afsus 5 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

ايت‑تيفاوت

¹ ف‑مايان ا‑ف‑راد‑اون‑ينيغ، ضفورات ربّي غ‑ما‑يسكار، غمكلّي ءيلّان ف‑تاروا‑نس عزّانين.

² تحنّوات غ‑كولّو مدّن غمكلّي گينّغ ءيحنّا لماسيح، ءيسرس ءيخف‑نس غ‑لگدّام ن‑ربّي ف‑سّيبت‑نّغ زوند يات‑تغرسي ءيجدّرن س‑توجّوت ءيميمن.

³ والاينّي ا‑ور‑دارون‑ييلي ما‑يادّرن لفساد ءولا شّهوات أُخشنّين ءولا ءيلّا ما‑يساوالن ف‑ما‑يرا ا‑يسّمون ءي‑يخف‑نس. ءور‑يوكُي ءي‑يمژلاين ن‑ربّي اد‑ساوالن س‑غمكان.

⁴ انفات ءي‑يجرمان ءولا تاجمّاعت ءيخوان ءولا تاضصا ف‑ما‑يعيبن. ءور‑تشوي‑تجمّاعت ف‑وان غايان، والاينّي را‑يشوو ءيغ‑ا‑بدّا‑تّشكارم ربّي.

⁵ اشكو ءيقّان‑كُن‑د ا‑تيسّانم ءيس‑ور‑را‑تيلي تاغامت غ‑تگلديت لّماسيح د‑ربّي ءي‑يان ءيتفسادن نغد يان ءيسكارن س‑شّهوات لّي‑أُخشنّين نغد يان ءيتّيرين ا‑يسّمون ما‑يگّوتن ءي‑يخف‑نس. اشكو يان ءيتّيرين ايدا ءيگّوتن، ءيگا زوند ءيغ‑ا‑يتعباد ءيلاهات ن‑دّونيت‑اد.

⁶ ا‑ور‑تادجم يان ا‑كُن‑يجلو س‑يواليون خوانين، اشكو ف‑سّيبت لّخُشانات‑ان ا‑ف‑را‑يضر لغاضاب ن‑ربّي ف‑ويلّي سرس رورنين تيغوردين‑نسن.

⁷ انفات‑بدّا ءي‑مدّن زوند غوين.

⁸ ءولا كونّي تكّام‑تّين تلّام غ‑تيلّاس، ءيمّا غيلاد توورّيم تكشمّ س‑تيفاوت ن‑سيديتنّغ. سكارات غمكلّي‑د‑يقّانّ ايت‑تيفاوت،

⁹ اشكو غ‑تيفاوت ا‑غ‑تلّا‑تمگرا ن‑وفولكي د‑لحقّ د‑كولّو ما‑يرضان ربّي.

¹⁰ سيگّيلات ا‑تيسّانم ما‑يترضون سيديتنّغ.

¹¹ ا‑ور‑تكشمّ غ‑يسكّيرن خوانين ن‑ايت‑تيلّاس‑ان والاينّي شّحشّامات‑تن،

¹² اشكو غايلّي سكارن غ‑تنتلا، ءور‑اكُّ‑نري ا‑ت‑نبدر.

¹³ ءيمّا كولّو ما‑د‑يفّوغن زغ‑تيلّاس س‑تيفاوت را‑د‑يبان غمكلّي ءيگا،

¹⁴ ءولا كرايگاتّ كرا‑غ‑تسفاو تيفاوت را‑يفاو ءولا نتّا. ماياد ا‑ف‑ا‑نتّيني: «فاق، ا‑غوان ءيطّاسن، تنكرد‑د زغ‑لموت اد‑اك‑ييسفيو لماسيح.»

¹⁵ تاويات‑ستّ غ‑يخف‑نّون ا‑بدّا‑تسكارم غمكلّي‑د‑يقّانّ غويلّي سّنّين ما‑يلّان، ءورد زوند غويلّي ءور‑سّينّين يات.

¹⁶ سكارات افولكي نّا‑مي‑توفام كرايگاتّ تاساعت، اشكو ءيگّوت ما‑يُخشنّ غ‑ووسّان‑اد.

