2 kurintus 13 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

سيگّلات غ‑يخفاون‑نّون

¹ ختاد ا‑را‑يگ تيس كراطّ‑توال ءيس‑ن‑دارون‑وشكيغ. والاينّي غمكلّي ءيتياران: «تاغاوسا نّا‑يجران، ف‑يمي ن‑سين ءيناگان نغد كراض ا‑س‑را‑تزگا.»

² ءيمّا غيلاد غ‑د‑فلّاون‑اگّوگغ، راد‑اون‑ينيغ مايلّي‑س‑اون‑نّيغ س‑لحقّ غاكود لّيغ‑ن‑دارون‑وشكيغ تيس سنات‑توال. نّيغ‑ت غاكودان ءي‑ويلّي سكارنين ما‑يُخشنّ ءينيغ‑اون‑ت كولّوكن. راد‑اون‑ت‑داغ‑ينيغ: ءيغ‑ن‑دارون‑وورّيغ تاوالا ياضني، ءور‑اكُّ‑راد‑رخوغ د‑يان ءيسكارن ما‑يُخشنّ.

³ غمكاد ا‑س‑راد‑اون‑ملغ تاماتارت لّي‑زگيگي‑تضالبم، باش ا‑تيسّانم ءيزد لماسيح ا‑يساوالن ف‑يمي‑نو. اشكو ءيتجهّد نتّا غ‑گراتون. ءور‑يضعف لّيغ ا‑ديدون‑يسكار.

⁴ س‑ضّعف ا‑س‑يمّوت ف‑وگّجدي، ءيمّا غيلاد ءيدّر س‑تحكيمت ءيتجهّدن ن‑ربّي. نضعف ءولا نكُّني زوند نتّان، والاينّي س‑تحكيمت ءيتجهّدن ن‑ربّي ا‑س‑ا‑ديدون‑نسكار، اشكو نمون ديدس غ‑تودرت‑نس.

⁵ سيگّلات غ‑يخف‑نّون ا‑تژرم ءيس‑تزگام غ‑وغاراس لّماسيح. ژرات مامنك ا‑تگام. ءيس‑ور‑تسّينم ماياد؟ ءيلّا ياسوع لماسيح غ‑وگُنس‑نّون، ءيغ‑نّيت‑ور‑تجليم زغ‑وغاراس.

⁶ رجوغ‑ن گيگون ا‑ور‑تسوينگيمّ ءيزد نكُّني ا‑يجلان.

⁷ ءيمّا غيلاد ار‑نتضالاب ربّي فلّاون ا‑ور‑تسكارم كرا يُخشنّ. ءور‑ا‑ت‑نتضالاب ف‑يخف‑نّغ ا‑گينّغ‑يبان ءيس‑نسكر كرا، واخّا ءيغ‑غالن كرا ن‑مدّن ءور‑نسكير يات. والاينّي ار‑ت‑نتضالاب فلّاون باش ا‑يبان ءيس‑تسكرم افولكي.

⁸ اشكو ءور‑نسّوگير يات ءي‑لحقّ. ءور‑نژضار ابلا ا‑سرس‑نسكار.

⁹ ءيمّا نكُّني ار‑نتفراح غاكود نّا‑نضعف تجهّدم كونّي، والاينّي ار‑نتضالاب ربّي ا‑توورّيم تفولكيم س‑وفولكي ءيكمّلن.

¹⁰ مايان ا‑ف‑اون‑ين‑وريغ تابرات‑اد، غيلاد غ‑د‑فلّاون‑اگّوگغ. ءيژلي‑يّي سيديتنّغ اد‑اون‑مالاغ ما‑كُن‑د‑يقّانّ ا‑تي‑تسكارم، ءورد ف‑ا‑كُن‑هلكغ والاينّي ف‑ا‑كُن‑عاونغ. والاينّي غاكود لّيغ را‑ن‑دارون‑اشكغ ءور‑ريغ ا‑ن‑افغ ءيس‑يّي‑يخصّا اد‑ديدون‑شقوغ.

¹¹ واي‑ايتما، اوال‑ينو ءيگُّران ءيگا‑ت: فرحات، ار‑تسكارم ف‑وفولكي، ار‑تزّعامّ ءي‑نگراتون، تگم يان غ‑يسوينگيمن‑نّون، ار‑تزرايم غ‑سّلامت. غمكاد ا‑س‑راد‑بدّا‑ديدون‑ييلي ربّي لّحنانت د‑سّلامت.

¹² تنسالّامات ءي‑نگراتون س‑ونسالّام ن‑تاگُمات.

¹³ ار‑ن‑فلّاون‑تسلّامن كولّو ءيمژلاين ن‑ربّي.

¹⁴ اد‑اون‑تيلي لباراكا ن‑سيديتنّغ ياسوع لماسيح ءولا لحنانت ن‑ربّي ءولا تامونت ن‑رّوح لقودوس كولّوكن.