2 kurintus 3 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تيبراتين ن‑تواسّنا

¹ لّيغ ننّا مايان ءيس‑نرا‑داغ ا‑نالغ ءيخف‑نّغ باش ا‑ديدنّغ‑تبيدّم؟ ءيس‑نحتاجّا تيبراتين ن‑تواسّنا زغ‑وييّاض باش اد‑اغ‑تقبلم كونّي، نغد تيبراتين زغ‑گيگون باش اد‑اغ‑قبلن وييّاض، غمكلّي حتاجّان كرا ن‑مدّن؟

² والاينّي كونّي ا‑يگان تابرات‑نّغ، تّيارا غ‑وولاون‑نّون باش ا‑ستّ‑اقران كولّو مدّن ءيسّانّ مامنك ا‑نگا.

³ هاتي ءيبان گيگون ءيزد تابرات لّماسيح ا‑تگام، يورا‑تّ نتّا س‑وفوس‑نّغ، ءورد س‑صّمح والاينّي س‑رّوح ن‑ربّي لّي‑يدّرن، ءورد ف‑تيلواح ن‑وژرو والاينّي ف‑تيلواح ن‑وولاون ن‑بنادم.

لمجد لّعهد لّجديد

⁴ ننّا مايان اشكو نسّن ءيس‑اغ‑يقبل ربّي ف‑سّيبت لّماسيح.

⁵ ءور‑ا‑نتّيني ءيزد نكُّني ا‑يژضارن ا‑نسكر كرا، والاينّي ربّي ءيژضار ا‑ت‑يسكر ف‑وفوس‑نّغ.

⁶ نتّان اد‑اغ‑يفكان تاژضّارت ما‑س‑ا‑نسّلكام ءي‑مدّن لعهد لّجديد لّي‑د‑يوشكان س‑تحكيمت ن‑رّوح لقودوس ءورد س‑لوصيّات تيارانين. اشكو لوصيّات تيارانين ار‑دي‑تاوينت لموت، ءيمّا رّوح لقودوس ار‑د‑يتاوي تودرت.

⁷ ءيمّا لعهد‑ان ن‑شّرع لّي‑د‑يتاوين لموت، غاكود لّيغ ءيتياونقاش ف‑تيلواح ن‑وژرو ءيبان‑د لمجد ن‑ربّي س‑تيفاوت ءيتجهّدن، ايلّيغ ءور‑ژضارن ايت‑ربّي ا‑ن‑تمنادن غ‑وودم ن‑موسا، واخّا ءور‑تقاما تيفاوت‑ان غير يان ءيميكّ ءيدروسن.

⁸ ءيمّا لعهد‑اد ن‑رّوح لقودوس، ءيس‑ور‑راد‑اس‑ييلي لمجد ءوگُّار ن‑مايان؟

⁹ ءيغ‑يگّوت لمجد ءي‑لعهد لّي‑س‑ا‑تهلاكن مدّن، را‑ت‑باهرا‑ياگُر لمجد ءي‑لعهد لّي‑س‑ا‑تنجامن.

¹⁰ اشكو مايلّي‑د‑يبانّ غ‑ووسّان‑ان س‑لمجد ءيگّوتن، ءور‑سول‑اس‑يلّي لمجد، اشكو تيگيرا‑نس ا‑د‑يبان ما‑ت‑يوگُرن غ‑لمجد.

¹¹ س‑لمجد ا‑س‑د‑يوشكا مايلّي ءور‑يقامان، والاينّي ءوگُّار لّمجد‑ان ا‑را‑ييلي لمجد ءي‑مايد راد‑بدّا‑يدوم.

¹² هاتي ار‑نتزعام باهرا غيلاد، اشكو ءيلّا‑ياغ رّجا‑ياد ءيصحان.

¹³ ءور‑نگي زوند موسا لّي‑يدلن ءودم‑نس باش ا‑ت‑ور‑ژرن ايت‑ربّي لّيغ ا‑گيس‑تلاح تيفاوت لّمجد.

¹⁴ نتني قّورن ءيخفاون‑نسن. سول س‑غاسّا تدل فلّاسن لمعنا لّعهد اقديم غاكود نّا‑ت‑اقران، اشكو غير لماسيح ا‑يژضارن ا‑يسّيتّي اسدّول.

¹⁵ واخّا دا‑اقران شّرع ن‑موسا، سول ءيقاما‑وسدّول‑ان ف‑لعاقل‑نسن،

¹⁶ والاينّي يان يومنّ س‑سيديتنّغ ءيتياتّاي‑فلّاس‑وسدّول.

¹⁷ هاتي سيديتنّغ ءيگا رّوح. د‑وانّا دار رّوح ن‑سيديتنّغ، ءيتياوفساي زغ‑يسكراف.

¹⁸ نكُّني كولّواغ ار‑نتمناد لمجد ن‑سيديتنّغ غيلاد، اشكو ءيتياتّاي‑فلّانّغ‑وسدّول. د‑سيديتنّغ لّي‑يگان رّوح ار‑اغ‑يتبدّال باش ا‑نگ زوند نتّا، ار‑اغ‑يتزاياد لمجد ف‑لمجد.