّين ءيگا يان زغ‑سّا ن‑يگلدان لّي‑زرينين. را‑د‑يوورّي، ءيفتو ءيلمّا س‑لهالاك.

¹² «ءيمّا مراو‑واسكاون لّي‑تژريت، نتني گان مراو ءيگلدان لّي‑ور‑تا‑حكامنين. راد‑اسن‑تّياوفكا‑تژضّارت اد‑حكامن نتني د‑واغُژن يات تاساعت ءيدروسن.

¹³ يات‑تنباطّ كا‑دارسن‑يلّان، راد‑فلن تاژضّارت ءولا تيگلداي‑نسن غ‑وفوس ن‑واغُژن.

¹⁴ راد‑مّاغن د‑ولقّاغ، والاينّي را‑تن‑ينرو‑ولقّاغ نتّا د‑مدّن‑نس لّي‑مي‑يغرا، ءيژلي‑تن اد‑گن وينس، غوين‑بدّا گيس. اشكو ءيگا نتّا انمغور ن‑ينمغورن، ءيگ اگلّيد ن‑يگلدان.»

¹⁵ ءيزايد لمالاك ييني‑يّي: «ءيسافّن ن‑وامان لّي‑تژريت تسكيوس‑تمگّانت غ‑گراتسن، نتني گان مدّن ن‑تاسوتين د‑تقبيلين د‑تميزار د‑لّوغات ن‑دّونيت.

¹⁶ والاينّي مراو‑واسكاون د‑واغُژن لّي‑تژريت، نتني راد‑كرهون تامگّانت، كّيسن‑اس كولّو ما‑دارس‑يلّان، فلن‑تّ بلا يات. راد‑شّن تيفيّي‑نس جدرن‑تّ كولّو س‑لعافيت.

¹⁷ اشكو ءيسكر ربّي غ‑وولاون‑نسن اد‑سكارن ما‑گيسن‑يقصاد نتّا، مشاشكان‑د اد‑فلن تاژضّارت ءولا تيگلداي‑نسن غ‑وفوس ن‑واغُژن ارد كولّو ءيجرو مايلّي‑ياد‑ينّا ربّي را‑يجرو.

¹⁸ ءيمّا تامغارت لّي‑تژريت، نتّات ا‑يگان تامدينت ءيمقّورن لّي‑يحكامن غ‑كولّو ءيگلدان دّونيت.»