2 tasaluniki 3 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

ضالبات ربّي

¹ ءيمّا غيلاد اي‑ايتماتنّغ، ژّالّات فلّانّغ تضالبم ربّي اد‑اغ‑يعاون ا‑نسّلكم لخبار ن‑سيديتنّغ غ‑ووسّان‑اد س‑كولّو‑تمازيرت‑اد باش ا‑سرس‑سفليدن مدّن گّوتنين غمكلّي سفلدن غ‑دارون.

² ضالبات‑ت اد‑اغ‑يسّانف ءي‑مدّن شقانين أُخشنّين، اشكو ءور‑ا‑كولّو‑تّيرين اد‑امنّ.

³ ءيمّا سيديتنّغ ءيقاما‑بدّا غ‑واوال‑نس، را‑كُن‑يسّدوس ءيسّنتال‑كُن زغ‑والّي يُخشنّ.

⁴ هاتي ءيسّهنّا‑ياغ سيديتنّغ ف‑سّيبت‑نّون، نيسّان ءيس‑ا‑تسكارم كولّو ماد‑اون‑ننّا راد‑بدّا‑تي‑تسكارم.

⁵ ءيمّا غيلاد، نضالب سيديتنّغ ا‑كُن‑يهدو باش ا‑تّحنّوم غمكلّي ءيتحنّو ربّي، ار‑تّصبارم غمكلّي ءيتصبار لماسيح.

تاووري لّي‑د‑يقّانّ ءيمومنّ

⁶ واي‑ايتماتنّغ، س‑يسم ن‑سيديتنّغ ياسوع لماسيح ا‑س‑را‑كُن‑نوصّا غيلاد، نيني‑اون ا‑تّانفم ءي‑ايتماتن نّا‑ياگُين اد‑تخدامن ءولا‑دا‑سكارن س‑ولمّود لّي‑اون‑نسّلمد.

⁷ اشكو تسّنم ءيس‑كُن‑يخصّا ا‑تسكارم غمكلّي نسكار نكُّني، ءور‑نگاور غ‑دارون بلا‑دا‑نتخدام.

⁸ ءور‑جّو‑نشّي اغروم ن‑يان بلا‑ياس‑نفكا اتيگ‑نس. نكّا‑تّين ار‑نتخدام غ‑ييض ءولا ازال، ار‑نكّات تاكرّايت باش ا‑ور‑نژّاي ف‑يان گيگون.

⁹ واخّا دارنّغ لحقّ ا‑زگيگون‑نضالب ما‑نحتاجّا، ءور‑جّو‑ت‑نضالب. نسكر غمكان باش اد‑اون‑نمل مامنك ا‑كُن‑د‑يقّان ا‑تسكارم ءولا كونّي.

¹⁰ غاكود لّيغ ديدون نلّا ننّا‑ياون «وانّا ءور‑يرين ا‑يخدم، ءيخصّا‑ت ا‑ور‑يشّ.»

¹¹ ءيمّا غيلاد نسفلد ءيس‑لّان كرا ن‑مدّن غ‑گراتون ءور‑ا‑سكارن يات، اگُين تاووري، ار‑كشّمن غير سّوق ن‑وييّاض.

¹² زوند غوين، را‑تن‑نوصّا غيلاد س‑يسم ن‑سيديتنّغ ياسوع لماسيح، ننصح‑تن اد‑تخدامن اسّ ف‑واسّ باش اد‑امژن ماد‑شتّان ف‑تووري لّي‑سكارن.

¹³ واي‑ايتماتنّغ، سكارات افولكي بلا‑دا‑تّرمايم.

¹⁴ ژرات وانّا ياگُين ا‑يسفليد س‑مايد‑اون‑نورا غ‑تبرات‑اد، تانفم‑اس باش ا‑تي‑تيگُراژ.

¹⁵ ا‑ور‑تي‑تگم د‑ونوّاش‑نّون، والاينّي نصحات‑ت زوند يان ءيگان زغ‑ايتماتون.

¹⁶ ار‑نتضالاب سيديتنّغ لّي‑يگان باب ن‑سّلامت اد‑اون‑ياكّا سّلامت غ‑كرايگاتّ تاسگا د‑كرايگاتّ تاساعت. ا‑ديدون‑ييلي سيديتنّغ كولّوكن.

¹⁷ نكّي بولُس، س‑وفوس‑ينو ا‑س‑وريغ اوال‑اد ن‑سّلام، ءيگ تاماتارت‑ينو غ‑كرايگاتّ تابرات‑ينو. غمكاد ا‑س‑ا‑تاراغ.

¹⁸ اد‑اون‑تيلي لباراكا ن‑سيديتنّغ ياسوع لماسيح كولّوكن.