2 timutaws 3 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

ءيزماز شقانين

¹ سوانگم‑د ماياد: غ‑ووسّان گُّرانين راد‑يلين ءيزماز شقانين.

² اشكو راد‑تسالان مدّن غير ءيخفاون‑نسن ار‑تسالان ءيقاريدن، ار‑تالغن ار‑سّيمغورن اگايّو‑نسن ار‑رگّمن وييّاض. ءور‑راد‑سفليدن س‑ايت‑دارسن ءولا‑دا‑تشكارن يان ءولا‑دا‑تّيرين ربّي.

³ ءور‑راد‑تحوبّون ءولا‑دا‑تصاماحن ءي‑يان، والاينّي راد‑باهرا‑رگّمن غ‑وييّاض ار‑تژين ار‑تمّاغن ار‑تكرهون كولّو ما‑يفولكين.

⁴ ءور‑راد‑زگان غ‑واوال‑نسن ءولا‑دا‑تنباضن غ‑يخف‑نسن، والاينّي راد‑تحگارن وييّاض. راد‑تلهون س‑كولّو ما‑تن‑يعجبن، ءور‑را‑تلهون س‑ما‑يرا ربّي.

⁵ راد‑ينين ءيزد ءيمومنّ اد‑گان، والاينّي ءور‑گيسن‑تلّي‑تحكيمت ءيتجهّدن ن‑ويلّي ءومنّين س‑ربّي. تانف ءي‑مدّن‑ان.

⁶ وان غويد ا‑يكشّمن س‑تگُمّا زوند ءينگُمارن، ار‑تّ‑زّراين ف‑تمغارين لّي‑ور دار لعاقل، ژّاين فلّاسنت دّنوب‑نسنت، ار‑تنت‑يتاوي كولّو كرا تّيرينت.

⁷ وان نتنتي ار‑بدّا‑تلمادنت والاينّي ءور‑جّو‑ژضارنت اد‑يسّانّت لحقّ.

⁸ هان مدّن‑ان ءيهرش لعاقل‑نسن، فّوغن اغاراس ن‑ربّي، ار‑تضاضّان لحقّ غمكلّي ستّين ءيكّا يانّيس د‑يامبريس ار‑تضاضّان موسا.

⁹ والاينّي ءور‑راد‑باهرا‑تزايادن غ‑غايان، اشكو را‑يبان ءي‑كولّو مدّن ءيس‑فّوغن ءيخف‑نسن غمكلّي ءيبان غ‑سين ءيرگازن‑ان.

ارّاتن ن‑ربّي د‑ولمّود يُغژانّ

¹⁰ ءيمّا كيّي، تسّنت ماد‑سّلمادغ ءولا مامنك اد‑سكارغ ءولا ماد‑قصادغ. تيسّانت مامنك اد‑تامنغ اوال ن‑ربّي ار‑تصبارغ ار‑تحنّوغ ار‑تزايادغ بلا‑دا‑ترمايغ.

¹¹ تيسّانت منشك اد‑ترفوفونغ ار‑باهرا‑كّاتغ تامّارا. تسفلدت ف‑ماد‑يّي‑يجران غ‑تمدينين ن‑انطاكيّا د‑يقونيّا د‑ليسترا. تسفلدت ف‑ترفوفنت ءيگّوتن لّي‑فلّا‑يزرين. والاينّي كولّو غايان، ءيفوكّا‑يّي سيديتنّغ زغ‑گيس.

¹² اشكو كولّو وانّا ءيران ا‑يسكار ما‑يرضان ربّي س‑يسم لّماسيح ياسوع، تارفوفنت ا‑غ‑را‑يزري.

¹³ ءيمّا مدّن أُخشنّين د‑ايت‑تكركاس راد‑غير‑تزايادن غ‑لخُشانت‑نسن س‑وگُّار، جلان نتني ار‑جلّون وييّاض.

¹⁴ ءيمّا كيّي، ءيقّان‑ك‑يد ا‑تّزايادت غ‑مايلّي تلمدت تامنت سرس، اشكو تسّنت مانوي‑ت دار تلمدت.

¹⁵ كيّي زغ‑مژّيي‑نّك ا‑زغ‑تسّنت ارّاتن ن‑ربّي لّي‑ژضارنين ا‑ك‑سّفهمن مامنك ا‑تامنت س‑لماسيح ياسوع تنجمت.

¹⁶ هاتي كولّو ما‑يلّان غ‑وارّاتن‑اد، ربّي ا‑ت‑يد‑يسّبايّنّ. ءيشوا كولّو ا‑سرس‑نسّلماد لحقّ، نشّحشّم وانّا ءيسكرن ما‑يُخشنّ، نرار‑د وانّا ءيجلان، نمل مامنك ا‑نسكار افولكي لّي‑س‑يرضا ربّي.

¹⁷ غمكاد ا‑س‑را‑يوجاد‑وخدّام ن‑ربّي ءي‑تووري‑نس، ييژضار ا‑يسكار كولّو ما‑يفولكين.