2 kurintus 6 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ س‑يسم ن‑ربّي لّي‑د‑نخدم، نضالب‑كُن ا‑ور‑تادجم رّحمت‑نس لّي‑س‑تومنم ا‑تضر بلا لفايتّ غ‑دارون.

² اشكو ربّي ءينّا: «لّيغ‑د‑يروح‑وزمز ن‑رّضا سفلدغ‑اون. لّيغ‑د‑يلكم‑واسّ ن‑وجنجم عاونغ‑كُن.» هاتي غيلاد ا‑د‑يروح‑وزمز ا‑فلّاون‑يرضو. غاسّاد ا‑د‑يلكم‑واسّ ا‑تنجمّ.

تانوكموت لّي‑غ‑يزري بولُس

³ ار‑نسكار كولّو باش ا‑ور‑ييلي كرا لّعيب غ‑تووري‑نّغ ءولا كرا ن‑تبايضّرت ما‑يسّطارن يان.

⁴ ار‑نسكار كولّو باش ا‑نمالا ءيزد ءيخدّامن ن‑ربّي ا‑نگا، ندوس ا‑كولّو‑نصبر. ار‑باهرا‑نترفوفون ار‑نكّات تامّارا ار‑نزراي غ‑تنوكموت.

⁵ ار‑اغ‑سّغوروشن ار‑اغ‑ن‑تلوحن غ‑لحبس ار‑فلّانّغ‑سّهيّاسن مدّن. ار‑نتنهاتاف باهرا. كرا ن‑توال ار‑نتقاما بلا ءيطس، كرا ن‑توال ار‑نتقاما س‑لاژ.

⁶ والاينّي ءيبان گينّغ ءيس‑يغوس‑وول‑نّغ نيسّان ما‑يُغژانّ نصبر باهرا، ار‑نتعاوان وييّاض، نعمّر س‑رّوح لقودوس، ار‑نتحنّو غ‑مدّن س‑نّييت ءيصفان،

⁷ ار‑نساوال س‑لحقّ، ار‑نسكار كولّو س‑تحكيمت ءيتجهّدن ن‑ربّي، ناسي ءيمقلاد ن‑وفولكي ن‑ربّي غ‑وفاسيي‑نّغ ءولا غ‑وژلماض‑نّغ.

⁸ غمكان ا‑نسكار ءيغ‑ا‑ياغ‑تحگارن مدّن ءولا ءيغ‑ا‑ياغ‑تالغن، ءيغ‑ا‑فلّانّغ‑تّينين نُخشن ءولا ءيغ‑ا‑تّينين نشوا. هاتي ار‑اغ‑تگّان د‑ايت‑تكركاس، والاينّي ار‑نساوال س‑لحقّ.

⁹ ار‑تّينين ءور‑اغ‑يسّين يان، والاينّي ءيگّوت ماد‑اغ‑يسّنّ. ار‑تّينين ار‑نتمتات، والاينّي ها‑ياغ سول ندّر. ار‑تّينين تلّا‑د فلّانّغ لعقوبيت، والاينّي ءور‑يلّي ماد‑اغ‑ينغان.

¹⁰ واخّا دا‑گينّغ‑يتقاما لحال، ار‑بدّا‑نتفراح. واخّا نگا ءيمژلاض، ءيگّوت ما‑زگينّغ‑يتامژن لخير. واخّا ءور‑دارنّغ يات، نطّاف كرايگاتّ كرا.

¹¹ واي‑ايتما ن‑كورينتوس، س‑نّييت ن‑وول‑نّغ ايد‑س‑اون‑ين‑نساول، اشكو تعزّام دارنّغ باهرا.

¹² ءورد نكُّني ا‑ن‑سرون‑يرورن تيغوردين، والاينّي كونّي ا‑د‑سرنّغ‑يرورن تيغوردين.

¹³ راد‑اون‑ينيغ غمكلّي ءيتّيني يان ءي‑تاروا‑نس عزّانين، سكرات زوند نكُّني، تملم‑اغ ءيس‑اغ‑تحوبّام غمكلّي‑كُن‑نحوبّا.

نگارات د‑ويلّي ءور‑ومنّين

¹⁴ ا‑ور‑توورّيم تيليم غ‑وزاگلو د‑ويلّي ءور‑ومنّين س‑لماسيح. ءيس‑تلّا تامونت غ‑گر ما‑يرضان ربّي د‑ما‑ت‑ور‑يرضين؟ ءيس‑تلّا تامونت غ‑گر تيفاوت د‑تيلّاس؟

¹⁵ ءيس‑را‑د‑يمشاشكا لماسيح د‑يبليس؟ ءيس‑را‑يمرضا يان يومنّ د‑يان ءور‑يومينّ؟

¹⁶ ءيس‑را‑تّمعاوان‑تگمّي ن‑ربّي د‑تين ءيلاهات ن‑دّونيت‑اد؟ اشكو نگا نكُّني ايت‑تيگمّي ن‑ربّي لّي‑يدّرن. غمكلّي ءينّا ربّي: «راد‑گاورغ د‑مدّن‑ينو، زدغّ غ‑وامّاس‑نسن. راد‑گغ ربّي‑نسن، گن نتني مدّن‑ينو.»

¹⁷ ف‑مايان ا‑ف‑ينّا سيدي ربّي: «فّوغاد‑د زغ‑دارسن، تنگارام ديدسن، تانفم ءي‑كولّو ما‑يركان. ءيغ‑تسكرم غمكان را‑فلّاون‑رضوغ.

¹⁸ راد‑گغ باباتون، تگم تاروا‑نو د‑يستي. ماياد ءينّا‑ت سيدي ربّي لّي‑يحكامن كولّو ما‑يلّان.»