afsus 3 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تاووري ن‑بولُس غ‑گر ايت‑تميزار ياضني

¹ مايان ا‑ف‑ا‑فلّاون‑تضالابغ ربّي، نكّي بولُس لّي‑يگان احبّاس ف‑يسم لّماسيح ياسوع ف‑سّيبت ن‑تووري لّي‑سكارغ غ‑گراتون كونّي ن‑تميزار ياضني.

² ءيس‑ور‑تسفلدم ف‑مامنك اد‑يّي‑يفك ربّي لباراكا‑ياد باش اد‑اون‑تّ‑ين‑سّلكمغ س‑دارون كونّي؟

³ ءيملا‑يّي‑د تاغاوسا‑ياد لّي‑ينتلن كولّو غايد ءيزرين، ءوريغ‑اون‑ين فلّاس كرا غ‑تبرات‑اد.

⁴ ءيغ‑تغرام مايلّي ءوريغ را‑تيسّانم تاغاوسا‑ياد لّماسيح غمكلّي‑ستّ‑فهمغ نكّي.

⁵ ترگس ف‑كولّو تاسوتين لّي‑زرينين، ءيمّا غيلاد ءيسّبايّن‑اغ‑تّ‑يد ربّي س‑تحكيمت ن‑رّوح لقودوس ءي‑غويد ءيژلي اد‑گن ءيرقّاسن‑نس ءولا لانبيا‑نس.

⁶ ءيمل‑اغ‑د لخبار ءيفولكين ن‑يس‑راد‑كشمن ايت‑تميزار ياضني غ‑لباراكات ن‑ايت‑ربّي ءولا غ‑ومناگّار ن‑ويلّي گانين وينس، امژن ءولا نتني كولّو ما‑ينّا ربّي راد‑اغ‑ت‑يفك ف‑وودم لّماسيح ياسوع.

⁷ ءيبارك‑يّي ربّي ءيفك‑يّي اد‑سكارغ تاووري‑اد لّخبار ءيفولكين س‑تحكيمت‑نس ءيتجهّدن لّي‑گيگي‑يلّان.

⁸ واخّا مژّيغ باهرا غ‑گر كولّو ءيمژلاين ن‑ربّي، ءيفكا‑يّي لباراكا‑ياد اد‑تبرّاحغ ءي‑ايت‑تميزار ن‑دّونيت ف‑تميخار لّماسيح لّي‑وگُرنين كولّو ءيسوينگيمن ن‑بنادم.

⁹ ءيفك‑يّي اد‑مالاغ ءي‑كولّو مدّن تاغاوسا‑ياد ءيهيّان لّي‑فلّاسن‑ينتلن كولّو غايد ءيزرين، ءيقصاد‑ستّ ربّي لّي‑يخلقن كولّو ما‑يلّان.

¹⁰ اشكو غيلاد ف‑وفوس ن‑ومناگّار ن‑يمژلاين‑نس ا‑ف‑يرا ربّي ا‑يسّبايّن ءي‑سّولطات ءولا لقوّات ن‑يگنوان منشك ا‑باهرا‑تگّوت‑تحكيمت‑نس

¹¹ لّي‑س‑يكمّل ف‑وفوس لّماسيح ياسوع سيديتنّغ مايلّي ءيقصاد زغ‑يسيزوار.

¹² ف‑سّيبت ن‑ما‑يسكر لماسيح ءولا ف‑سّيبت ن‑ما‑سرس‑نومن ا‑ف‑نژضار ا‑ن‑ناكمور س‑ربّي غيلاد بلا‑دا‑نتحشام ءولا‑دا‑نتيكساض.

¹³ ف‑مايان ا‑ف‑راد‑اون‑ينيغ، ا‑كُن‑ور‑تيگُراژ ف‑ورفوفن‑اد غ‑ا‑زرايغ ف‑سّيبت‑نّون، اشكو ار‑ت‑زّرايغ باش اد‑اون‑يگ لخير كونّي.

لحنانت لّماسيح

¹⁴ مايان ا‑ف‑ضرغ ف‑يفادّن‑ينو غ‑لگدّام ن‑ربّي باباتنّغ.

¹⁵ نتّان ا‑يفكان ءيسم‑اد‑نس ‹باباتنّغ› ءي‑كولّو‑وينّا دار تاروا غ‑يگنّا ءولا غ‑دّونيت.

¹⁶ ضالبغ‑ت اد‑اون‑ياكّا زغ‑تميخار لّمجد‑نس، ءيسّدوس‑كُن غ‑وگُنس‑نّون س‑تحكيمت ءيتجهّدن ن‑رّوح‑نس،

¹⁷ باش ا‑يزدغ لماسيح غ‑وول‑نّون غمكلّي سرس تومنم. ضالبغ‑ت ا‑كُن‑يژّو غ‑لحنانت ءيزّگا‑كُن گيس،

¹⁸ باش ا‑تيژضارم ا‑تفهمّ، كونّي ءولا كولّو ءيمژلاين ن‑ربّي، منشك ا‑س‑توسعا تيغزّيف تاتّوي تدرو لحنانت لّماسيح،

¹⁹ تسّحسّوم غ‑وول‑نّون س‑لحنانت‑نس لّي‑باهرا‑يوگُرن تاواسّنا ن‑بنادم، ارد توورّيم تعمّرم كولّو س‑وفولكي ن‑ربّي.

²⁰ ءيمّا غيلاد ا‑نالغ ربّي لّي‑يژضارن ا‑يسكر ءوگُّار ن‑كولّو ما‑نضالب ءولا كولّو ما‑نسوينگيم س‑تحكيمت‑نس ءيتجهّدن لّي‑گينّغ‑يلّان.

²¹ اد‑اس‑ييلي لمجد غ‑ومناگّار ءولا غ‑لماسيح ياسوع غ‑كود تاسوت ن‑تاسوتين، غيلاد ءولا كولّو مايد‑د‑يفتان، امين.