anurẓm 15 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

امارگ ن‑ويلّي نرانين اغُژن

¹ ژرغ ءيلمّا تاماتارت ياضني غ‑يگنّا، تمقّور باهرا، تعجّبغ گيس س‑كيگان. تگا سّا لّمالايكا اسين سّا ن‑تگوضيوين. تيمگّورا غ‑تگوضيوين اد‑گانت، اشكو ربّي ءيحودّا سرسنت سّخط‑نس.

² ژرغ كرا ءيرواس‑يّي تامدا ن‑جّاج ءيخلضن س‑لعافيت. ژرغ غويلّي نرانين اغُژن ءولا صّورت‑نس ءولا نّمرا ن‑يسم‑نس، بيدّن غ‑تاما ن‑تمدا ن‑جّاج اسين لوتارات ن‑ربّي.

³ ار‑تّيريرن اسين امارگ ن‑موسا اخدّام ن‑ربّي د‑ومارگ ن‑ولقّاغ ار‑تّينين: «وا‑سيدي ربّي لّي‑يحكامن كولّو ما‑يلّان، ءيمقّور كولّو ما‑تسكارت، لعجب ا‑يگا. واي‑اگلّيد ن‑تاسوتين، يُغژان كولّو ما‑تّنباطّ. لحقّ ا‑يگا.

⁴ وا‑سيدي ربّي، ما‑ور‑را‑يضر غ‑لگدّام‑نّك؟ ما‑ور‑را‑يوقّر لمجد ن‑يسم‑نّك؟ اشكو كيّي واحدوك ا‑يصفان. راد‑د‑اشكين مدّن اد‑اك‑سجدن زغ‑كولّو تيميزار ن‑دّونيت. اشكو ءيبايّن‑اسن‑د لحقّ ن‑تنباضين‑نّك.»

⁵ لّيغ ءيزري مايان سّماقّلغ‑ن س‑ژريغ تاحانوت تامژلايت ترژم غ‑وخيّام ن‑تميتار ن‑ربّي غ‑يگنّا.

⁶ ژرغ سّا لّمالايكا لّي‑را‑ياسي سّا ن‑تگوضيوين، فّوغن‑د زغ‑تحانوت تامژلايت. لسن تيملسا لّكتّان ءيصفان ار‑سّمرقيقيينت. بكيسن زغ‑وامّاس‑نسن س‑يبكّاسن ن‑وورغ.

⁷ تدّو يات زغ‑كّوژط لمخلوقات تفك ءي‑سّا لّمالايكا سّا ن‑تاطّاسين ن‑وورغ، عمّرنت س‑سّخط ن‑ربّي لّي‑بدّا‑يلّان راد‑بدّا‑ييلي.

⁸ توورّي تعمّر‑تحانوت تامژلايت س‑واگّو لّمجد ن‑ربّي د‑تحكيمت‑نس ءيتجهّدن. ءور‑را‑ييژضار يان ا‑يكشم س‑تحانوت‑ان تامژلايت ارد كمّلنت سّا ن‑تگوضيوين لّي‑وسين سّا لّمالايكا.