2 kurintus 4 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

لكنز لّي‑يلّان غ‑تمكيلين ن‑واكال

¹ لّيغ‑اغ‑يفكا ربّي تاووري‑اد ءيهيّان س‑رّحمت‑نس، ار‑گيس‑نتزاياد بلا‑دا‑نترماي.

² ناگّوگ زغ‑كولّو ما‑يگان لعيب ءينتلن ءيشّحشّامن. ءور‑ا‑نزّراي كرا ف‑يان س‑تكركاس ءولا‑دا‑نتبدّال اوال ن‑ربّي س‑لغُشّ، والاينّي ار‑بدّا‑نتّيني لحقّ ءي‑كولّو مدّن غ‑لگدّام ن‑ربّي، باش اد‑يسّانّ غ‑وول‑نسن ءيزد افولكي ا‑نسكار.

³ ءيغ‑سول‑يدل لخبار‑اد ءيفولكين، ءيدل غير ف‑ويلّي سول تياوهلاكنين.

⁴ نتني ءور‑ومينّ اشكو ءيبليس لّي‑يحكامن دّونيت‑اد ءيسّبوكض لعاقل‑نسن ا‑ور‑ژرن تيفاوت لّخبار لّمجد لّماسيح لّي‑يگان صّورت ن‑ربّي.

⁵ اشكو ءورد ف‑يخف‑نّغ ا‑ف‑ا‑نتبرّاح، والاينّي ار‑نتبرّاح ف‑ياسوع لماسيح، ار‑نمالا ءيس‑يگا نتّا سيديتنّغ، نگ نكُّني ءيخدّامن‑نّون س‑يسم لّماسيح.

⁶ اشكو ربّي لّي‑ينّان «را‑دي‑تيسفيو تيفاوت زغ‑وامّاس ن‑تيلّاس،» نتّان ا‑يفاون غ‑وولاون‑نّغ غيلاد س‑تيفاوت ن‑تواسّنا لّمجد‑نس لّي‑د‑يبانّ غ‑وودم لّماسيح.

⁷ ءيمّا لكنز‑اد، نوسي‑ت غ‑تمكيلين ن‑واكال، باش ا‑يتبان ءيزد ربّي ا‑مي‑تلّا‑تحكيمت‑اد ءيتجهّدن ءورد نكُّني.

⁸ ار‑اغ‑دي‑تّكّا‑تنوكموت كرايگاتّ تاسگا والاينّي ءور‑ا‑ياغ‑تّامژ. ار‑باهرا‑نتدوهدو والاينّي ءور‑ا‑ياغ‑تلاح رّجا.

⁹ ءيگّوت ماد‑اغ‑يتكرهون والاينّي ءيلّا‑بدّا ماد‑اغ‑يتّيرين. ار‑باهرا‑نترفوفون والاينّي ءور‑ا‑نلكّم لهالاك.

¹⁰ نوسي‑بدّا لموت ن‑ياسوع ف‑دّات‑نّغ باش ا‑تّبان ءولا تودرت ن‑ياسوع غ‑دّات‑نّغ.

¹¹ اشكو كولّو ماحدّ نسول ار‑اغ‑ن‑دحاين مدّن ءي‑لموت ف‑سّيبت ن‑ياسوع، باش ا‑تّبايّان تودرت ن‑ياسوع غ‑دّات‑نّغ لّي‑يتمتاتن.

¹² غمكاد ا‑س‑ا‑نتمّاغ د‑لموت باش ا‑تطّافم كونّي تودرت.

¹³ غمكلّي ءيتياران: «ها‑يّي ءومنغ. مايان ا‑ف‑ساولغ.» ءولا نكُّني ءيلّا دارنّغ ليمان‑اد غ‑وولاون‑نّغ، ار‑نساوال اشكو نومن.

¹⁴ نسّن ماياد باهرا: ربّي لّي‑د‑يسّنكرن سيديتنّغ ياسوع راد‑اغ‑يسّنكر ءولا نكُّني د‑ياسوع، ياوي‑اغ ديدون س‑دارس.

¹⁵ كولّو مايد ءيجرّون غيلاد، ار‑يجرّو ف‑سّيبت‑نّون باش ا‑تزايد لباراكا ن‑ربّي ار‑تّروح كيگان د‑مدّن، ءيگاتن باهرا غويلّي‑تي‑تشكارنين ءيبايّن لمجد ن‑ربّي س‑وگُّار.

¹⁶ مايان ا‑ف‑ور‑اكُّ‑ا‑نترماي. واخّا دا‑تّضعاف دّات‑نّغ، ار‑يتدوس‑وول‑نّغ اسّ ف‑واسّ.

¹⁷ اشكو تانوكموت‑اد ءيفسّوسن غ‑ا‑نزراي ءوسّان‑اد دروسنين، راد‑اغ‑تگُّرو س‑لمجد ءيدومن لّي‑باهرا‑يوگُرن كولّو غاياد.

¹⁸ هاتي ءور‑ا‑ستّ‑نتاوي غ‑مايلّي نژرّا، والاينّي ار‑تّ‑نتاوي غ‑مايلّي ءور‑ا‑يژرّا يان. اشكو مايلّي نژرّا ءور‑را‑يقاما، ءيمّا مايلّي ءور‑ا‑نژرّا راد‑بدّا‑ييلي.