anurẓm 12 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تامغارت د‑ولگمّاض

¹ تبان ءيلمّا يات‑تماتارت ءيمقّورن غ‑يگنوان. تگا زوند يات‑تمغارت ءيلسان تافوكت، ييلي‑وايّور غ‑دّو ءيضارن‑نس، ييلي ف‑يخف‑نس يان‑تّاج ن‑سين د‑مراو ن‑يتري.

² ار‑تربّو تاكمور ا‑تارو، ار‑تسّغويّو س‑ونگاژ ن‑تلاليت.

³ تبان‑يلمّا‑تماتارت ياضني غ‑يگنوان. تگا زوند يان‑ولگمّاض اژگُّاغ، ءيمقّور باهرا. ءيطّاف سّا ن‑يخفاون د‑مراو‑واسكاون، ءيلين سّا ن‑تّيجان مژّينين ف‑يخفاون‑نس.

⁴ ءيسّماسّ ءيمغيل‑نس ءيجورّ سرس تولوت ن‑يتران زغ‑يگنوان، ءيلوح‑تن س‑واكال. ءيبيدّ غ‑لگدّام ن‑تمغارت لّي‑را‑يارو، ييري ا‑يشّ ارّاو‑نس غاكود نّا‑تي‑تورو.

⁵ تارو يان‑وارّاو، ءيگ يوس لّي‑را‑يحكام كولّو تيميزار ن‑دّونيت س‑وعمود ن‑ووزّال. ءيتياتّاي‑وارّاو‑نس غاكودان س‑لعرش ن‑ربّي.

⁶ تروول‑تمغارت س‑لخلا، س‑يلّي‑اس‑يجّوجاد ربّي. غين ا‑غ‑را‑د‑اس‑يفك كولّو ما‑تحتاجّا الف د‑سين ءيد‑ميّا د‑سضيص ءيد‑مراو (1260) ن‑واسّ.

⁷ غاكودان ءينكر ءيميغ غ‑يگنّا. ءينكر لمالاك ءيمقّورن ميخايل د‑لمالايكا لّي‑لّانين غ‑دّو‑وفوس‑نس مّاغن د‑ولگمّاض. ءيرار‑فلّاسن‑ولگمّاض د‑لمالايكا‑نس، مّاغن ديدسن

⁸ والاينّي ءور‑تن‑نرين، ءور‑ژضارن اد‑قامان غ‑يگنّا.

⁹ ءيتياوگار‑ن‑ولگمّاض‑ان ءيمقّورن س‑ييزدار. نتّان ا‑مي‑تّينين ‹ءيبليس› ءولا ‹شيطان›، ءيگ ابنكال اقديم لّي‑يجلّون كولّو ءيمزدغن ن‑دّونيت. ءيتياوگار‑ن س‑واكال نتّا د‑لمالايكا‑نس.

¹⁰ سفلدغ ءيلمّا ءي‑يان‑واوال ءيتجهّدن ءيساول غ‑يگنّا ييني: «غيلاد اد‑اغ‑يجّنجم ربّي‑نّغ، تبان‑د‑تحكيمت‑نس ءيتجهّدن، تاشك‑يد‑تگلديت‑نس، يامژ لماسيح‑نس لحوكم. اشكو غوالّي ءيتاشتكّان س‑ايتماتنّغ غ‑لگدّام ن‑ربّي‑نّغ غ‑ييض ءولا ازال، هاتي ءيتياولواح س‑ييزدار.

¹¹ نران‑ت نتني س‑يدامّن ن‑ولقّاغ ءولا س‑واوال ن‑توگّا‑نسن، اشكو ءوجادن اد‑فكن ءيخف‑نسن ار لموت.

¹² فرحات اي‑يگنوان ءولا كولّو ما‑گيسن‑يلّان. ءيمّا كونّي اي‑اكال د‑ومدا، تاگوضي ا‑راد‑اون‑ييلي اشكو ءيگّوز سرون ءيبليس، نكرن‑د گيس ءيريين باهرا اشكو ءيسّن ءيس‑ور‑اس‑تقاما غير لوقت ءيدروسن.»

¹³ ءيمّا الگمّاض، لّيغ ءيژرا ءيخف‑نس ءيس‑ن‑يتياولواح س‑واكال، ءيدّو ار‑يطّاي تامغارت لّي‑يورون ارّاو.

¹⁴ ءيمّا نتّات تياوفكان‑اس سين ءيفراون زوند ءيفراون ن‑يگيدر ءيمقّورن باش ا‑تايّل زغ‑دار‑وبنكال س‑لخلا س‑يلّيغ راد‑اس‑يتياوفكا كولّو ما‑تحتاجّا كراض ءيسگُّاسن د‑مناصّ.

¹⁵ والاينّي ءينگي‑د ءيمي ن‑وبنكال س‑وامان زوند اسيف ءيتجهّدن باش ا‑ياوي‑ونگّاي‑نس تامغارت.

¹⁶ اكال ا‑يسكرن افولكي ءي‑تمغارت غيلان، اشكو ءيرژم ءيمي‑نس ءيسو انگّاي لّي‑د‑يفّوغن زغ‑يمي ن‑ولگمّاض.

¹⁷ ءيمّا الگمّاض، نكرن‑د گيس ءيريين گّوتنين، طيّر‑اس باهرا ف‑تمغارت. ءيدّو ا‑يتمّاغ د‑تاروا ياضني ن‑تمغارت، ا‑تن‑يگان د‑كولّو ويلّي سكارنين س‑لوصيّات ن‑ربّي ار‑تامژن غ‑توگّا ن‑ياسوع.

¹⁸ ءيبيدّ ف‑وملال غ‑تاما ن‑ومدا.