afsus 2 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

لموت ءولا تودرت

¹ ءيمّا كونّي غايد ءيزرين تگام زوند ءيغ‑تمّوتم ءي‑ما‑يگان وين ربّي، ف‑سّيبت ن‑دّنوب‑نّون ءولا كولّو ما‑تسكارم يُخشن.

² تكّام‑تّين ار‑تّيدوم غ‑وغاراس ن‑دّونيت‑اد، ار‑تّضفارم لقوّا يُخشنّ لّي‑يتجهّدن غ‑يگنوان. تگا رّوح لّي‑يتحكامن غيلاد غ‑غويلّي ءور‑سفليدنين س‑ربّي.

³ نكّا‑تّين كولّواغ ار‑ديدسن‑نتّيدو غ‑وغاراس‑ان ار‑نسكار س‑كولّو ما‑يرا بنادم ءي‑يخف‑نس ار‑تّ‑نتاوي غير غ‑يسوينگيمن‑نّغ ءولا شّهوات‑نّغ. ءولا نكُّني غ‑ووسّان‑ان، ءيلّا فلّانّغ لغاضاب ن‑ربّي زوند كولّو مدّن.

⁴ ءيمّا ربّي، تگّوت دارس رّحمت، ءيحنّو گينّغ س‑لحنانت‑نس ءيگّوتن،

⁵ ءيسّدّر‑اغ د‑لماسيح غاكود لّيغ سول نمّوت غ‑دّنوب‑نّغ. هاتي س‑لحنانت ن‑ربّي ا‑س‑تنجمّ.

⁶ ءيسّنكر‑اغ‑د يالّ‑اغ د‑لماسيح ياسوع، ءيسّگاور‑اغ ديدس غ‑تگلديت ن‑يگنّا،

⁷ باش ا‑يمل، غيلاد ءولا كولّو مايد‑د‑يفتان، منشك ا‑س‑باهرا‑تگّوت لحنانت‑نس لّي‑س‑اغ‑يبارك ف‑سّيبت لّماسيح ياسوع.

⁸ هاتي ف‑لحنانت‑نس ا‑ف‑تنجمّ لّيغ سرس تومنم. ءورد ف‑سّيبت ن‑كرا تسكارم كونّي، والاينّي تگا تاوافكا ءيفكا‑ياون‑تّ ربّي.

⁹ ءورد ف‑سّيبت ن‑يفولكيتن‑نّون، باش ا‑ور‑يالغ يان ءيخف‑نس.

¹⁰ اشكو ربّي اد‑اغ‑يسكرن غمكان، ءيگ‑اغ د‑وين لماسيح ياسوع باش ا‑نتناوال ءيفولكيتن لّي‑اغ‑زوار‑يجّوجاد ا‑تن‑نسكار.

سّلامت لّي‑اغ‑يسكر لماسيح

¹¹ سوينگيماد‑د ما‑تگام غايد ءيزرين، كونّي لّي‑ور‑يگين زغ‑ايت‑ربّي. ار‑اون‑تّينين ‹غويلّي ءور‑ژّولّينين› اشكو ءور‑ا‑تّژالّام ءي‑دّات‑نّون زوند نتني.

¹² ءور‑تا‑تسّينم لماسيح غ‑ووسّان‑ان، تيليم غ‑برّا ن‑ايت‑ربّي لّي‑يژلي اد‑گن مدّن‑نس. ءور‑دارون تاغامت غ‑يد‑لعهد لّي‑س‑ا‑ياسن‑يمالا ما‑راد‑اسن‑يسكر. ءور‑دارون رّجا، ءولا تسّنم ربّي غ‑دّونيت.

¹³ ءيمّا غيلاد ءيسّاكمور‑كُن‑د س‑دارس ف‑سّيبت لّموت لّماسيح ياسوع، كونّي لّي‑ستّين ءيكّان تاگّوگم‑ن.

¹⁴ اشكو ءيسكر لماسيح سّلامت غ‑گر ايت‑ربّي د‑ايت‑تميزار ياضني، ءيرار سين اد‑گن يان، ءيسّضر اغُراب ن‑تاژيت لّي‑تن‑يسّنگاران.

¹⁵ ءيسّيتّي شّرع س‑لوصيّات‑نس ءولا لفرايض‑نس، باش ا‑يسّمون سين‑اد س‑سّلامت، ءيسكر زغ‑گيسن يات تاسوت لّجديد لّي‑را‑يگ تينس.

¹⁶ غمكان ا‑س‑يسكر سّلامت غ‑گراتنّغ كولّواغ د‑ربّي س‑لموت‑نس ف‑وگّجدي، ا‑ور‑سول‑تيلي تاژيت ءي‑نگراتنّغ.

¹⁷ لّيغ‑د‑يوشكا لماسيح ياوي‑د لخبار ن‑سّلامت ءي‑كونّي لّي‑ن‑اگّوگنين، والا ءي‑نكُّني لّي‑سرس‑اكمورنين.

¹⁸ ف‑سّيبت لّماسيح ا‑ف‑نژضار غيلاد ا‑كولّو‑نكشم س‑دار ربّي باباتنّغ س‑يان‑رّوح لّي‑گينّغ‑يلّان كولّواغ.

¹⁹ ءور‑سول‑تگيم ءيبرّانيين ءولا ءيغريبن، اشكو تطّافم ءولا كونّي غيلاد تاغامت غ‑گر ءيمژلاين ن‑ربّي، تگم زغ‑ايت‑تگمّي ن‑ربّي

²⁰ لّي‑يبنّو ف‑لّساس ن‑يرقّاسن د‑لانبيا، ءيگ لماسيح ياسوع اژرو ءيمقّورن ن‑وغژو.

²¹ نتّان ا‑د‑يسّمونّ ءيژران، ار‑سرسن‑يبنّو يات‑تگمّي ن‑تژالّيت تّياوژلاي ءي‑سيديتنّغ.

²² ءولا كونّي ار‑سرون‑يبنّو باش ا‑كولّو‑نگ يات‑تگمّي، ءيزدغ گيس رّوح ن‑ربّي.