2 kurintus 8 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

لمعاونت لّي‑را‑ياوي بولُس س‑وروشاليم

¹ واي‑ايتما، نرا ا‑تيسّانم منشك ا‑يبارك ربّي غ‑يمناگّارن غ‑تمازيرت ن‑ماكيدونيّا.

² واخّا زرين غ‑تنوكموت ءيشقان، فرحن باهرا. رضون اد‑فكن كيگان، واخّا ءيدروس ماد‑دارسن‑يلّان باهرا.

³ نكّي گيغ ءينيگي ن‑يس‑فكان ءونشك لّي‑مي‑ژضارن، فكن‑نّيت ءوگُّار ن‑ما‑مي‑ژضارن، رضون س‑غمكان.

⁴ ضالبن‑اغ باهرا ا‑تن‑نادج اد‑فكن كرا غ‑لمعاونت لّي‑را‑ناوي ءي‑يمژلاين ن‑ربّي غ‑وروشاليم، ءيرين نتني اد‑اسن‑تيلي لباراكا ن‑تامونت‑اد.

⁵ ءور‑نغال غ‑ووسّان‑ان ءيس‑راد‑سكرن غونشكان، ءيمّا نتني فكان ءيخف‑نسن زوار ءي‑سيديتنّغ، فكن‑اغ ءيلمّا ءيخف‑نسن ءولا نكُّني غمكلّي ءيرا ربّي.

⁶ ءولا كونّي، ءيبدا تيطوس ار‑اون‑يمالا ا‑تسكارم غمكان. نضالب‑ت غيلاد ا‑كُن‑يعاون ا‑تكمّلم لباراكا ن‑توافكا‑ياد.

⁷ ژرات منشك ا‑تجهّدم كونّي. ءيدوس ليمان‑نّون، تيسّانم ا‑تساوالم، تفهمّ ما‑يُغژانّ، ار‑تسكارم س‑نّييت، ار‑اغ‑تّحوبّوم. ءيمّا غيلاد نرا گيگون ا‑تجهّدم ءولا غ‑لباراكا ن‑توافكا‑ياد.

⁸ ءورد لوصيت ايد‑اون‑نّيغ، والاينّي مليغ‑اون ماد‑سكرن وييّاض س‑نّييت‑نسن، باش اد‑اغ‑تملم ءيزد س‑صّاحت تحوبّام مدّن ءولا كونّي.

⁹ تسّنم لحنانت ن‑سيديتنّغ ياسوع لماسيح. واخّا ءيطّاف ما‑يگّوتن، يوورّي بلا يات ف‑سّيبت‑نّون. ءيفل كولّو ما‑دارس‑يلّان، باش ا‑توورّيم تطّافم ما‑يگّوتن.

¹⁰ سوانگمغ نكّي ءيس‑راد‑اون‑ياف ا‑تكمّلم مايلّي تبدام اسگُّاس لّي‑يزرين، اشكو كونّي ا‑يزوارن وييّاض غ‑مايلّي تناولم، تبدوم ار‑تي‑تسكارم س‑نّييت‑نّون.

¹¹ كمّلات‑ت غيلاد ءونشك نّا‑مي‑تژضارم، تيريم ا‑تي‑تكمّلم غمكلّي‑تي‑تناولم غ‑يسيزوار.

¹² ءيغ‑ترام ا‑تفكم س‑نّييت‑نّون، را‑يرضو ربّي س‑ونشك لّي‑مي‑تژضارم ا‑تفكم. ءور‑را‑ييري ءوگُّار ن‑ما‑مي‑تژضارم.

¹³ ءور‑نّيغ مايان باش ا‑فلّاون‑ژّوژّايغ سّرخوغ ءي‑وييّاض،

¹⁴ والاينّي ريغ ا‑كولّو‑ننگادّا ءي‑نگراتنّغ. هاتي غيلاد غ‑دارون‑يگّوت لخير، ءيلّا فلّاون ا‑تعاونم غويلّي ءور‑دار يات. اشكو ءيغ‑يدّا ارد توورّيم بلا يات وورّين نتني س‑لخير، را‑كُن‑عاونّ نتني غاكودان.

¹⁵ غمكلّي ءيتياران: «غوالّي ءيسّمونّ كيگان، ءور‑اس‑يشاض يات. ءيمّا غوالّي ءيسّمونّ ءيميكّ، ءور‑ت‑يخصّا يات.»

بولُس يوزن تيطوس س‑كورينتوس

¹⁶ ار‑نتالغ ربّي لّي‑يسكرن غ‑وول ن‑تيطوس ا‑باهرا‑گيگون‑يسوينگيم غمكلّي گيگون نسوينگيم نكُّني.

¹⁷ لّيغ‑ت‑نضالب ا‑ن‑دارون‑ياشك، ءيفرح نتّا باهرا، ءيسكر ف‑ا‑ن‑دارون‑ياشك س‑لخاطر‑نس.

¹⁸ نازن‑ن ديدس گماتنّغ لّي‑تالغن ايتماتن غ‑يمناگّارن كولّوتن ف‑سّيبت ن‑تبرّاحت‑نس لّخبار ءيفولكين.

¹⁹ ژلين‑ت ايتماتن ن‑يمناگّارن اد‑ديدنّغ‑يمودّو ار‑اغ‑يتعاوان غ‑لباراكا ن‑توافكا‑ياد لّي‑س‑را‑يبان لمجد ن‑سيديتنّغ ءولا تايري‑نّغ ءيصفان.

²⁰ نرا ا‑نسّلكم لامانت‑اد ءيگّوتن بلا گينّغ ءيشكّا يان ف‑مامنك ا‑را‑تلكم.

²¹ نرار‑بدّا لعاقل باش ا‑نسكار افولكي غ‑يژري ن‑سيديتنّغ ءولا وين مدّن.

²² نازن‑ن ديدسن يان گماتنّغ ياضني، نژرا منّاوت‑توال منشك ا‑باهرا‑يتّيري ا‑يعاون وييّاض. د‑نتّان، لّيغ ءيسفلد ف‑ما‑تناولم ءيفولكي، ييري س‑وگُّار اد‑اون‑گيس‑يعاون.

²³ ءيمّا تيطوس، ءيگا اسمون‑ينو ار‑ديدي‑يتخدام ف‑سّيبت‑نّون. ءيمّا ايتماتنّغ ياضني، نتني گان ءيمازانّ ن‑يمناگّارن ار‑يتبان لمجد لّماسيح غ‑تووري لّي‑سكارن.

²⁴ ملات‑اسن منشك ا‑تن‑تّيريم، باش اد‑يسّانّ كولّو ءيمناگّارن ن‑ايتماتن ءيس‑تستهلّام غمكلّي‑كُن‑نتالغ غ‑دارسن.