2 kurintus 2 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ نّيغ د‑يخف‑ينو غ‑ووسّان‑ان ءور‑را‑ن‑دارون‑اشكغ سّطيّرغ‑اون‑تّ‑داغ.

² اشكو ءيغ‑ن‑وشكيغ سّطيّرغ‑اون‑تّ، ما‑را‑ن‑افغ غ‑دارون ا‑يّي‑يسّفرح ابلا كونّي لّي‑مي‑ستّ‑سّطيّرغ؟

³ مايان ا‑ف‑ن‑وريغ تابرات‑ان، ءور‑ن‑دارون‑وشكيغ، اشكو ءور‑ريغ اد‑يّي‑دارون‑طيّر كونّي لّي‑ف‑يلّا ا‑يّي‑تسّفرحم. اشكو سّنغ ءيغ‑فرحغ نكّي را‑ديدي‑كولّو‑تفرحم.

⁴ والاينّي س‑يمطّاون گّوتنين ا‑س‑اون‑ين‑وريغ تابرات‑ان، اشكو تقامام گيگي، اسيغ فلّاون تاغوفت باهرا. ءور‑اون‑ين‑وريغ باش اد‑اون‑تّ‑سّطيّرغ س‑وگُّار، والاينّي ءوريغ‑اون‑ين باش ا‑تيسّانم منشك اد‑داري‑تعزّام.

صامحات ءي‑والّي ءيسكرن ما‑يُخشنّ

⁵ والاينّي ءيغ‑يلّا ما‑ستّ‑يسّطيّرن ءي‑وايّاض، كونّي ا‑مي‑ستّ‑يسّطيّر ءوگُّار ن‑ماد‑يّي‑تّ‑يسّطيّر نكّي. ءيسّطيّر‑اون‑تّ كولّوكن س‑يميكّ نغد س‑كيگان. غمكان ا‑س‑راد‑ينيغ اشكو ءور‑ريغ اد‑ينيغ ف‑ورگاز‑ان ءوگُّار ن‑ماد‑اس‑يگان.

⁶ والاينّي توودا‑ت لعقوبيت لّي‑فلّاس‑يوت ما‑يگّوتن گيگون.

⁷ ييلي فلّاون غيلاد اد‑اس‑تصامحم تسّفجّيجم‑ت، ا‑ور‑تي‑تنرو‑تگوضي باهرا.

⁸ را‑كُن‑ضالبغ اد‑اس‑تملم ءيس‑ا‑ت‑سول‑تّيريم.

⁹ مايان ا‑ف‑اون‑ين‑وريغ تابرات‑ان، باش ا‑كُن‑ارمغ، ءيسّانغ ءيس‑راد‑بدّا‑تسكارم س‑واوال‑ينو.

¹⁰ وانّا مي تصامحم ف‑كرا ءيسكر، هاتي صامحغ‑اس ءولا نكّي. د‑اينّا‑ف‑صامحغ نكّي، ءيغ‑نّيت‑صامحغ ف‑كرا، سّيبت‑نّون ا‑ف‑فلّاس‑صامحغ س‑يسم لّماسيح،

¹¹ باش ا‑ور‑تّ‑فلّانّغ‑يزّري شيطان، اشكو نسّن تيلّاي‑نس.

تلكم توجّوت لّماسيح كرايگاتّ ماني

¹² غاكود لّيغ لكمغ تامدينت ن‑تروّاس، ءيرژم سيديتنّغ غ‑لگدّام‑ينو يان‑يمي ف‑تووري لّخبار ءيفولكين لّماسيح.

¹³ والاينّي ءور‑يهنّا‑وول‑ينو، اشكو ءور‑ن‑وفيغ گماتنّغ تيطوس. فلغ ءيلمّا مدّن ن‑غين، مودّوغ س‑ماكيدونيّا.

¹⁴ ار‑باهرا‑نتالغ ربّي لّي‑اغ‑بدّا‑يزگّورون غ‑وكابار لّماسيح لّي‑يتنرون كولّو ما‑يلّان، ار‑سرنّغ‑يسّلكام اضو ن‑تواسّنا‑نس س‑كرايگاتّ ماني.

¹⁵ اشكو نگا غ‑دار ربّي زوند توجّوت لّماسيح غ‑گر كولّو مدّن، غويلّي نجمنين ءولا غويلّي تياوهلاكنين.

¹⁶ تگ توجّوت‑ان اضو لّموت ءي‑ويلّي تياوهلاكنين، تگ اضو ن‑تودرت ءي‑ويلّي نجمنين. والاينّي ءيس‑يلّا ما‑يژضارن ءي‑تووري‑اد ءيهيّان؟

¹⁷ ءور‑نگي نكُّني زوند ما‑يگّوتن ار‑تبرّاحن س‑واوال ن‑ربّي غير باش اد‑سرس‑قُّاين ءيقاريدن. اشكو نكُّني س‑نّييت ن‑وول‑نّغ ا‑س‑ا‑نساوال س‑يسم لّماسيح، نيسّان ءيزد ربّي اد‑اغ‑يوزنّ ار‑اغ‑بدّا‑يتمناد.