anurẓm 14 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

القّاغ د‑ويلّي ءيفرا زغ‑دّونيت

¹ سّماقّلغ‑ن غاكودان س‑ژريغ القّاغ ءيبيدّ ف‑يگّي ن‑وورير ن‑تگمّي ن‑ربّي. بيدّن ديدس ميّا د‑كّوژ ءيد‑مراو د‑كّوژ‑والف (000‏.144) ن‑مدّن لّي‑مي‑يتيارا ف‑يگنزي‑نسن ءيسم ن‑ولقّاغ ءولا ءيسم ن‑باباس.

² سفلدغ ءيلمّا ءي‑يان‑واوال ءيساول غ‑يگنّا زوند ءيجّيج ن‑يسافّن ن‑وامان گّوتنين ءولا زوند اقّريان ن‑يگّيگ ءيتجهّدن. ءيرواس لحسّ لّوتارات ار‑تن‑كّاتن ءيد‑باب‑نسن.

³ ار‑كولّو‑تاسين يان‑ومارگ لّجديد غ‑لگدّام لّعرش غ‑دار كّوژط لمخلوقات د‑يمغارن. ءور‑يژضار يان ا‑ييسّان امارگ‑ان، ابلا ميّا د‑كّوژ ءيد‑مراو د‑كّوژ‑والف (000‏.144) ن‑مدّن لّي‑يفرا ربّي زغ‑دّونيت.

⁴ نتني گان غويلّي غوسنين، ءور‑سّركين ءيخف‑نسن د‑تمغارين. گن غويلّي‑بدّا‑يتمونون د‑ولقّاغ س‑ينّاس ا‑يتّيدو. گن ءيمنزا ن‑بنادم لّي‑يفرا اد‑گن وين ربّي د‑ولقّاغ.

⁵ كرا ن‑تكركيست ءور‑تكّي ءيمي‑نسن. كرا يُخشنّ ءور‑گيسن‑يلّي.

كراض لمالايكا وويلن غ‑وامّاس ن‑يگنوان

⁶ ژرغ ءيلمّا يا‑لّمالاك ياضني يوويل غ‑وامّاس ن‑يگنوان، ياوي‑د لخبار ءيفولكين لّي‑راد‑بدّا‑ييلي، ا‑سرس‑يتبرّاح ءي‑كولّو ءيمزدغن ن‑دّونيت ن‑كرايگاتّ تاسوت د‑تقبيلت د‑لّوغا د‑تمازيرت.

⁷ يالّ اوال‑نس ييني: «ضرات ا‑تّعبادم ربّي ار‑تي‑تّالغم، اشكو تلكم‑د تاساعت ا‑يوت لحوكم ف‑بنادم. سجدات ءي‑والّي ءيسكرن ءيگنوان د‑واكال، ءيسكر امدا ءولا تالعينين ن‑وامان.»

⁸ ءيگُّرو‑اس‑د لمالاك ويس سين ييني: «تّهلك، تّهلك‑تمدينت ن‑بابيل ءيتجهّدن. تّهلك ختالّي ءيسّوان كولّو تيميزار ن‑دّونيت س‑تيسّي ءيكتين لّفساد‑نس ءيسّنوفولن.»

⁹ ءيگُّرو‑اسن‑د لمالاك ويس كراض، يالّ اوال‑نس ييني: «وينّا تعبادنين اغُژن ءولا صّورت‑نس، د‑وينّا قبلنين طّابع‑نس ف‑يگنزي‑نسن ءولا ف‑وفوس‑نسن،

¹⁰ نتني راد‑سون زغ‑تيسّي ءيحرّان ن‑سّخط ن‑ربّي لّي‑س‑يعمّر لكاس لّغاضاب‑نس. راد‑رفوفنّ س‑لعافيت د‑لكبريت غ‑لگدّام لّمالايكا ن‑ربّي ءولا غ‑لگدّام ن‑ولقّاغ.

¹¹ راد‑بدّا‑ياقلاي‑واگّو ن‑ورفوفن‑نسن، ءور‑سار‑يتمّي. ءور‑سار‑راد‑اسن‑تيلي رّاحت، لا غ‑ييض ءولا ازال، ءي‑ويلّي تعبادنين اغُژن ءولا صّورت‑نس، ءولا غويلّي قبلنين طّابع ن‑يسم‑نس.»

¹² مايان ا‑ف‑يلّا ف‑يمژلاين ن‑ربّي اد‑صبرن زگان، ا‑تن‑يگان د‑ويلّي سكارنين س‑لوصيّات ن‑ربّي غوين‑بدّا غ‑ياسوع.

¹³ سفلدغ ءيلمّا ءي‑يان‑واوال ءيساول غ‑يگنّا ييني‑يّي: «ارا مايا، ‹ءيمباركين اد‑گان وينّا مّوتنين ف‑يسم ن‑سيديتنّغ زغ‑غيلاد س‑وفلّا.› » ءيساول‑د رّوح ن‑ربّي ييني: «س‑صّاحت، راد‑سونفون نتني زغ‑ونهاتاف‑نسن، اوين ديدسن لحساب ن‑كولّو ماد‑سكارن ءيفولكي.»

تامگرا ن‑صّابت ن‑دّونيت

¹⁴ سّماقّلغ‑ن ءيلمّا س‑ژريغ يات‑تمدلوت تومليلت، ءيسكيوس فلّاس يان ءيرواس بنادم. ييلي تّاج ن‑وورغ ف‑يخف‑نس، ييلي‑وسمّاود ءيمسادن غ‑وفوس‑نس.

¹⁵ ءيفّوغ‑د يا‑لّمالاك زغ‑تگمّي ن‑ربّي، يالّ اوال‑نس ييني ءي‑والّي ءيسكيوسن ف‑تمدلوت: «لوح‑ن اسمّاود‑نّك ا‑يمگر، اشكو ءيلكم‑وزمز ن‑تمگرا، تنو صّابت ن‑دّونيت.»

¹⁶ ءينكر غوالّي ءيسكيوسن ف‑تمدلوت ءيلوح‑ن اسمّاود‑نس ف‑دّونيت ءيمگر صّابت‑نس.

¹⁷ غاكودان ءيفّوغ‑د يا‑لّمالاك ياضني زغ‑تگمّي ن‑ربّي غ‑يگنّا، ءولا نتّا يوسي اسمّاود ءيمسادن.

¹⁸ ءيفّوغ‑د ءيلمّا يا‑لّمالاك ياضني زغ‑دار طّبلا لّبخور، ءيگ غوالّي ءيگابلن لعافيت. ءيساول س‑والّي يوسين اسمّاود ءيمسادن ييني‑اس س‑واوال ءيتجهّدن: «لوح‑ن اسمّاود‑نّك، تسّمونت تيزرمين زغ‑دّاليت ن‑دّونيت، اشكو ءينوا‑واضيل.»

¹⁹ ءيدّو لمالاك ءيلوح‑ن اسمّاود‑نس ف‑دّونيت ءيسّمون اضيل. ءيلوح‑ن اضيل ن‑دّونيت غ‑لمعصّرت ءيمقّورن ن‑سّخط ن‑ربّي.

²⁰ تلّا لمعصّرت غ‑برّا ن‑تمدينت، ار‑گيس‑تاضّرن اضيل. فّوغن زغ‑گيس ءيدامّن، نگين زوند اسيف، ايلّيغ ءيدرا س‑ما‑يتگّان تيدّي ن‑واگمار. ءيلكم‑ونگّاي‑نس ما‑يتگّان كراض ءيد‑ميّا ن‑كيليميتر.