2 kurintus 5 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تازدغت‑نّغ غ‑يگنّا

¹ نسّن ماياد، ءيغ‑تّياوهلاك‑تخيّامت لّي‑يگان دّات‑نّغ ن‑دّونيت‑اد، راد‑اغ‑يفك ربّي يات‑تزدغت غ‑يگنّا. راد‑اغ‑يفك يات‑تگمّي لّي‑ور‑يتياوسكارن س‑يفاسّن ن‑بنادم، راد‑بدّا‑تدوم.

² ءيمّا غيلاد غ‑سول‑نقاما غ‑دّونيت‑اد ار‑نندّر، نژوژض ا‑نلس دّات‑نّغ ن‑يگنّا.

³ ار‑نتّيري ا‑ستّ‑نلس ا‑ور‑نقاما بلا تازدغت.

⁴ اشكو ماحدّ نقاما غ‑تخيّامت‑اد ار‑نندّر س‑تاغوفت. ءور‑نّيغ ءيس‑نرا ا‑نكّيس تاخيّامت‑اد، والاينّي نرا ا‑نلس تازدغت ياضني، باش ا‑نبدّل ما‑يتمتاتن س‑ما‑راد‑بدّا‑يدّر.

⁵ ربّي ا‑فلّانّغ‑يقصادن ماياد، ءيفك‑اغ رّوح‑نس باش ا‑نيسّان ءيس‑راد‑اغ‑يسّافو كولّو مايلّي‑س‑اغ‑ينّا.

⁶ غمكاد ا‑س‑ا‑بدّا‑نزّعام ءولاون‑نّغ، اشكو نسّن ءيس‑د‑ناگّوگ زغ‑سيديتنّغ غيلاد غ‑سول‑نزدغ غ‑دّات‑اد.

⁷ ءيمّا نكُّني ار‑تّ‑نتاوي غ‑مايلّي‑س‑نومن، ءورد غ‑مايلّي نژرّا.

⁸ مايان اد‑اغ‑يزّعامن باهرا. نيري ا‑نفل دّات‑اد، نروح دار سيديتنّغ.

⁹ والاينّي ءيغ‑نقاما غ‑دّات‑اد نغد ءيغ‑تّ‑نفل، راد‑بدّا‑نسكار ف‑ا‑نرضو سيديتنّغ.

¹⁰ اشكو ءيقّان‑اغ‑د ا‑نبيدّ كولّواغ غ‑لگدّام لّماسيح ا‑فلّانّغ‑يحكام، ءيرار ءي‑كرايگاتّ يان ف‑ما‑يسكر غ‑دّونيت‑اد، ءيگ‑ييت ما‑يفولكين نغد ما‑يُخشنّ.

ربّي ءيسكر سّلامت غ‑گراس ديدنّغ

¹¹ نسّن تيكساض ن‑سيدي ربّي. مايان ا‑ف‑ا‑ن‑نتگّا تيقّي‑نّغ ا‑نسّفهام وييّاض باش اد‑امنّ ءولا نتني. ربّي ءيسّن كولّو ما‑گينّغ‑يلّان. سوانگمغ ءيس‑اغ‑تسّنم ءولا كونّي غ‑وولاون‑نّون.

¹² ءور‑ا‑نتالغ ءيخف‑نّغ باش ا‑ديدنّغ‑تبيدّم، والاينّي نملا‑ياون كرا ما‑س‑ا‑سرنّغ‑تّفراحم غ‑دار مدّن، ترارم اوال ءي‑ويلّي تفراحنين س‑وودماون ءورد س‑ما‑يلّان غ‑وولاون.

¹³ ءيغ‑تغالم ءيس‑نفّوغ ءيخف‑نّغ، ف‑ربّي ا‑ف‑ت‑نفّوغ. والاينّي ءيغ‑نساول س‑لمعقول، ف‑سّيبت‑نّون ا‑ف‑نساول.

¹⁴ ءيمّا نكُّني ار‑اغ‑تدحاي لحنانت لّماسيح، اشكو نومن ءيس‑يمّوت يان ف‑سّيبت ن‑كولّو مدّن. مايان ا‑ف‑نسّن ءيس‑كولّو‑ديدس‑مّوتن.

¹⁵ ءيمّوت نتّا ف‑سّيبت ن‑كولّو مدّن باش اد‑وورّين غويلّي دّرنين ا‑ور‑سول‑سكارن ف‑اد‑رضون ءيخف‑نسن والاينّي اد‑رضون غوالّي ءيمّوتن ءينكر‑د زغ‑لموت ف‑سّيبت‑نسن.

¹⁶ ءور‑سول‑ا‑نتمناد غ‑يان غمكلّي گيس تمنادن مدّن ن‑دّونيت‑اد. نكّا‑تّين ار‑نتمناد غ‑لماسيح غمكلّي گيس تمنادن نتني، والاينّي ءور‑سول‑ا‑گيس‑نتمناد غمكان.

¹⁷ اشكو وانّا ءيگان وين لماسيح، ءيسكر‑ت ربّي زغ‑لجديد. لاح زغ‑گيس اقديم، يوورّي ءيگ وين لجديد.

¹⁸ ربّي ا‑يقصادن مايان لّيغ ءيسكر سّلامت غ‑گراتنّغ ديدس ف‑سّيبت لّماسيح. ءيژلي‑اغ نكُّني ا‑نمالا ءي‑مدّن مامنك ا‑يرا ا‑يسكر سّلامت غ‑گراس ديدسن.

¹⁹ اشكو ربّي ءيسكر سّلامت غ‑گراس د‑دّونيت ف‑وودم لّماسيح، ءور‑سول‑ا‑يتحاساب ف‑مدّن دّنوب‑نسن. يازن‑اغ اد‑اسن‑نسّلكام لخبار ف‑سّلامت‑اد.

²⁰ نكُّني‑اد نگا ءيمازانّ لّماسيح. ف‑يمي‑نّغ ا‑ف‑ا‑سرون‑يساوال ربّي. ار‑كُن‑نتضالاب غيلاد س‑يسم لّماسيح ا‑توورّيم س‑ربّي باش اد‑اون‑تيلي سّلامت غ‑گراتون ديدس.

²¹ لماسيح لّي‑ور‑جّو‑يسكيرن كرا ن‑دّنب، ءيرور‑ت ربّي زوند ءيغ‑يعمّر س‑دّنوب ف‑سّيبت‑نّغ، باش ا‑نعمّر نكُّني س‑وفولكي ن‑ربّي ف‑سّيبت‑نس.