2 kurintus 9 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تامگرا لّحنانت

¹ ءور‑يّي‑يخصّا اد‑زايدغ اراغ‑اون‑ين ف‑لمعاونت لّي‑را‑ناوي ءي‑يمژلاين غ‑وروشاليم،

² اشكو سّنغ ءيس‑ترام باهرا ا‑تفكم كرا. هاتي ءولغّ‑كُن غ‑دار ايت‑ماكيدونيّا ءينيغ‑اسن: «اسگُّاس اياد س‑وجادن ايت‑اخايا اد‑عاونّ» ايلّيغ ءيگّوت غ‑ايت‑ماكيدونيّا ما‑يوورّين ءيرا ا‑يفك كرا لّيغ سفلدن ف‑ما‑تناولم كونّي س‑نّييت‑نّون.

³ ءيمّا غيلاد ءوزنغ‑اون‑ين ايتماتن‑اد باش ا‑توجادم غمكلّي‑اسن‑نّيغ، ءيبان گيگون ءيس‑تستهلّام مايلّي فلّاون نّيغ.

⁴ والاينّي ءيغ‑ن‑دارون‑وشكيغ نكّي، مونّ‑ين ديدي كرا ن‑ايت‑ماكيدونيّا افن‑كُن‑ين ءور‑توجادم، راد‑باهرا‑حشمغ ف‑واوال‑ينو، را‑تحشمّ ءولا كونّي ءيغ‑تگُّرا‑تغاوسا‑ياد س‑غمكان.

⁵ مايان ا‑ف‑سوانگمغ ءيس‑را‑ياف ءيغ‑ضالبغ ايتماتن‑اد ا‑يّي‑ن‑زوورن س‑دارون، باش اد‑جّوجادن تاوافكا لّي‑س‑تنّام را‑ستّي‑تازنم. غمكان ا‑س‑را‑ستّ‑ين‑افغ نكّي توجاد س‑لخاطر‑نّون ءورد س‑بزّز.

⁶ اشكو وانّا‑ن‑يلوحن امود ءيدروسن، ءيدروس ما‑را‑يمگر. ءيمّا وانّا‑ن‑يلوحن امود ءيگّوتن، ءيگّوت ما‑را‑يمگر.

⁷ ءيلّا ف‑كود يان ا‑يسكر مايلّي ءيقصاد غ‑يخف‑نس. ا‑ور‑يفك س‑بزّز نغد ف‑وودم ن‑وييّاض. اشكو ءيعزّا دار ربّي وانّا ياكّان س‑لفرح.

⁸ ربّي ءيژضار ا‑كُن‑يبارك س‑تميخار‑نس گّوتنين باش اد‑اون‑ييلي كولّو ما‑تحتاجّام، ييلي‑اون‑داغ ما‑س‑ا‑تّعاوانم غ‑كولّو ما‑يگان افولكي.

⁹ غمكلّي ءيتياران: «ار‑يسّوكوت لباراكات‑نس ف‑يمژلاض. ءور‑را‑سار‑تتمّو لحنانت‑نس.»

¹⁰ ربّي لّي‑ياكّان امود ءي‑والّي ءيكّرزن ار‑اس‑يتزاياد اغروم ما‑يشتّا، نتّان ا‑راد‑اون‑يفك امود ءيزايد‑اون ما‑يگّوتن، ءيسكر‑اون تامگرا ءيفولكين زغ‑لحنانت‑نّون.

¹¹ راد‑اون‑يسّيگات لخير باش ا‑بدّا‑دارون‑ييلي ما‑تاكّام ءي‑وييّاض. غمكان ا‑ف‑را‑تي‑تشكارن مدّن گّوتنين ف‑ماد‑اسن‑تّازنم ف‑وفوس‑نّغ.

¹² اشكو لمعاونت‑اد را‑تعمّر ءيمژلاين ن‑ربّي س‑لخير ما‑س‑ا‑باهرا‑تفراحن ار‑كولّو‑تشكارن ربّي.

¹³ ءيگّوت ما‑را‑ت‑يشكر ف‑لمعاونت‑نّون، اشكو را‑سرس‑تملم ءيس‑ا‑تسكارم س‑لخبار ءيفولكين لّماسيح ار‑تّيريم ا‑تّعاوانم ءيمژلاين‑ان ءولا كولّو مدّن.

¹⁴ را‑كُن‑باهرا‑تحوبّون نتني ار‑فلّاون‑تضالابن ربّي، اشكو ءيبارك گيگون ربّي س‑لباراكا ءيگّوتن.

¹⁵ ءيمّا غيلاد، ا‑باهرا‑نشكر ربّي لّي‑اغ‑د‑يفكان ما‑يوگُرن كولّو ءيسوينگيمن ن‑بنادم.