2 kurintus 7 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ واي‑ايتما عزّانين، لّيغ‑اغ‑ينّا ربّي راد‑اغ‑يسكر كولّو ماياد ءيفولكين، ييلي فلّانّغ ا‑نغوس ناگّوگ زغ‑كولّو ما‑را‑يسّركو ءول‑نّغ ءولا دّات‑نّغ. ييلي فلّانّغ ا‑نتياوژلاي ءي‑ربّي س‑وفولكي ءيكمّلن، ار‑باهرا‑نتّيري ا‑ت‑نرضو.

ءيفرح بولُس س‑ايت‑كورينتوس

² ملات‑اغ غيلاد ءيس‑اغ‑تحوبّام، اشكو ءور‑جّو‑نتعدّا ف‑يان ءولا نسّخسر يان ءولا نشّا يان.

³ ءور‑نّيغ ءيس‑تُخشنم، اشكو مليغ‑اون يادلّي ءيس‑دارنّغ‑تعزّام باهرا. يان ا‑نگا نكُّني ديدون، ءيغ‑ندّر ءولا ءيغ‑نمّوت،

⁴ اشكو تيقغ گيگون، فرحغ سرون، زعمغ باهرا. واخّا دا‑نزراي غ‑تنوكموت ءيشقان، فرحغ س‑لفرح ءيگّوتن.

⁵ لّيغ‑د‑نروح تامازيرت‑اد ن‑ماكيدونيّا ءور‑نژضار ا‑نسونفو غ‑ووسّان‑ان، اشكو تكّا‑ياغ‑د‑تنوكموت كرايگاتّ تاسگا. سوتلن‑اغ ءيشابوكن زغ‑برّا، تيلي‑اغ تاغوفت غ‑وگُنس.

⁶ والاينّي ربّي لّي‑يسّفجّيجن ءول ن‑ويلّي ضعفنين، ءيسّفجّيج‑اغ ءولا نكُّني، اشكو ييوي‑د تيطوس س‑دارنّغ.

⁷ هاتي نتهنّا غيلاد، ءورد غير ف‑سّيبت ن‑ما‑د‑يوشكا والاينّي نتهنّا ءولا ف‑مكلّي تسّفجّيجم ءول‑نس. ءيمل‑اغ ف‑مامنك ا‑يّي‑تّيريم باهرا، تيگُراژ‑كُن ف‑مايلّي ءيجران، توجادم ا‑ديدي‑تبيدّم. ها‑يّي فرحغ باهرا س‑لخبار‑اد.

⁸ ءور‑يّي‑تُگراژ غيلاد ف‑تبرات لّي‑اون‑ين‑وزنغ، واخّا‑يّي‑فلّاس‑تُگراژ غ‑ووسّان‑ان اشكو ءيقاما گيگون لحال يان كرا.

⁹ هاتي غيلاد فرحغ، ءورد ف‑سّيبت ن‑ماد‑اون‑طيّر والاينّي ف‑سّيبت ن‑ما‑گيگون‑يقاما لحال ايلّيغ تسكرم ما‑گيگون‑يرا ربّي. اشكو لّيغ‑اون‑طيّر، توورّيم تسوانگمّ باهرا غ‑ما‑يرا ربّي. ءور‑اون‑يجلي يات ف‑سّيبت‑نّغ.

¹⁰ اشكو يان مي طيّر ءيسوانگم غ‑ربّي، هاتي را‑يفل ءيسكّيرن‑نس أُخشنّين ءينجم. ءور‑را‑تي‑تيگُراژ ف‑مايان. ءيمّا يان مي طيّر ءيسوانگم غ‑دّونيت، ءور‑راد‑اس‑د‑ياوي مايان ابلا لموت.

¹¹ ژرات مايلّي تسكرم غاكود لّيغ‑اون‑طيّر تسوانگمّ غ‑ما‑يرا ربّي. توورّيم ترورم لعاقل باهرا، تيريم ا‑تملم ءيس‑ور‑گيگون‑يلّي كرا لّعيب. ءولا كونّي تبزگم ف‑والّي ءيفّوغن اغاراس، تاغ‑كُن‑تگوضي فلّاس. تيريم اد‑اغ‑ترضوم، توجادم ا‑فلّاس‑تحكامّ. هاتي ءيبان فلّاون ءيس‑تسكرم كولّو ما‑فلّاون‑يلّان غ‑مايلّي دارون ءيجران.

¹² واخّا‑ياون‑ين‑وريغ تابرات‑ان، ءور‑اون‑تّ‑ين‑وريغ ف‑سّيبت ن‑والّي ءيسكرن ما‑يُخشنّ نغد غوالّي‑مي‑ت‑يسكر، والاينّي ءوريغ‑اون‑تّ‑ين باش اد‑اون‑يمل ربّي منشك ا‑را‑تيريم اد‑اغ‑ترضوم.

¹³ ءيمّا غيلاد نتهنّا ف‑كولّو مايان. نتهنّا نكُّني والاينّي نفرح س‑وگُّار لّيغ نژرا منشك ا‑كولّو‑تسّفرحم تيطوس ايلّيغ ءور‑سول‑فلّاون‑يوسي تاغوفت.

¹⁴ غايد ءيزرين ءولغّ‑كُن ءي‑تيطوس، ءيمّا غيلاد ءيبان ءيس‑ور‑يّي‑تشّحشّيمّ ف‑واوال‑ينو. نملا‑ياون‑ين لحقّ غ‑كولّو ماد‑اون‑ننّا غايد ءيزرين، ءيمّا غيلاد ءيبان ءيزد لحقّ ا‑فلّاون‑ننّا ءولا ءي‑تيطوس.

¹⁵ ءيمّا نتّا ءيحوبّا‑كُن غيلاد س‑وگُّار، اشكو ار‑د‑يسوينگيم مامنك ا‑تي‑تقبلم، تادرم ءي‑يخف‑نّون تسفلدم سرس كولّوكن، توقّرم‑ت باهرا.

¹⁶ ءولا نكّي فرحغ س‑كيگان اشكو ءوفيغ ا‑باهرا‑گيگون‑گغ لامان.