anurẓm 1 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ ارّا‑ياد، ءيتيارا گيس مايلّي‑د‑يسّبايّن ياسوع لماسيح، ءيفك‑اس‑ت ربّي باش ا‑د‑يمل ءي‑يخدّامن‑نس ما‑د‑يقّانّ ا‑يجرو غ‑مايد‑د‑ياكمورن. يازن‑د يا‑لّمالاك ا‑ت‑يد‑يسّبايّن ءي‑وخدّام‑نس يوحانّا.

² ار‑يادّر يوحانّا كولّو ما‑يژرا، ءيفك توگّا‑نس ف‑واوال‑اد ن‑ربّي ءولا لخبار‑اد ن‑ياسوع لماسيح.

³ امباركي ا‑يگا وانّا ياقران ءيواليون‑اد ن‑ربّي. ءيمباركين اد‑گان وينّا‑ياسن‑سفليدنين ار‑سكارن س‑مايد ءيتياران، اشكو ياكمور‑د‑وزمز لّي‑غ‑راد‑كولّو‑جرونت‑تغاوسيوين‑اد.

لمجد ن‑ياسوع لماسيح

⁴ ف‑وفوس ن‑يوحانّا ءي‑سّا ن‑يمناگّارن ن‑ايتماتن غ‑تمازيرت ن‑اسيّا. اد‑اون‑تيلي لباراكا د‑سّلامت زغ‑والّي ءيلّان ءيكّا‑تّين ءيلّا راد‑بدّا‑ييلي، ءولا زغ‑سّا لّارواح لّي‑يوالان لعرش‑نس،

⁵ ءولا زغ‑ياسوع لماسيح لّي‑يگان ءينيگي ءيصحان، ءيگ امزوارو لّي‑د‑ينكرن زغ‑لموت، ءيگ واد ءيحكامن غ‑يگلدان ن‑دّونيت. نتّان ا‑گينّغ‑يحنّان ءيفسي‑اغ س‑يدامّن‑نس زغ‑يسكراف ن‑دّنوب‑نّغ،

⁶ ءيرار‑اغ ا‑نگ ايت‑تگلديت ن‑ربّي باباس ف‑ا‑ن‑نسراس غ‑لگدّام‑نس تيوافكيو ما‑س‑ا‑يترضو. نتّان ا‑مي‑يلّا لمجد د‑لقوّا، غيلاد ءولا كولّو مايد‑د‑يفتان، امين.

⁷ هاتي را‑د‑يفتو غيلاد غ‑گر ءيمدلا، ژرن‑ت كولّو مدّن، ژرن‑ت ءولا غويلّي‑ت‑سّياگّاسنين. راد‑الّانت‑كولّو‑تميزار ن‑دّونيت ف‑سّيبت‑نس. غمكاد ا‑را‑ييلي، امين.

⁸ «نكّي گيغ واد ءيزوارن، گغ واد ءيگُّران.» غمكاد ا‑س‑ينّا سيدي ربّي لّي‑يحكامن كولّو ما‑يلّان. ءيكّا‑تّين ءيلّا، ييلي، راد‑بدّا‑ييلي.

ءيبان لماسيح ءي‑يوحانّا

⁹ ءيمّا نكّي يوحانّا گماتون د‑وسمون‑نّون غ‑تنوكموت ءولا تاگلديت ءولا صّبر لّي‑اغ‑يلّان س‑يسم ن‑ياسوع، لّيغ غ‑يگزير ن‑باطموس تياماژغ ف‑سّيبت ن‑تبرّاحت ن‑واوال ن‑ربّي ءولا ف‑توگّا ن‑ياسوع.

¹⁰ هاتي غ‑واسّ ن‑سيديتنّغ ييوي‑يّي رّوح لقودوس، س‑سفلدغ ءي‑واوال ءيتجهّدن زوند نّفّار ءيساول‑د غ‑تغوردين‑ينو

¹¹ ييني‑يّي: «ارا مايد را‑تژرت غ‑يان‑وارّا، تازنت‑ت س‑سّا ن‑يمناگّارن، ءي‑افسوس ءولا سميرنا ءولا بارگاموس ءولا تياتيرا ءولا سارديس ءولا فيلادالفيا ءولا لاوديكيّا.»

¹² گراولغ اد‑ژرغ ما‑د‑سري‑يساولن، س‑ژريغ سّا لّحساكي ن‑وورغ،

¹³ ژرغ غ‑گر لحساكي يان ءيرواس ءي‑بنادم. ءيلسا تشامير ءيغزّيفن، ءيبكيس زغ‑وامّاس‑نس س‑يان‑وبكّاس ن‑وورغ.

¹⁴ ءيملّول‑باهرا‑وازّار‑نس زوند تاضوت ءيصفان نغد ادفل، ار‑د‑سّوفونت‑والّن‑نس زوند ءيسوفا لّعافيت.

¹⁵ ار‑سّمرقيقيين ءيضارن‑نس زوند اناس ءيصفان ءيتياومزاين س‑سّقل. ءيتجهّد‑واوال‑نس زوند ءيجّيج ن‑يسافّن ن‑وامان گّوتنين.

¹⁶ ياسي سّا ن‑يتران غ‑وفوس‑نس افاسي، ءيفّوغ‑د زغ‑يمي‑نس زوند يات تاژّيت ءيمسادن زغ‑سنات‑تسگيو. ءيفاو‑وودم‑نس زوند تافوكت ن‑طوژّونت ن‑واسّ.

¹⁷ غير ژريغ‑ت ضرغ‑ن غ‑دار ءيضارن‑نس زوند ءيغ‑مّوتغ. ءيسرس‑د فلّا افوس‑نس افاسي ييني‑يّي: «اد‑ور‑تيكساطّ. نكّي ا‑يگان امزوارو ءولا امگُّارو،

¹⁸ گغ باب ن‑تودرت. كّيغ‑تّين مّوتغ، والاينّي ها‑يّي دّرغ غيلاد ءولا كولّو مايد‑د‑يفتان. طّافغ تيسورا لّموت ءولا ادغار ن‑ويلّي مّوتنين.

¹⁹ ءيمّا كيّي، ارا مايد تژريت، ما‑يلّان غيلاد ءولا ما‑را‑ييلي تيگيرا.

²⁰ غمكاد ا‑تگا لمعنا ن‑سّا ن‑يتران لّي‑تژريت غ‑وفوس‑ينو افاسي ءولا سّا لّحساكي ن‑وورغ. سّا ن‑يتران‑ان، گان لمالايكا ن‑سّا ن‑يمناگّارن، ءيمّا سّا لّحساكي گانت ءيمناگّارن س‑سّا.