2 timutaws 4 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

مايلّي‑د‑يقّانّ اخدّام ن‑ربّي

¹ را‑ك‑وصّاغ غيلاد غ‑لگدّام ن‑ربّي د‑لماسيح ياسوع لّي‑را‑د‑ياشك ا‑يكشم س‑تگلديت‑نس يوت لحوكم ف‑ويلّي دّرنين ءولا غويلّي مّوتنين.

² ءينيغ‑اك: تبرّاح س‑واوال ن‑ربّي، تبرّحت سرس غ‑وزمز ءيشقان ءولا واد ءيرخان. رار‑د وينّا فّوغنين اغاراس، تشّحشّمت‑تن ف‑دّنوب نّا‑سكارن، تزّعامت‑تن ف‑وفولكي، ار‑تسّلمادت بلا‑دا‑تّرمايت.

³ هان راد‑د‑اشكين كرا ن‑ووسّان غ‑ور‑راد‑سفليدن مدّن س‑ولمّود يُغژانّ. راد‑ترضون ءيگويّا‑نسن ار‑سّيگاتن ءي‑يخف‑نسن ءيمسلمدن لّي‑راد‑اسن‑يتّيني ما‑تن‑يعجبن.

⁴ ءور‑راد‑يرين اد‑سفلدن س‑لحقّ، والاينّي را‑ستّي‑تاوين غير غ‑تحاجيّين خوانين.

⁵ ءيمّا كيّي ءيخصّا‑ك ا‑بدّا‑تغويت غ‑يخف‑نّك، تصبرت ءي‑ترفوفنت، ار‑تّخدامت س‑تبرّاحت لّخبار ءيفولكين. سكار كولّو ما‑د‑يقّانّ واد ءيگان اخدّام ن‑ربّي.

⁶ ءيمّا نكّي، تلكم‑د تاساعت لّي‑غ‑را‑ن‑سرسغ تودرت‑ينو غ‑لگدّام ن‑ربّي، فّوغّ دّونيت‑اد.

⁷ ها‑يّي نريغ تيكرّايين لّي‑كّاتغ، كمّلغ اغاراس لّي‑غ‑ا‑تازّالغ، سول زگاغ غ‑ليمان.

⁸ راد‑يّي‑ييلي تّاج غيلاد ن‑يان ءيرضان ربّي. ءيحضا‑يّي‑ت سيديتنّغ لّي‑بدّا‑يحكامن س‑لحقّ، باش اد‑يّي‑ت‑يفك غ‑واسّ لّي‑غ‑را‑د‑ياشك. ءورد غير نكّي ا‑مي‑را‑ييلي، والاينّي را‑ت‑يفك ءي‑كولّو ويلّي‑ن‑گيس‑رجانين ار‑سرس‑تقلن.

لاخبار ن‑ايتماتن

⁹ گ‑ن تيقّي‑نّك ا‑د‑داري‑تاشكت غ‑مايد‑د‑ياكمورن.

¹⁰ اشكو ءيفل‑يّي ضيماص ءيدّو س‑تمدينت ن‑تاسالونيكي، يوورّي ار‑يتّيري تيغاوسيوين ن‑دّونيت‑اد. ءيدّو ءولا كريسكينس س‑تمازيرت ن‑گالاطيّا، ءيدّو تيطوس س‑تمازيرت ن‑دالماطيّا.

¹¹ غير لوقا ا‑ديدي‑يقامان. ريغ ا‑تزريت دار مارقُس تاويت‑ت‑يد ديدك، اشكو ءيژضار ا‑يّي‑يعاون غ‑تووري.

¹² ءيمّا تيخيكوس ءوزنغ‑ت س‑افسوس.

¹³ ءيغ‑دي‑توشكيت تاويت‑يّي‑د اسلهام لّي‑ن‑فلغ غ‑دار كاربوس غ‑تمدينت ن‑تروّاس. تاويد‑د ءولا ارّاتن، ريغ باهرا غويلّي گانين وين ءيلم.

¹⁴ كيگان د‑لخُشانت اد‑يّي‑يسكر ءيسكاندر لمعلّم ن‑واناس. راد‑اس‑يرار سيديتنّغ ف‑غايان.

¹⁵ ءيخصّا‑ك ا‑زگيس‑ترارت لعاقل ءولا كيّي، اشكو ءيضاضّ المّود‑نّغ باهرا.

¹⁶ تاوالا تامزواروت غ‑رورغ اوال ف‑وصراض‑نسن، ءور‑ديدي‑يبيدّ يان. فلن‑يّي كولّوتن. ا‑ور‑تن‑يحاسب ربّي ف‑مايان.

¹⁷ والاينّي ءيبيدّ ديدي سيديتنّغ، ءيسّدوس‑يّي اد‑اسن‑تبرّاحغ س‑لخبار ءيفولكين غمكلّي ءيگا. سفلدن‑اس ءيبرّانيين كولّوتن، نجمغ نكّي زغ‑يمي ن‑ييزم.

¹⁸ را‑يّي‑يجّنجم سيديتنّغ زغ‑كولّو ما‑يُخشنّ، ءيسّروح‑يّي‑ن غ‑لامان س‑تگلديت‑نس ن‑يگنّا. نتّان ا‑باهرا‑نتالغ غيلاد ءولا كولّو مايد‑د‑يفتان. امين.

¹⁹ ار‑ن‑تسلّامغ ف‑بريسكيلّا د‑اكيلا، نتني د‑ايت‑تگمّي ن‑ونيسيفوروس.

²⁰ ءيقاما اراستوس غ‑تمدينت ن‑كورينتوس، ءيمّا تروفيموس، فلغ‑ت‑ين يوضن غ‑ميليتوس.

²¹ گ‑ن تيقّي‑نّك ا‑دي‑تاشكت ءور‑تا‑دي‑تلكيم‑تگرست. ار‑ن‑فلّاك‑يتسلّام يوبولُس د‑بودينس د‑لينوس د‑كلوديا د‑ايتماتن ياضني كولّوتن.

²² ا‑ن‑ديدك‑ييلي سيديتنّغ، تيلي‑اون لباراكا‑نس.