afsus 6 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تاروا د‑ايت‑دارسن

¹ ءيمّا كونّي ا‑تاروا مژّينين راد‑اون‑ينيغ، سكارات س‑واوال ن‑ايت‑دارون غمكلّي ءيرا سيديتنّغ، اشكو ماياد ءيگا لحقّ گيگون.

² ءيتيارا: «اوي‑تّ غ‑باباك د‑ينّاك.» لوصيت‑اد تگا تامزواروت لّي‑ف‑ينّا ربّي را‑يبارك غويلّي سرس سكارنين،

³ اشكو ءيزوويد ءينّا: «باش اد‑اك‑ييلي لخير، تغزّيف تودرت‑نّك ف‑واكال.»

⁴ ءيمّا كونّي ا‑يد‑باباتسن راد‑اون‑ينيغ، ا‑ور‑تسّقلاقالم تاروا‑نّون، والاينّي ربّات‑تن س‑ولمّود ن‑سيديتنّغ ار‑اسن‑تمالام مامنك ا‑س‑سرس‑سكارن.

ءيخدّامن د‑يد‑سيديتسن

⁵ ءيمّا كونّي ا‑يخدّامن راد‑اون‑ينيغ، سكارات س‑واوال ن‑يد‑سيديتون ن‑دّونيت‑اد، ار‑تن‑تّوقّارم ار‑تّادرم ءي‑يخف‑نّون غ‑لگدّام‑نسن. سكارات س‑يواليون‑نسن س‑نّييت ن‑وول‑نّون زوند س‑يواليون لّماسيح.

⁶ ا‑ور‑تسكارم غير باش ا‑كُن‑ژرن مدّن شكرن‑كُن، والاينّي خدمات غمكلّي‑د‑يقّانّ ءيخدّامن لّماسيح، ار‑بدّا‑تسكارم ما‑يرا ربّي س‑نّييت‑نّون.

⁷ خدمات س‑لفرح زوند ءيغد سيديتنّغ ا‑مي‑تّخدامّ ءورد بنادم،

⁸ تيسّانم ءيس‑را‑يرار سيديتنّغ ءي‑كرايگاتّ يان ف‑ما‑يسكار ءيفولكي، ءيگ‑ييت ءيسمگ نغد وين ءيخف‑نس.

⁹ ءيمّا كونّي ا‑يد‑سيديتسن راد‑اون‑ينيغ، سكارات افولكي ءي‑يخدّامن‑نّون بلا‑دا‑تن‑تسّيويدم. اشكو تسّنم ءيس‑يلّا يان غ‑يگنّا، ءيگا سيديتسن ءيگ سيديتون ءولا كونّي، ءور‑ا‑يسكار س‑وودماون.

ءيمقلاد ن‑ربّي

¹⁰ اوال‑ينو ءيگُّران ءيگا‑ت: دوسات غ‑سيديتنّغ س‑تدواست‑نس ءيتجهّدن.

¹¹ اسيات كولّو ءيمقلاد ن‑ربّي باش ا‑تيژضارم ا‑تّضاضّام لحيلات ن‑يبليس.

¹² اشكو ءورد بنادم ا‑د‑نتمّاغ، والاينّي لارواح أُخشنّين ءولا لجنون تجهّدنين ءولا سّولطات ن‑يگنوان ءولا لقوّات ن‑تيلّاس ن‑دّونيت‑اد.

¹³ مايان ا‑ف‑راد‑اون‑ينيغ، اسيات كولّو ءيمقلاد ن‑ربّي، باش ا‑تيژضارم ا‑تبيدّم تزگام غ‑واسّ يُخشنّ، تمّاغم ار ءيسيگُّرا سول تبيدّم.

¹⁴ بيدّات غيلاد تزگام. بكيسات س‑تاگُست ‹لّحقّ›، تگم ءي‑يدمارن‑نّون ابانّك ن‑‹رّضا ن‑ربّي›،

¹⁵ تقّنم ءي‑يضارن‑نّون تورژيّين ن‑‹زّعامت س‑تبرّاحت لّخبار ن‑سّلامت›،

¹⁶ تاسيم تامسنتلت ن‑‹تّيقا غ‑ربّي› لّي‑يژضارن ا‑ن‑فلّاون‑تحصار كولّو ءيژضكان جدّرنين لّي‑س‑ا‑كُن‑يكّات ءيبليس.

¹⁷ گات ف‑يخف‑نّون اسدّول ن‑‹وجنجم›، تامژم غ‑وفوس‑نّون تاژّيت ن‑‹واوال ن‑ربّي› لّي‑اون‑يفكا رّوح لقودوس،

¹⁸ ار‑تّژالّام غ‑كرايگاتّ لوقت غمكلّي‑اون‑يمالا رّوح لقودوس، ار‑تّضالابم ربّي ف‑كرايگاتّ كرا، ترارم لعاقل بلا‑دا‑تّرمايم، ار‑بدّا‑تي‑تّضالبم ا‑يتعاوان كولّو ويلّي ءيژلي اد‑گن وينس.

¹⁹ ضالبات ربّي فلّا ءولا نكّي، اد‑يّي‑يمل ما‑راد‑ينيغ غاكود نّا‑ساوالغ س‑مدّن، باش ا‑تبرّاحغ س‑زّعامت ف‑لخبار ءيفولكين ءي‑ويلّي ءور‑جّو‑فلّاس‑سفلدنين.

²⁰ هاتي غيلاد ‹امازان غ‑يسكراف› اد‑گيغ ف‑سّيبت لّخبار‑اد. ضالبات ربّي ا‑يّي‑يعاون اد‑ساولغ س‑زّعامت غمكلّي‑يّي‑د‑يقّانّ.

²¹ ءيمّا غيلاد، ءوزنغ‑اون‑ين تيخيكوس. ءيگا گماتنّغ ءيعزّان، ءيگ اخدّام ءيفولكين ن‑سيديتنّغ. راد‑اون‑ييني كولّو ف‑مامنك اد‑گيغ ءولا ماد‑سكارغ.

²² ماياد ا‑ف‑اون‑ت‑ين‑وزنغ، باش ا‑تيسّانم مامنك ا‑نگا، ءيزّعام ءولاون‑نّون.

²³ اد‑اون‑تيلي سّلامت اي‑ايتما كولّوكن. ضالبغ ربّي باباتنّغ د‑سيديتنّغ ياسوع لماسيح اد‑اون‑يفك ا‑تّحنّوم ءي‑نگراتون ار‑تّامنم باهرا.

²⁴ ا‑تيلي لباراكا ءي‑كولّو ويلّي ءيتّيرين سيديتنّغ ياسوع لماسيح س‑تايري ءيدومن.