2 tasaluniki 1 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ زغ‑بولُس د‑سيلا د‑تيموتاوس، ءي‑ومناگّار ن‑ويلّي گانين وين ربّي باباتنّغ د‑سيديتنّغ ياسوع لماسيح غ‑تمدينت ن‑تاسالونيكي.

² اد‑اون‑تيلي لباراكا د‑سّلامت زغ‑ربّي باباتنّغ د‑سيديتنّغ ياسوع لماسيح.

ار‑يتحكام ربّي س‑لحقّ

³ واي‑ايتماتنّغ، ءيقّان‑اغ‑د ا‑بدّا‑نتشكار ربّي فلّاون، ءيگ لحقّ گينّغ ا‑ت‑نتشكار، اشكو ار‑تّزايادم ار‑تّيمغورم باهرا غ‑ليمان‑نّون، يوورّي كود يان گيگون ار‑باهرا‑يتحنّو غ‑وييّاض.

⁴ هاتي ار‑كُن‑نتالغ غ‑دار ءيمناگّارن ن‑ربّي، اشكو تومژم غ‑ربّي سول تزگام، واخّا دا‑تزرايم غ‑ترفوفنت د‑تنوكموت ءيگّوتن.

⁵ مايد‑اون‑يجرّون ار‑يمالا ءيس‑ا‑يتحكام ربّي س‑لحقّ، اشكو ءيگا‑كُن د‑ويد ستهلّانين اد‑كشمن س‑تگلديت‑نس لّي‑ف‑ا‑تّرفوفونم.

⁶ اشكو س‑لحقّ ا‑س‑را‑يرار ربّي تارفوفنت ءي‑ويلّي‑كُن‑سّرفوفنّين،

⁷ ءيفك‑اون اسونفو ديدنّغ ءي‑كونّي لّي‑يرفوفنّ. غمكاد ا‑را‑يسكر غاكود نّا‑د‑يوورّي سيديتنّغ ياسوع لماسيح زغ‑يگنّا ءيبايّن د‑لمالايكا‑نس تجهّدنين س‑لعافيت ءيفنّون.

⁸ غاكودان ا‑را‑يوت ربّي لعقوبيت ف‑ويلّي سرس رورنين تيغوردين‑نسن، اگُين اد‑سفليدن س‑لخبار ءيفولكين ن‑سيديتنّغ ياسوع.

⁹ را‑فلّاسن‑يوت لحوكم س‑لهالاك لّيخرت، ءيسّنگارا‑تن د‑سيديتنّغ. را‑تن‑ين‑يسّاگّوگ ف‑لمجد‑نس ءيتجهّدن

¹⁰ غ‑واسّ لّي‑غ‑را‑د‑ياشك سيديتنّغ ا‑ت‑الغن ءيمژلاين‑نس، تعجّبن گيس كولّو غويلّي سرس ءومنّين. ءولا كونّي را‑زگيسن‑تگم، اشكو تومنم توگّا لّي‑اون‑ين‑نيوي.

¹¹ ماياد ا‑ف‑ا‑بدّا‑نتژالّا ف‑سّيبت‑نّون، ار‑نتضالاب ربّي‑نّغ ا‑كُن‑يگ د‑ويد ستهلّانين تودرت لّي‑س‑اون‑د‑يغرا. ار‑ت‑نتضالاب ا‑يسّافو س‑تحكيمت‑نس ءيتجهّدن كولّو ما‑تّناوالم ءيفولكي ءولا كولّو ما‑تسكارم ف‑سّيبت لّيمان‑نّون.

¹² غمكاد ا‑س‑را‑گيگون‑يبان لمجد ن‑يسم ن‑سيديتنّغ ياسوع، ييلي‑اون لمجد ءولا كونّي ديدس س‑لباراكا ن‑ربّي‑نّغ د‑سيديتنّغ ياسوع لماسيح.