2 timutaws 2 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

اعسكري ءيفولكين لّماسيح

¹ زايد ا‑يوي، ار‑تّدوست س‑لباراكا لّماسيح ياسوع.

² مايلّي مي زگيگي تسفليدت غ‑گر ءيناگان گّوتنين، اكّا‑ت غ‑گر ءيفاسّن ن‑مدّن زگانين ژضارن اد‑سّلمادن وييّاض.

³ بكيس ار‑ديدنّغ‑تّرفوفونت زوند اعسكري ءيفولكين لّماسيح ياسوع.

⁴ يان ءيگان اعسكري غ‑يميغ ءور‑را‑يلهو ءيخف‑نس س‑تغاوسيوين ياضني ن‑دّونيت‑اد، اشكو را‑ييري ا‑يترضو انمغور‑نس.

⁵ ءولا يان ءيسكرن شالا ن‑تيزّلا، ءور‑راد‑اس‑ييلي تّاج ن‑ومزوارو ابلا ءيغ‑يسكر س‑ليمور ن‑تيزّلا.

⁶ افلّاح لّي‑يتخدامن س‑نّييت، نتّان ا‑يستهلّان ا‑ياسي تاغامت تامزواروت غ‑تمگرا.

⁷ سوانگم غ‑مايد‑اك‑نّيغ، را‑ك‑يسّفهم سيديتنّغ كولّو ماياد.

⁸ سوانگم‑د ياسوع لماسيح. ءيگا زغ‑تاسوت ن‑وگلّيد داود، ءينكر‑د زغ‑لموت، غمكلّي ءيتّيني لخبار ءيفولكين لّي‑س‑ا‑تبرّاحغ.

⁹ هاتي ف‑سّيبت لّخبار‑اد ا‑ف‑ا‑ترفوفونغ، قّنغ س‑سّناسل زوند يان ءيفّوغن لقانون. والاينّي ءور‑اكُّ‑يقّين‑واوال ن‑ربّي س‑سّناسل.

¹⁰ ماياد ا‑ف‑ا‑كولّو‑تصبارغ، باش اد‑تنجامن ءيمژلاين ن‑ربّي ف‑وودم لّماسيح ياسوع، كشمن س‑لمجد ءيدومن.

¹¹ ءيزگا‑واوال‑اد: «ءيغ‑ديدس‑نمّوت را‑ديدس‑ندّر.

¹² ءيغ‑ا‑نتصبار را‑ديدس‑نتحكام. ءيغ‑ننّا ءور‑ت‑نسّين را‑ييني ءور‑اغ‑يسّين.

¹³ ءيغ‑ندّا ار ءيغ‑ور‑سول‑ا‑گيس‑نتامژ، راد‑بدّا‑گينّغ‑يامژ، اشكو ءور‑يژضار ا‑يسّكاركس ف‑يخف‑نس.»

اروكو ءيصلحن ءيغوس

¹⁴ سّكتاي‑اسن‑د كولّو ماياد، تامرت‑تن غ‑لگدّام ن‑ربّي اد‑ور‑تمجاحادن ف‑يواليون، اشكو ءيمجاحادن ءور‑ا‑تنفاعن ءي‑يات. ار‑غير‑تهلاكن غويلّي‑اسن‑سفليدنين.

¹⁵ گ‑ن تيقّي‑نّك اد‑اون‑يفك ربّي رّضا‑نس، زوند اخدّام ءيشوان ءور‑تي‑تشّحشّيم‑تووري لّي‑يسكر، ار‑تسّلمادت اوال لّحقّ غمكلّي ءيگا.

¹⁶ انف ءي‑تجمّاعت ءيخوان ن‑ويلّي ءور‑سّينّين ربّي، اشكو ار‑غير‑تسّاگّوگ مدّن زغ‑ربّي س‑وگُّار.

¹⁷ هان المّود‑نسن ءيگا زوند اطّان لّي‑يشتّان دّات ن‑بنادم. زغ‑گيسن هيمينايوس د‑فيليتوس،

¹⁸ جلان نتني زغ‑وغاراس لّحقّ، ار‑تراران ءولا وييّاض ا‑ور‑سول‑امنّ. ار‑تّينين ءور‑راد‑نكرن مدّن غ‑ليخرت والاينّي غير غ‑دّونيت‑اد ا‑غ‑د‑نكرن.

¹⁹ والاينّي ءيدوس لّساس لّي‑يزّوگز ربّي ءور‑ا‑يتموسّو، ءيتيارا گيس: «سيدي ربّي ءيسّن مانوي گانين وينس.» ءيتيارا‑داغ: «وانّا ءينّان وين سيدي ربّي ا‑يگا، ءيقّان‑ت‑يد ا‑ياگّوگ ف‑كولّو ما‑يُخشنّ.»

²⁰ گّوتن ءيروكوتن غ‑تگمّي ءيمقّورن. ءيلّا گيسن ما‑يگان وين‑وورغ ءولا نّوقرت، ييلي گيسن ما‑يگان وين‑وكشّوض ءولا اكال. ييلي گيسن ما‑يگان ءي‑ومشّو ءولا ما‑يگان ءي‑وارّاس.

²¹ ءيغ‑يسيرد يان ءول‑نس زغ‑يركان، را‑يگ اروكو ءيصلحن ءيغوس غ‑وفوس ن‑سيديس، يوجاد ءي‑تووري نّا‑يفولكين.

²² اگّوگ زغ‑شّهوات ن‑يعيّالن، تيريت ا‑تعمّرت س‑وفولكي لّي‑س‑يرضا ربّي ار‑تّامنت اوال‑نس ار‑تّحنّوت غ‑وييّاض ار‑تزرايت س‑سّلامت، كيّي ءولا كولّو وينّا اقرانين ءي‑سيديتنّغ س‑وول ءيغوسن.

²³ ا‑ور‑تكشمت غ‑يمجاحادن خوانين ن‑ويلّي ءور‑فهيمنين ما‑ف‑ا‑ساوالن، اشكو تسّنت ءيس‑ور‑ا‑دي‑تاوين غير تاژيت.

²⁴ ءيقّان‑د اخدّام ن‑سيديتنّغ ا‑ور‑يتژي. ءيلّا فلّاس ا‑يتفولكي د‑كولّو مدّن، ييسّان مامنك ا‑تن‑يسّلماد ار‑يتصبار ءي‑كولّو ما‑يشقان.

²⁵ س‑لحنانت ا‑س‑را‑يمالا لحقّ ءي‑وينّا‑ت‑ضاضّنين، ءيرجو‑ن غ‑ربّي اد‑اسن‑يرار اد‑فلن كولّو ما‑يُخشنّ وورّين ءيسّانّ لحقّ،

²⁶ نجمن س‑لمعقول زغ‑تژقّورت ن‑يبليس لّي‑تن‑يغوين باش اد‑سكارن ما‑يرا.