anurẓm 13 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

اغُژن لّي‑يغلين زغ‑ومدا

¹ ژرغ ءيلمّا يان‑واغُژن ءيغلي‑د زغ‑ومدا. ءيطّاف مراو‑واسكاون د‑سّا ن‑يخفاون، ييلي ف‑كرايگاتّ ءيسك يان‑تّاج ءيمژّين، ءيتيارا ف‑كرايگاتّ ءيخف يان‑يسم ءيگان تارگّيمت ءي‑يسم ن‑ربّي.

² ءيگ‑واغُژن‑ان زوند اگرزام، صحون ءيضارن‑نس ءيلين‑گيسن‑واخبّاشن مقّورنين، ءيگ ءيمي‑نس زوند ءيمي ن‑يزم. ءيفك‑اس‑ولگمّاض لحوكم‑نس ءولا تاژضّارت ءيتجهّدن ن‑تگلديت‑نس.

³ ءيرواس ءيس‑يتياگّاس يان زغ‑يخفاون‑نس را‑يمّت، والاينّي ءيجّي‑واگّاس‑لّي ءيشقان ءور‑يمّوت. ار‑تعجّابن كولّو ءيمزدغن ن‑دّونيت غ‑واغُژن‑ان، وورّين ضفورن‑ت.

⁴ ار‑تعبادن الگمّاض اشكو ءيفكا تاژضّارت‑نس ءي‑واغُژن، ار‑تعبادن اغُژن ءولا نتّا ار‑تّينين: «ما‑يتجهّدن زوند اغُژن؟ ما‑يژضارن ا‑ت‑ينرو؟»

⁵ ءيتياوفكا ءي‑واغُژن ا‑يساوال ار‑يسّفورّوگ ار‑يرگّم ربّي، ءيتّفك‑اس ا‑يحكام كّوژ ءيد‑مراو د‑سين (42) ن‑وايّور.

⁶ ءيرژم ءيمي‑نس س‑ترگّام، ار‑يرگّم غ‑يسم ن‑ربّي ءولا تازدغت‑نس ءولا كولّو ايت‑يگنّا.

⁷ ءيتّفك‑اس ا‑يتمّاغ د‑يمژلاين ن‑ربّي ءينرو‑تن، ءيتّفك‑اس ا‑يحكام غ‑مدّن ن‑كرايگاتّ تاقبيلت د‑تاسوت د‑لّوغا د‑تمازيرت.

⁸ را‑تي‑تعبادن كولّو ءيمزدغن ن‑دّونيت، ابلا غويلّي مي ءيتيارا ءيسم‑نسن زغ‑يسيزوار ن‑دّونيت غ‑وارّا ن‑تودرت ن‑ولقّاغ لّي‑يتياوغراسن.

⁹ وانّا دار ءيمزگان، ءيقّان‑ت‑يد ا‑يسفلد.

¹⁰ «وانّا‑د‑يقّانّ ا‑يتياماژ را‑يتياماژ. وانّا‑د‑يقّانّ ا‑يمّت س‑تاژّيت را‑يمّت س‑تاژّيت. مايان ا‑ف‑يلّا ف‑يمژلاين ن‑ربّي ا‑گيس‑امژن، زگان غ‑وغاراس‑نس.»

اغُژن لّي‑يفّوغن زغ‑واكال

¹¹ ژرغ ءيلمّا اغُژن ياضني ءيفّوغ‑د زغ‑واكال. ءيطّاف سين‑واسكاون زوند اسكاون ن‑ولقّاغ، ار‑يساوال زوند الگمّاض.

¹² ار‑يتحكام س‑يسم ن‑واغُژن امزوارو، ءيطّاف كولّو تاژضّارت‑نس. ار‑يتامر دّونيت د‑يمزدغن‑نس اد‑تعبادن اغُژن امزوارو لّي‑مي‑يجّي‑واگّاس‑نس ءيشقان.

¹³ ءيزايد ار‑يسكار تيميتار مقّورنين، ار‑د‑يزّوگوز لعافيت زغ‑يگنّا ار اكال ا‑ستّ‑ژرن كولّو مدّن.

¹⁴ ءيتياوفكا‑ياس ا‑يسكار لمعجيزات غ‑تاما ن‑واغُژن امزوارو، ار‑سرسنت‑يجلّو كولّو ءيمزدغن ن‑دّونيت. يوصّا‑تن اد‑سكرن يات‑صّورت ءيمقّورن ن‑واغُژن امزوارو لّي‑يتياگّاسن س‑تاژّيت يوورّي‑داغ ءيدّر.

¹⁵ ءيتّفك‑اس ا‑يزرع كرا ن‑رّوح غ‑صّورت‑لّي ن‑واغُژن امزوارو، ايلّيغ توورّي ار‑تساوال صّورت ار‑تّامر مدّن اد‑نغن وانّا ياگُين ا‑ستّ‑يتعباد.

¹⁶ ءيزايد‑واغُژن‑لّي ار‑يتامر كولّو مدّن، ما‑يمژّين ءولا ما‑يمقّورن، ايت‑وايدا ءولا ءيمژلاض، ءيسمگان ءولا غويلّي گانين وين ءيخف‑نس، ييني‑اسن اد‑قبلن طّابع ف‑وفوس‑نسن افاسي نغد ف‑يگنزي‑نسن.

¹⁷ غمكان ا‑س‑ا‑يتامر باش ا‑ور‑ييژضار يان ا‑يسغ ءولا ءيزّنزا بلا دارس ءيلّا طّابع ن‑يسم ن‑واغُژن امزوارو نغد نّمرا لّي‑يمالان ءيسم‑نس.

¹⁸ ما‑را‑يفهم لمعنا‑ياد؟ وانّا دار لعاقل، ءيلّا فلّاس ا‑يحاسب نّمرا ن‑واغُژن، اشكو تگا نتّات نّمرا ن‑يسم ن‑بنادم، تگ سضيص ءيد‑ميّا د‑سضيص ءيد‑مراو د‑سضيص (666).