anurẓm 16 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

سّا ن‑تاطّاسين ن‑سّخط ن‑ربّي

¹ سفلدغ ءي‑يان‑واوال ءيتجهّدن ءيساول‑د زغ‑تحانوت تامژلايت، ييني ءي‑سّا لّمالايكا: «دّوات تفّيم‑ن ف‑دّونيت سّا ن‑تاطّاسين ن‑سّخط ن‑ربّي.»

² ءيدّو لمالاك امزوارو ءيفّي‑ن تاطّاست‑نس ف‑دّونيت، س‑وورّين ءيحبّا شقانين أُخشنّين غ‑مدّن لّي‑دار طّابع ن‑واغُژن ار‑تعبادن صّورت‑نس.

³ ءيدّو لمالاك ويس سين ءيفّي‑ن تاطّاست‑نس ف‑ومدا، س‑يوورّي ءيگ‑ومدا زوند ءيدامّن ن‑ينيغي، ءيمّت كولّو ما‑يدّرن غ‑ومدا.

⁴ ءيدّو لمالاك ويس كراض ءيفّي‑ن تاطّاست‑نس ف‑يسافّن د‑تالعينين ن‑وامان، س‑وورّين كولّو ژگُّاغن زوند ءيدامّن.

⁵ سفلدغ ءي‑لمالاك لّي‑يگابلن امان ءينّا: «وا‑ربّي امژلاي لّي‑يلّان ءيكّا‑تّين بدّا ءيلّا، س‑لحقّ ا‑س‑توتّ لحوكم‑اد ف‑بنادم،

⁶ اشكو فّين نتني ءيدامّن ن‑يمژلاين‑نّك د‑لانبيا. هاتني غيلا ءيدامّن اد‑اسن‑تسّوات. غمكان اد‑اسن‑يگان.»

⁷ سفلدغ ءي‑كرا ءيساول‑د زغ‑طّبلا لّبخور ءينّا: «س‑صّاحت ا‑سيدي ربّي لّي‑يحكامن كولّو ما‑يلّان، يُغژان لحوكم‑نّك. س‑لحقّ ا‑س‑ا‑تّحكامت.»

⁸ ءيدّو لمالاك ويس كّوژ ءيفّي‑ن تاطّاست‑نس ف‑تافوكت، س‑اس‑يتياوفكا ا‑تقد بنادم س‑لعافيت‑نس.

⁹ تجدر مدّن س‑ترغي‑نس ءيحرّان، ايلّيغ رگمن ءيسم ن‑ربّي لّي‑دار تاژضّارت ا‑تن‑يوت س‑تگوضيوين‑ان، والاينّي ءور‑رين اد‑فلن دّنوب‑نسن ءوقّرن لمجد‑نس.

¹⁰ ءيدّو لمالاك ويس سمّوس ءيفّي‑ن تاطّاست‑نس ف‑لعرش ن‑واغُژن، تلّاس‑تگلديت‑نس س‑وورّين مدّن ار‑گلّين ءيلس‑نسن س‑واطّان لّي‑تن‑يبرّين.

¹¹ ار‑رگّمن ربّي ن‑يگنّا ف‑سّيبت ن‑واطّان د‑يحبّا لّي‑گيسن‑يلّان، والاينّي ءور‑تا‑جّو‑رين اد‑فلن ءيسكّيرن‑نسن أُخشنّين.

¹² ءيدّو لمالاك ويس سضيص ءيفّي‑ن تاطّاست‑نس ف‑واسيف ن‑فورات ءيمقّورن، س‑يوورّي ءيقّور زغ‑وامان، باش ا‑يگ اغاراس يوجاد ءي‑يگلدان لّي‑را‑د‑ياشك زغ‑وسغلاي ن‑تافوكت.

¹³ ژرغ ءيلمّا كراض لجنون أُخشنّين زوند كراض ءيگُرا، فّوغن‑د زغ‑يمي ن‑ولگمّاض د‑وين‑واغُژن د‑وين نّابي بو‑تكركاس.

¹⁴ نتني لارواح لّجنون اد‑گان، ار‑سكارن لمعجيزات ار‑تكّان دار كولّو ءيگلدان ن‑دّونيت ا‑تن‑سّمونونّ ءي‑يميغ لّي‑س‑راد‑مّاغن غ‑واسّ لّحساب ن‑ربّي لّي‑يحكامن كولّو ما‑يلّان.

¹⁵ ءينّا سيديتنّغ: «هاتي را‑ن‑اشكغ زوند امخّار. امباركي ا‑را‑يگ وانّا ءيضوفن ياوي ديدس تيملسا‑نس ا‑ور‑يفّوغ بلا يات ءيحشم غ‑لگدّام ن‑مدّن.»

¹⁶ راد‑سّمونّ ءيگلدان‑لّي غ‑ودغار لّي‑مي‑تّينين ‹هارماگادّون› س‑واوال ن‑ايت‑يودايا.

¹⁷ ءيدّو لمالاك ويس سّا ءيفّي‑ن تاطّاست‑نس ف‑يگنوان، س‑د‑يساول يان‑واوال ءيتجهّدن زغ‑دار لعرش غ‑تحانوت تامژلايت ييني: «هاتي ءيكمّل.»

¹⁸ ار‑كّاتن‑ووسمانّ، ءيمّاسّ ءيگّيگ س‑وقّريان ءيتجهّدن، ءيمّاسّ‑واكال ءولا نتّا باهرا. ءور‑جّو‑يمّوسّي‑واكال غمكان زغ‑لّيغ ءيتياوخلاق بنادم غ‑دّونيت.

¹⁹ تبضو‑تمدينت ءيمقّورن ف‑كراطّ‑توال، تّهلكنت كولّو تيمدينين ن‑تميزار ن‑دّونيت. ءور‑يتّو ربّي تامدينت ن‑بابيل ءيمقّورن، ءيسّوا‑ياس كولّو لكاس ن‑سّخط لّغاضاب‑نس.

²⁰ غاكودان لاح ءيگزيرن، استوان كولّو ءيدرارن.

²¹ ار‑ن‑يطّار ءيبروري زغ‑يگنوان زوند ءيژران، ءيضني باهرا ياكمور‑ن س‑كّوژ ءيد‑مراو ن‑كيلو. ار‑ن‑يطّار ف‑مدّن ايلّيغ رگمن ربّي ف‑تگوضي‑ان ن‑يبروري، اشكو ءيشقا باهرا.