anurẓm 11 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

سين ءيناگان

¹ تّفك‑يّي ءيلمّا يات‑تغانيمت ما‑س‑ا‑سّغالغ، ييني‑يّي ربّي: «نكر تسّغلت تيگمّي ن‑ربّي‑نّك د‑وژرو ن‑تغرسي، تحاسبت كولّو ويلّي گيس تعبادنين.

² والاينّي اد‑ور‑تسّغلت تارگّيت‑ان ءيلّان غ‑برّا ن‑تگمّي، اشكو فلغ‑تّ ءي‑ويلّي ءور‑گينين مدّن‑ينو. راد‑اكُلن نتني ف‑تمدينت تامژلايت كّوژ ءيد‑مراو د‑سين (42) ن‑وايّور.

³ والاينّي راد‑ازنغ سين ءيناگان‑ينو اد‑تبرّاحن الف د‑سين‑يد‑ميّا د‑سضيص ءيد‑مراو (1260) ن‑واسّ س‑يواليون لّي‑راد‑اسن‑مالاغ. لخيش ن‑تگوضي ا‑راد‑لسن.»

⁴ راد‑گن نتني زوند سنات‑تيزوتنا ءولا سين لقنادل، بيدّن غ‑لگدّام ن‑ربّي لّي‑يحكامن كولّو دّونيت.

⁵ ءيغ‑يناول كرا ن‑يان ا‑تن‑يهلك، را‑دي‑تفّوغ لعافيت زغ‑يمي‑نسن تسو‑ن غويلّي‑تن‑كورهانين. ءيقّان‑د ا‑يمّت وانّا ءيران ا‑تن‑يهلك.

⁶ راد‑اسن‑تيلي‑تژضّارت اد‑قّنّ ءيگنوان ا‑ور‑يضر‑ونژار غ‑ووسّان لّي‑غ‑ا‑تبرّاحن س‑يواليون لّي‑اسن‑يمالا ربّي. راد‑اسن‑تيلي‑تژضّارت اد‑رارن امان ن‑تالعينين اد‑ژگُّاغن زوند ءيدامّن. راد‑اسن‑تيلي‑تژضّارت ف‑دّونيت ا‑ستّ‑وتن س‑كولّو كرا ءيگان تاگوضي غاكود نّا‑ران.

⁷ غاكود لّيغ راد‑كمّلن تابرّاحت س‑توگّا‑نسن، راد‑سرسن‑ينكر‑واغُژن لّي‑د‑يغلين زغ‑تدروت ن‑واكال، ءينرو‑تن ءينغ‑تن.

⁸ تقاما دّات‑نسن غ‑وسوك ن‑تمدينت ءيمقّورن لّي‑غ‑وگُلن سيديتسن ف‑وگّجدي، ار‑سرس‑كّاتن مدّن لمعنا ن‑‹سادوم› ءولا ‹ميصر›.

⁹ كراض‑ووسّان د‑مناصّ ا‑را‑ن‑تمونون مدّن زغ‑كولّو تاسوتين د‑تقبيلين د‑لّوغات د‑تميزار اد‑سّموقّولن غ‑دّات‑نسن، اگُين ا‑تن‑مضلن.

¹⁰ راد‑فرحن ءيمزدغن ن‑دّونيت س‑لموت‑نسن. راد‑باهرا‑ضصّان ءي‑نگراتسن ار‑اكّان تارّاگين ءي‑نگراتسن، اشكو ءور‑سول‑دّرن سين ءيناگان لّي‑زّوگوزنين تامّارا ءيگّوتن ف‑بنادم.

¹¹ والاينّي تيغوردين ن‑كراض‑ووسّان د‑مناصّ، ءيرار‑د گيسن ربّي رّوح ن‑تودرت، بيدّن ف‑يضارن‑نسن. ضرنت‑تكساض گّوتنين غ‑كولّو ويلّي‑تن‑ژرانين.

¹² غاكودان سفلدن ءيناگان‑لّي ءي‑يان‑واوال ءيتجهّدن زغ‑يگنّا ييني‑اسن: «غلياد‑د س‑غيد.» تيالالن ءيلمّا س‑يگنّا غ‑يات‑تمدلوت غ‑لگدّام ن‑ويلّي‑تن‑كورهانين.

¹³ ءيمّاسّ‑واكال باهرا غ‑تاساعت‑ان، ءيضر يان‑وگزّوم زغ‑مراو ءيگزمان ن‑تمدينت، مّتن سّا ن‑يد‑والف (7000) ن‑مدّن لّيغ ءيمّوسّا‑واكال. كسوضن باهرا غويلّي سولنين ار‑تّينين: «منشك ا‑باهرا‑يتجهّد ربّي ن‑يگنّا.»

¹⁴ غمكاد ا‑تزري تيس سنات‑تگوضيوين. ءيمّا تيس كراطّ‑تگوضيوين، هاتي تاكمور‑د.

ويس سّا ن‑نّفّارات

¹⁵ يوت ءيلمّا ويس سّا لّمالايكا نّفّار‑نس، س‑سفلدغ ءي‑واقّور س‑يواليون تجهّدنين غ‑يگنّا ار‑تّينين: «هاتي تاگلديت ن‑دّونيت توورّي تگا تاگلديت ن‑سيديتنّغ ءولا تين لماسيح‑نس. نتّان ا‑ستّ‑يحكامن غيلاد ءولا كولّو مايد‑د‑يفتان.»

¹⁶ ءيمّا سين ءيد‑مراو د‑كّوژ (24) ن‑ومغار لّي‑سكيوسنين ف‑لعروش‑نسن غ‑لگدّام ن‑ربّي، ضرن‑ين ف‑وودماون‑نسن سجدن‑اس

¹⁷ ءينين: «نشكر‑ك ا‑سيدي ربّي لّي‑يحكامن كولّو ما‑يلّان، ءيگ غوالّي ءيلّان ييلي بدّا، اشكو تنكرت س‑تحكيمت‑نّك ءيتجهّدن تگرت غ‑لحوكم.

¹⁸ هاجنت‑تميزار ن‑دّونيت والاينّي ءيلكم‑د‑وزمز لّغاضاب‑نّك. ءيگ ازمز لّي‑غ‑را‑توت لحوكم ف‑ويلّي مّوتنين، ترارت لخير ءي‑يخدّامن‑نّك لانبيا ءولا ءيمژلاين‑نّك ءولا كولّو ويلّي ءوقّرنين ءيسم‑نّك، ما‑يمژّين ءولا ما‑يمقّورن. ءيگ ازمز لّي‑غ‑را‑تهلكت غويلّي تهلاكنين دّونيت.»

¹⁹ غاكودان ا‑تّياورژام‑تگمّي ن‑ربّي غ‑يگنّا، ژرغ‑ن صّندوق لّعهد ن‑ربّي غ‑وگُنس ن‑تگمّي. ءوتن‑ووسمانّ، ءيمّاسّ ءيگّيگ س‑وقّريان ءيتجهّدن. ءيمّاسّ‑واكال ءولا نتّا، ءيضر ءيبروري ءيشقان.