afsus 4 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

ءيگزمان ن‑دّات

¹ ءيمّا غيلاد را‑كُن‑ضالبغ باهرا، نكّي‑اد ءيگان احبّاس ف‑يسم ن‑سيديتنّغ. ضالبغ‑كُن ا‑تسكارم غمكلّي ءيلّا ف‑ويلّي ءيژلي ربّي اد‑گن وينس.

² ژّيمژايات ءيخف‑نّون ار‑تّرخوم ار‑تّصبارم ار‑تّحنّوم ءي‑نگراتون.

³ سكارات كولّو باش ا‑بدّا‑تگم يان غ‑تامونت ن‑سّلامت لّي‑س‑كُن‑د‑يسّمون رّوح لقودوس.

⁴ يات‑دّات ا‑تگام، ييلي گيگون يان رّوح، غمكلّي دارون يان رّجا لّي‑مي‑كُن‑يژلي ربّي.

⁵ ييلي يان سيديتون ءولا يان‑وغاراس لّي‑س‑تومنم ءولا يان‑ودوم لّي‑س‑تدّمّ غ‑وامان.

⁶ ييلي يان ربّي باباس ن‑كرايگاتّ يان، ار‑كُن‑يتگابال، ار‑سرون‑يسكار افولكي، ار‑گيگون‑يتباراك كولّوكن.

⁷ كرايگاتّ يان گينّغ، تّياوفكا‑ياس كرا لّباراكا س‑ونشك لّي‑تلّا‑توافكا لّماسيح.

⁸ غمكلّي ءيتياران: «غاكود لّيغ ياتّوي س‑تاتّويت، ياوي ديدس غويلّي ءينرا، ءيفك لباراكات ءي‑مدّن.»

⁹ والاينّي ماد‑اغ‑يملا‑واوال‑اد ‹ياتّوي›؟ ءيملا‑ياغ ف‑لماسيح ءيس‑يگّوز زوار س‑تدروت ن‑واكال.

¹⁰ اشكو غوالّي‑د‑يگّوزن ا‑يگان غوالّي ياتّوين تيگيرا س‑يگّي ن‑يگنوان باش ا‑يكمّل كولّو ما‑يلّان غ‑كرايگاتّ ماني.

¹¹ نتّان ا‑يفكان ءي‑كرا گينّغ اد‑گن ءيرقّاسن‑نس، ءيفك ءي‑وييّاض اد‑ساوالن س‑ماد‑اسن‑يمالا ربّي، ءيفك ءي‑وييّاض اد‑تبرّاحن س‑لخبار ءيفولكين، ءيفك ءي‑وييّاض اد‑تگابالن ار‑سّلمادن مدّن‑نس

¹² باش اد‑يژضارن كولّو ءيمژلاين ن‑ربّي اد‑قاسان تاووري ن‑ربّي ار‑سّدوسن دّات لّماسيح.

¹³ غمكاد ا‑س‑راد‑كولّو‑نتزاياد غ‑وغاراس لّماسيح ارد نوورّي نگ يان، نيسّان يوس ن‑ربّي غمكلّي ءيگا، نوورّي نيمغور زوند لماسيح س‑تموغرا‑نس ءيكمّلن.

¹⁴ ءور‑سول‑را‑نگ زوند تاروا مژّينين، ار‑تن‑يتاوي‑واضو ن‑كرايگاتّ المّود لّجديد، ار‑جلّون س‑لحيلات ن‑يمغضارن لّي‑ستّ‑زّراينين ف‑مدّن س‑تكركاس.

¹⁵ ءيلّا فلّانّغ ا‑نتّيني لحقّ س‑لحنانت، ار‑نتيمغور غ‑تامونت لّماسيح لّي‑يگان ءيخف‑نّغ.

¹⁶ نتّان ا‑يحكامن غ‑دّات ار‑يزدّي ءيگزمان‑نس ار‑تن‑يسّميالّا، كرايگاتّ اگزّوم غ‑يلّيغ ءيرا. غمكاد ا‑س‑را‑تّيمغور دّات ار‑تّدوس س‑لحنانت ءيغ‑ا‑يسكار كرايگاتّ اگزّوم غمكلّي‑ت‑يد‑يقّانّ.

