2 tasaluniki 2 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

انوّاش ن‑ربّي

¹ واي‑ايتماتنّغ، نرا غيلاد اد‑اون‑نيني ف‑مامنك ا‑را‑د‑ياشك سيديتنّغ ياسوع لماسيح، نمون كولّواغ باش ا‑ديدس‑نمناگّار.

² والاينّي اد‑ور‑تاسيم تاغوفت ءولا تغووضم ءيغ‑تسفلدم ءي‑كرا ن‑يان ار‑يتّيني «ءيزري‑واسّ لّي‑غ‑د‑يوشكا سيديتنّغ.» ا‑ور‑تي‑تامنم واخّا ءيغ‑اون‑ينّا ءيملا‑ياس‑ت رّوح لقودوس نغد ءيسفلد ءي‑لخبار‑نس نغد ءيغرا‑ت غ‑كرا ن‑تبرات زغ‑دارنّغ.

³ اد‑ور‑تادجم يان ا‑كُن‑يجلو، اشكو ءور‑را‑د‑يلكم‑واسّ‑ان ارد مونّ مدّن گّوتنين اد‑مّاغن د‑ربّي، ءيبان‑د‑ونوّاش ن‑ربّي لّي‑را‑يگُّرو س‑لهالاك.

⁴ را‑يسّيمغور ءيخف‑نس ار‑يتژي ف‑كولّو ماد‑تعبادن مدّن ءولا كولّو ما‑مي‑تژالّان. را‑يكشم ءولا س‑تگمّي ن‑ربّي ءيگاور گيس ييني ءيزد نتّان ا‑يگان ربّي.

⁵ ءيس‑ور‑دي‑تسوانگمّ؟ نّيغ‑اون باهرا ف‑تغاوسيوين‑اد غ‑ووسّان لّي‑غ‑ديدون‑لّيغ.

⁶ تيسّانم ما‑ت‑يحصارن غيلاد باش ا‑ور‑د‑يبان ارد‑د‑يلكم‑وزمز‑نس.

⁷ اشكو تانوّاشت ءينتلن تبدا غيلاد ار‑تّزاياد، والاينّي غايلّي را‑يجرو ءور‑را‑يجرو ارد ءيتياتّاي ما‑ت‑يحصارن.

⁸ غاكودان ا‑را‑د‑يبان‑ونوّاش ن‑ربّي، ياشك‑يد ءيلمّا سيديتنّغ ياسوع س‑لمجد ءيگّوتن، ءينغ‑ت س‑يات تونفوست زغ‑يمي‑نس ءيهلك‑ت.

⁹ ءيمّا انوّاش‑ان، را‑دارس‑تيگات‑تحكيمت ن‑شيطان، را‑يزّگا تيكركاس‑نس س‑لمعجيزات د‑لقوّات د‑تميتار تجهّدنين.

¹⁰ س‑كولّو كرا ءيگان لخُشانت ا‑س‑را‑يجلّو غويلّي لّانين غ‑وغاراس لّهالاك اگُين اد‑يرين لحقّ نجمن.

¹¹ ف‑مايان ا‑ف‑ا‑ياسن‑يتزاياد ربّي ايلّيغ جلان س‑وگُّار امنّ تيكركاس‑ان.

¹² غمكاد ا‑س‑را‑تضر لعقوبيت ف‑كولّو ويلّي ءور‑ومنّين س‑لحقّ فرحن س‑ما‑يُخشنّ.

زگايات غ‑وغاراس ن‑ربّي

¹³ والاينّي ءيقّان‑اغ‑د ا‑بدّا‑نتشكار ربّي فلّاون اي‑ايتماتنّغ لّي‑ف‑يحنّا سيديتنّغ، اشكو ءيژلي‑كُن زغ‑يسيزوار ا‑تنجمّ، ءيسّغوس‑كُن س‑رّوح لقودوس باش ا‑تگم وينس ف‑سّيبت ن‑ما‑تومنم لحقّ.

¹⁴ كولّو ماياد، ءيغرا‑ياون‑د سرس ربّي س‑لخبار ءيفولكين لّي‑اون‑ين‑نيوي، باش اد‑اون‑تيلي تاغامت غ‑لمجد ن‑سيديتنّغ ياسوع لماسيح.

¹⁵ ءيمّا غيلاد اي‑ايتماتنّغ، زگايات تامژم‑بدّا غ‑ولمّود لّي‑س‑كُن‑نسّلمد، زوند ماد‑اون‑ننّا س‑يمي، زوند ماد‑اون‑ين‑نورا س‑وفوس.

¹⁶ ار‑نتالغ سيديتنّغ ياسوع لماسيح د‑ربّي باباتنّغ لّي‑فلّانّغ‑يحنّان ءيبارك‑اغ ءيفك‑اغ زّعامت ءيدومن ءولا رّجا ءيصحان.

¹⁷ ار‑ت‑نتضالاب ا‑باهرا‑يزّعام ءيسّدوس ءولاون‑نّون باش ا‑تسكارم ار‑تساوالم س‑كولّو ما‑يفولكين.