afsus 1 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ زغ‑بولُس ارقّاس لّماسيح ياسوع غمكلّي ءيرا ربّي. ءي‑يمژلاين ن‑ربّي غ‑تمدينت ن‑افسوس لّي‑زگانين غ‑وغاراس لّماسيح ياسوع.

² اد‑اون‑تيلي لباراكا د‑سّلامت زغ‑ربّي باباتنّغ د‑سيديتنّغ ياسوع لماسيح.

لباراكات لّي‑س‑اغ‑يبارك ربّي

³ ار‑باهرا‑نتالغ ربّي باباس ن‑سيديتنّغ ياسوع لماسيح، اشكو ءيبارك‑اغ ف‑وودم لّماسيح س‑كولّو لباراكات ن‑رّوح لّي‑لّانين غ‑تگلديت ن‑يگنّا.

⁴ لّيغ ءور‑تا‑يخلق دّونيت، ءيژلي‑اغ د‑لماسيح باش ا‑نگ وينس، نغوس غ‑يژري‑نس زغ‑كولّو ما‑يگان لعيب. ءيحنّو گينّغ

⁵ ءيقصاد اد‑اغ‑يگ د‑تاروا‑نس ف‑وودم ن‑ياسوع لماسيح. غمكان ا‑يرا، ءيرضو سرس.

⁶ ار‑ت‑باهرا‑نتالغ ف‑لحنانت‑اد ءيگّوتن لّي‑س‑اغ‑يبارك ف‑وودم ن‑يوس ءيعزّان

⁷ لّي‑اغ‑يفران زغ‑لهالاك س‑يدامّن‑نس، ءيسّيتّي فلّانّغ دّنوب‑نّغ. ماتّا غونشكاد س‑تگّوت لحنانت ن‑ربّي لّي‑س‑اغ‑يبارك،

⁸ ءولا تاواسّنا‑ياد د‑تحكيمت‑اد لّي‑اغ‑د‑يسّبايّن.

⁹ اشكو ءيسّبايّن‑اغ‑د تاغاوسا‑ياد ءينتلن، ءيمل‑اغ‑د ما‑يرا ا‑يسكر ءيرضو سرس ءيقصاد‑ت ف‑وفوس لّماسيح،

¹⁰ ييري ا‑ت‑يسّافو غ‑يسيگُّرا ن‑دّونيت. هاتي را‑يسّمون كولّو ما‑يلّان غ‑يگنّا ءولا غ‑دّونيت، ءيگ‑ت كولّو غ‑دّو‑وفوس لّماسيح.

¹¹ ربّي ءيژلي‑اغ د‑لماسيح ءولا نكُّني باش ا‑نگ مدّن‑نس، غمكلّي ءيقصاد نتّان لّي‑بدّا‑يسكارن ما‑يرا غ‑كولّو ما‑يجرّون.

¹² ءيژلي‑اغ باش ا‑د‑گينّغ‑يبان لمجد‑نس، نكُّني لّي‑يزوارن ءيس‑ن‑نگا رّجا‑نّغ غ‑لماسيح.

¹³ ءولا كونّي، توورّيم تگام وينس لّيغ‑كُن‑ين‑يلكم‑واوال لّحقّ، ا‑ت‑يگان د‑لخبار ءيفولكين لّي‑س‑تنجمّ. لّيغ تومنم س‑لماسيح ءيتياوفكا‑ياون رّوح لقودوس لّي‑ف‑ينّا ربّي را‑ت‑يفك ءي‑مدّن‑نس، باش ا‑تيسّانم ءيزد وينس ا‑تگام.

¹⁴ ءيگا تاماتارت ن‑يس‑را‑يسّافو ربّي كولّو تيميخار لّي‑ف‑ينّا را‑تنت‑يفك ءي‑مدّن‑نس. ماتّا غونشكاد س‑يگّوت لمجد ن‑ربّي، ار‑ت‑نتالغ باهرا.

بولُس ءيضالب ربّي ا‑يبارك ايت‑افسوس

^15-16 ف‑ماياد ا‑ف‑ا‑بدّا‑فلّاون‑تشكارغ ربّي، اشكو سفلدغ ف‑مامنك ا‑تومنم س‑سيديتنّغ ياسوع، عزّان دارون ءيمژلاين ن‑ربّي كولّوتن. غاكود نّا‑تژالّاغ ار‑كُن‑د‑سوينگيمغ،

¹⁷ ار‑تضالابغ باباتنّغ ءيمقّورن لّي‑يگان ربّي ن‑سيديتنّغ ياسوع لماسيح اد‑اون‑ياكّا رّوح ن‑تحكيمت د‑تواسّنا باش ا‑تي‑تيسّانم غمكلّي ءيگا.

¹⁸ ار‑تي‑تضالابغ ا‑يرژم الّن لّعاقل‑نّون، باش ا‑تيسّانم ما‑يگا رّجا‑ياد ءيصحان لّي‑مي‑كُن‑يژلي، ءولا لباراكات گّوتنين لّي‑را‑يفك ءي‑يمژلاين‑نس،

¹⁹ ءولا تاحكيمت‑نس لّي‑باهرا‑گينّغ‑يتجهّدن نكُّني لّي‑سرس‑يومنّ. اشكو تاحكيمت لّي‑گينّغ‑يلّان، تگا‑ت‑تحكيمت ءيتجهّدن

²⁰ لّي‑س‑د‑يسّنكر لماسيح زغ‑لموت، ءيسّگاور‑ت ف‑وفاسيي‑نس غ‑تاتّويت ن‑تگلديت ن‑يگنّا

²¹ ف‑وفلّا ن‑كولّو لمالايكا ءولا لارواح ءولا سّولطات ءولا لقوّات، ءيگ ءيسم‑نس ف‑وفلّا ن‑كرايگاتّ ءيسم غ‑دّونيت ءولا ليخرت.

²² ءيگ‑ت د‑وگايّو ف‑كولّو ما‑يلّان، ءيسرس كولّو ما‑يلّان غ‑دّو ءيضارن‑نس س‑لخير ن‑ومناگّار ن‑ويلّي گانين وينس.

²³ امناگّار ءيگا دّات لّماسيح، د‑نتّان ا‑غ‑ا‑يتكمّال لماسيح لّي‑يتكمّالن كولّو ما‑يلّان غ‑كرايگاتّ ماني.