تينباضين ن‑تودرت لّجديد

¹⁷ ءيمّا غيلاد را‑كُن‑وصّاغ س‑يسم ن‑سيديتنّغ، ءينيغ‑اون ا‑ور‑سول‑تسكارم زوند غويلّي ءور‑سّينّين ربّي. نتني جلان‑تن ءيسوينگيمن‑نسن باهرا،

¹⁸ ءيلّاس لعاقل‑نسن. اگّوگن‑ين ف‑تودرت ن‑ربّي، اشكو ءيقّور ءيخف‑نسن ءيقار‑وول‑نسن.

¹⁹ وورّين ءور‑سول‑ا‑تحشامن غ‑يات. ار‑سكارن كولّو ماد‑رانت شّهوات‑نسن، ار‑زّراين ءوسّان‑نسن غ‑ما‑يعيبن، ار‑تّيرين ا‑تزايادن غير غ‑يسكّيرن‑نسن أُخشنّين.

²⁰ ءيمّا كونّي، ءورد غمكان ا‑تلمدم ف‑لماسيح.

²¹ اشكو سّنغ ءيس‑تسفلدم باهرا ف‑ياسوع، تلمدم لحقّ غمكلّي‑ت‑يد‑يسّبايّن نتّا.

²² تلمدم ءيس‑كُن‑يخصّا ا‑تبدّلم زغ‑وگُنس‑نّون، ا‑ور‑سول‑تگم غمكلّي تگام غايد ءيزرين لّيغ تّين‑تكّام ار‑تسكارم ما‑يرا ءيخف‑نّون، تغالم ءيس‑يشوا، ءور‑تسّينم ءيس‑ا‑كُن‑يتاوي س‑لهالاك.

²³ تلمدم ءيس‑كُن‑يخصّا ا‑تادجم ربّي ا‑كُن‑يسكر زغ‑لجديد غ‑كولّو ما‑تّيريم ءولا ما‑تسوينگيمّ،

²⁴ باش ا‑توورّيم تگم مدّن لّجديد. اشكو ءيسكر‑كُن ربّي زغ‑لجديد باش ا‑تفولكيم غمكلّي ءيفولكي نتّا، ار‑تسكارم كولّو ما‑ت‑يترضون.

²⁵ مايان ا‑ف‑راد‑اون‑ينيغ، كّيسات فلّاون كولّو تيكركاس. ءيلّا ف‑كود يان ا‑يساوال د‑گماس س‑لحقّ، اشكو نگا كولّواغ يان غ‑دّات لّماسيح.

²⁶ ءيغ‑تقلاقلم ا‑ور‑تادجم غايان ا‑كُن‑يدحي ارد تسكرم كرا يُخشنّ. سّيتّيات اقلاقال‑ان ءور‑تا‑ن‑تضر تافوكت،

²⁷ باش ا‑ور‑تادجم ءي‑يبليس مانيزغ ا‑ن‑سرون‑يكشم.

²⁸ ءيمّا وانّا ءيگان امخّار، ءيخصّا‑ت ا‑ور‑سول‑يتاكُر. ييلي فلّاس ا‑يگر غ‑كرا ن‑تووري، ءيخدم س‑يفاسّن‑نس غ‑كرا ءيشوان، باش ا‑دارس‑ييلي ما‑ياكّا ءي‑ويلّي ءور‑دار يات.

²⁹ ا‑ور‑تادجم كرا ن‑يواليون أُخشنّين ا‑تكّان ءينفورن‑نّون. ساوالات س‑يواليون شوانين لّي‑را‑يعاون غويلّي سفليدنين غ‑مايلّي حتاجّان، اوين‑اسن‑د لباراكا.

³⁰ ا‑ور‑تّي‑تسّطيّارم ءي‑رّوح لقودوس ن‑ربّي لّي‑اون‑يفكا باش ا‑يگ تاماتارت ن‑يس‑تگام وينس ار‑د‑يروح‑واسّ لّي‑غ‑را‑كُن‑يفوكّو زغ‑دّونيت‑اد.

³¹ ا‑ور‑تّژيم ءولا‑دا‑تّمّاغم ءولا‑دا‑تّكرهوم يان. ا‑ور‑ترگّمّ ءولا‑دا‑تّغوّاتم ءولا‑دا‑تّنوّاشم غ‑يان.

³² ءيلّا فلّاون ا‑تّحنّوم ار‑تّفولكيم ار‑تّصاماحم ءي‑نگراتون غمكلّي‑اون‑يصامح ربّي ف‑سّيبت لّماسيح.