anurẓm 10 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

لمالاك لّي‑يوسين ارّا ءيمژّين

¹ ژرغ ءيلمّا يا‑لّمالاك ياضني، ءيتجهّد باهرا ءيگّوز‑د زغ‑يگنّا. ءيسوتل‑اس‑ومدلو زوند تيملسيت، تلولّي‑تسليت ن‑ونژار ءي‑يخف‑نس، ييسفيو‑وودم‑نس زوند تافوكت، گن ءيضارن‑نس زوند تانّالين لّعافيت.

² ياسي غ‑وفوس‑نس يان‑وارّا ءيمژّين ءيرژمن. ءيسرس‑ن اضار‑نس افاسي ف‑ومدا، ءيسرس‑د اضار‑نس اژلماض ف‑واكال.

³ ءيساول س‑يان‑واوال ءيتجهّدن زوند تاندرا ن‑يزم. لّيغ ءيساول ءوتن سّا ن‑يگّيگن.

⁴ لّيغ ءوتن سّا ن‑يگّيگن گغ‑ن اد‑اراغ، والاينّي سفلدغ ءي‑يان‑واوال زغ‑يگنّا ءينّا‑يّي: «حضو مايد نّان سّا ن‑يگّيگن، ا‑ت‑ور‑تارات.»

⁵ ءيمّا لمالاك لّي‑ژريغ ءيبيدّ ف‑ومدا د‑واكال، يولّ افوس‑نس افاسي س‑يگنّا،

⁶ ءيگّالّ س‑ربّي لّي‑بدّا‑يلّان راد‑بدّا‑ييلي، ءيگ غوالّي ءيسكرن ءيگنّا د‑واكال د‑ومدا ءولا كولّو ما‑گيسن‑يلّان. ييني: «هاتي ءور‑را‑سول‑يماطل.

⁷ اشكو غاكود لّيغ را‑يوت ويس سّا لّمالايكا نّفّار‑نس، را‑يسّافو ربّي مايلّي ءيقصاد، ا‑ت‑يگان د‑لباراكا ءينتلن لّي‑ف‑يساول ءي‑يخدّامن‑نس لانبيا.»

⁸ غاكودان ءيساول‑د‑داغ‑سري‑واوال لّي‑مي‑سفلدغ زغ‑يگنّا ييني‑يّي‑د: «دّو، تامژت ارّا لّي‑يرژمن غ‑وفوس لّمالاك لّي‑يبيدّن ف‑ومدا ءولا اكال.»

⁹ فتوغ س‑دار لمالاك ضالبغ‑ت اد‑يّي‑يفك ارّا‑لّي ءيمژّين، ييني‑يّي: «امژ‑ت تشّت‑ت. را‑يسمّوم غ‑وديس‑نّك والاينّي را‑يميم زوند تامّنت غ‑يمي‑نّك.»

¹⁰ امژغ ارّا‑لّي ءيمژّين زغ‑وفوس لّمالاك شّغ‑ت. ءيميم زوند تامّنت غ‑يمي‑نو، والاينّي لّيغ‑ت‑شّيغ يوورّي ءيسمّوم غ‑وديس‑ينو.

¹¹ ييني‑يّي غاكودان: «ءيقّان‑ك‑يد ا‑تزايدت ار‑تّبرّاحت س‑ما‑راد‑اك‑يمل ربّي ف‑مدّن ن‑كيگان د‑تميزار د‑تاسوتين د‑لّوغات د‑يگلدان.»