2 timutaws 1 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ زغ‑بولُس ارقّاس لّماسيح ياسوع غمكلّي ءيرا ربّي، س‑ترقّاست ن‑تودرت لّجديد لّي‑ف‑ينّا را‑ستّ‑يفك ءي‑ويلّي گانين وين لماسيح ياسوع.

² ءي‑يوي ءيعزّان تيموتاوس. اد‑اك‑تيلي لباراكا د‑رّحمت د‑سّلامت زغ‑ربّي باباتنّغ د‑لماسيح ياسوع سيديتنّغ.

لامانت ءيفولكين ن‑ربّي

³ ار‑تشكارغ ربّي لّي‑مي‑تخدامغ س‑وول ءيغوسن زوند ءيمزوورا‑نو لّي‑زرينين. ار‑ك‑يد‑سوينگيمغ غاكود نّا‑تژالّاغ غ‑ييض ءولا ازال.

⁴ سوانگمغ‑د ءيمطّاون‑نّك، ءيريغ باهرا ا‑ك‑ژرغ اد‑يّي‑ييلي لفرح ءيگّوتن.

⁵ ءور‑تّوغ مامنك ا‑تومنت س‑لماسيح س‑نّييت‑نّك، غمكلّي تومن جدّاك لووّيس غ‑يسيزوار، نتّات د‑ينّاك افنيكي. سّنغ ءيس‑تومنت ءولا كيّي غيلاد زوند نتنتي.

⁶ مايان ا‑ف‑را‑ك‑ضالبغ ا‑تصوطّ ءي‑ترگيت لّباراكا لّي‑گيك‑يگا ربّي لّيغ فلّاك سرسغ ءيفاسّن‑ينو.

⁷ اشكو رّوح لّي‑اغ‑يفكا ربّي ءور‑ا‑ياغ‑يترارا ا‑نتيكساض، والاينّي ار‑اغ‑يتعمّار س‑تحكيمت ءيتجهّدن د‑لحنانت د‑تنباطّ ن‑يخف‑نّغ.

⁸ ف‑مايان ا‑ف‑راد‑اك‑ينيغ، ا‑ور‑تّحشامت ا‑تساوالت د‑مدّن ف‑سيديتنّغ، ءولا‑دا‑فلّا‑تّحشامت نكّي لّي‑يلّان غ‑لحبس ف‑يسم‑نس. والاينّي بكيس س‑تحكيمت ءيتجهّدن ن‑ربّي ا‑ديدي‑تّرفوفونت ف‑لخبار ءيفولكين.

⁹ ءيجّنجم‑اغ ربّي زغ‑دّنوب‑نّغ ءيغر‑اغ ا‑نگ ءيمژلاين‑نس، ءورد ف‑سّيبت ن‑كرا نسكار نكُّني والاينّي ف‑سّيبت ن‑ما‑يقصاد نتّان اد‑اغ‑يبارك ف‑وودم لّماسيح ياسوع ءور‑تا‑يخلق دّونيت.

¹⁰ غمكان ا‑س‑اغ‑يبارك غيلاد غ‑د‑يوشكا‑ونجّام‑نّغ لماسيح ياسوع، ءينرو لقوّا لّموت ءيسّبايّن‑اغ‑د لخبار ءيفولكين ن‑تودرت ءيدومن.

¹¹ ف‑لخبار‑اد ا‑ف‑يّي‑يژلي ربّي اد‑گغ ابرّاح‑نس د‑ورقّاس‑نس د‑ومسلمد فلّاس.

¹² مايان ا‑ف‑ا‑ترفوفونغ غمكاد. والاينّي ءور‑اكُّ‑حشيمغ، اشكو سّنغ غوالّي‑س‑ومنغ. وورّيغ ءيسّانغ ءيس‑يژضار ا‑يگابل لامانت‑ينو ار اسّ ءيگُّران.

¹³ امژ‑بدّا غ‑ولمّود يُغژانّ لّي‑مي‑داري‑تسفلدت، تعمّرت س‑ليمان د‑لحنانت لّي‑اغ‑يلّان غ‑تامونت لّماسيح ياسوع.

¹⁴ گابل لامانت ءيفولكين لّي‑اك‑يفكا ربّي، تگابلت‑ستّ س‑تحكيمت ن‑رّوح لقودوس لّي‑گينّغ‑يلّان.

¹⁵ تسفلدت ف‑ايتماتن غ‑تمازيرت ن‑اسيّا مامنك اد‑دّان كولّو فلن‑يّي. زغ‑گيسن فيجاليس د‑هارموجانيس،

¹⁶ والاينّي ضالبغ سيديتنّغ ا‑يرحم ف‑ايت‑تگمّي ن‑ونيسيفوروس، اشكو منّاوت‑توال ا‑يسّفجّيج ف‑وول‑ينو، ءور‑ت‑شّحشّيمنت سّناسل‑اد‑ينو.

¹⁷ نتّان غير ءيلكم‑د تامدينت ن‑روما س‑ا‑سري‑يسيگّيل س‑لمعقول ايلّيغ‑يّي‑يوفا.

¹⁸ ضالبغ سيديتنّغ اد‑اس‑يسّيگت رّحمت غ‑واسّ لّحساب. تسّنت مامنك ا‑يّي‑يعاون باهرا ءولا غ‑تمدينت ن‑افسوس.