¹⁷ ا‑ور‑تجلوم د‑يخف‑نّون والاينّي ژرات ما‑گيگون‑يتّيري ربّي.

¹⁸ ا‑ور‑تسّنوفولم ءيخف‑نّون س‑تيسّي لّي‑يتهلاكن مدّن، والاينّي تعمّارات س‑رّوح لقودوس

¹⁹ ار‑تساوالم ءي‑نگراتون س‑يواليون ن‑يموريگن ن‑ربّي ءولا تاهليلات ءولا تالغاتين نّا‑ياون‑يمالا رّوح لقودوس، ار‑تّيريرم ار‑تّاسيم امارگ ءي‑سيديتنّغ زغ‑وولاون‑نّون،

²⁰ ار‑بدّا‑تّشكارم ربّي باباتنّغ ف‑كرايگاتّ كرا س‑يسم ن‑سيديتنّغ ياسوع لماسيح.

تيمغارين د‑يرگازن

²¹ ءيلّا ف‑كود يان ا‑يسفليد س‑وايّاض. غمكاد ا‑س‑را‑تّوقّارم لماسيح.

²² وا‑تيمغارين، سفليدامت س‑يرگازن‑نّونت غمكلّي تسفليدمت س‑سيديتنّغ.

²³ اشكو ارگاز ءيگا ءيخف ن‑تمغارت، غمكلّي ءيگا لماسيح ءيخف ن‑ومناگّار ن‑ويلّي گانين وينس. ءيگ‑ومناگّار دّات لّماسيح، ءيگ نتّا انجّام‑نس.

²⁴ هاتي ءيلّا ف‑تمغارت ا‑بدّا‑تسفليد س‑ورگاز‑نس غمكلّي ءيسفليد‑ومناگّار س‑لماسيح.

²⁵ ءيمّا كونّي ا‑يرگازن، تحنّوات غ‑تمغارين‑نّون، غمكلّي ءيحنّا لماسيح غ‑ومناگّار ءيفك تودرت‑نس فلّاس

²⁶ باش ا‑ت‑يژلي س‑واوال‑نس، ءيسّغوس‑ت س‑وسيرد ن‑وامان.

²⁷ غمكان ا‑يسكر باش ا‑ت‑ياوي زوند يات‑تسليت ءيفولكين غ‑ور‑تلّي كرا ن‑تركّوت ءولا كرا ن‑ينيضي ءولا كرا ءيگان زوند غايان، باش ا‑زگيس‑يسكر امناگّار امژلاي س‑لمجد ءيگّوتن بلا گيس ءيلّا كرا يُخشنّ.

²⁸ غمكاد ا‑س‑يلّا ف‑ورگاز ا‑يتحنّو غ‑تمغارت‑نس زوند دّات‑نس. اشكو يان ءيتحنّون غ‑تمغارت‑نس، هاتي ءيخف‑نس ا‑غ‑ا‑يتحنّو.

²⁹ ءور‑يلّي ما‑يتكرهون دّات‑نس، والاينّي ار‑تّ‑يشّوشا ار‑تّ‑گيس‑يتاوي. غمكاد ا‑س‑ا‑ستّ‑يتاوي لماسيح غ‑ومناگّار ن‑ويلّي گانين وينس.

³⁰ ءيمّا نكُّني نگا ءيگزمان ن‑دّات‑نس،

³¹ غمكلّي ءيتياران: «مايان ا‑ف‑را‑يفل‑ورگاز باباس د‑ينّاس ءيمون د‑تمغارت‑نس. هاتنين سين راد‑وورّين گن يان.»

³² اوال‑اد تلّا گيس يات لمعنا ءينتلن، اشكو ءيملا‑ياغ ف‑تامونت لّماسيح د‑ومناگّار‑نس.

³³ والاينّي ءيملا‑ياغ‑داغ ءيس‑يلّا ف‑كرايگاتّ يان گيگون ا‑بدّا‑يتحنّو غ‑تمغارت‑نس زوند ءيخف‑نس، ييلي ف‑تمغارت ا‑بدّا‑تسفليد س‑ورگاز‑نس.