2 kurintus 12 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تيوارگيوين لّي‑يژرا بولُس

¹ ءيقّان‑يّي‑د اد‑ساولغ ف‑ماد‑سكرغ، واخّا ءور‑گيس‑تلّي كرا لّفايتّ. راد‑اون‑ينيغ ف‑توارگيوين لّي‑يّي‑يملا سيديتنّغ ءولا تيغاوسيوين ياضني لّي‑يّي‑يسّبايّن.

² سّنغ يان‑ورگاز ءيگا وين لماسيح، ءيتيالال س‑ويس كراض ءيگنوان كّوژ د‑مراو ن‑وسگُّاس اياد. ءور‑سّينغ ءيزد س‑دّات ا‑س‑يتيالال نغد بلا دّات. ربّي ا‑يسّنّ.

³ سّنغ ءيس‑يتيالال‑ورگاز‑ان س‑تالعرصت لّمجد، ءور‑سّينغ ءيزد س‑دّات نغد بلا دّات. ربّي ا‑يسّنّ.

⁴ ءيمّا نتّا ءيسفلد ءي‑كرا ن‑تغاوسيوين، ءور‑يوفي ءيواليون ما‑س‑ا‑تنت‑يادّر ءولا زرينت ءي‑بنادم ا‑سرسنت‑يساول.

⁵ وان ارگاز‑ان ا‑ف‑راد‑ساولغ، والاينّي ءور‑راد‑ساولغ ف‑يخف‑ينو ابلا ف‑ضّعف لّي‑گيگي‑يلّان.

⁶ مراد ءيس‑ريغ اد‑ساولغ ف‑يخف‑ينو ءورد انافال ا‑راد‑گغ، اشكو لحقّ ا‑را‑تّينيغ. والاينّي ءور‑راد‑ساوالغ ف‑يخف‑ينو ا‑ور‑فلّا‑يغال كرا ن‑يان ءوگُّار ن‑ما‑گيگي‑يژرّا ءولا ما‑مي‑داري‑يسفليد.

اسنّان غ‑دّات

⁷ والاينّي ءيتياوفكا‑يّي يان‑وسنّان غ‑دّات‑نو، باش ا‑ور‑الّغ ءيخف‑ينو ف‑سّيبت ن‑تغاوسيوين گّوتنين لّي‑يّي‑يسّبايّن ربّي. اسنّان‑ان ءيگا امازان ن‑شيطان، ار‑يّي‑يسّرفوفون باش ا‑ور‑وورّيغ ار‑تالّغ ءيخف‑ينو.

⁸ كراطّ‑توال اد‑ضالبغ سيديتنّغ ا‑ت‑فلّا‑يسّيتّي

⁹ والاينّي ءينّا‑يّي: «ءور‑ك‑يخصّا ابلا لحنانت‑ينو. اشكو يان ءيضعفن ا‑غ‑را‑تيلي‑تحكيمت‑ينو ءيتجهّدن س‑وگُّار.» فرحغ غيلاد اد‑ساوالغ ف‑كولّو ما‑گيگي‑يضعفن، باش اد‑عمّرغ س‑تحكيمت ءيتجهّدن لّماسيح.

¹⁰ ار‑تقناعغ نكّي غاكود نّا‑ضعفغ، ءولا غاكود نّا‑يّي‑رگمن مدّن ءولا غاكود نّا‑كّاتغ تامّارا ار‑ترفوفونغ ار‑زرايغ غ‑تنوكموت ف‑سّيبت لّماسيح. اشكو غاكود نّا‑ضعفغ، هاتي تجهّدغ.

لخير لّي‑يسكر بولُس غ‑ايت‑كورينتوس

¹¹ نّيغ مايان زوند يان ءيفّوغن ءيخف‑نس، والاينّي كونّي ا‑يّي‑يرورن اد‑ساولغ غمكان، اشكو ءور‑تريم ا‑يّي‑تالغم غمكلّي فلّاون ءيلّان. واخّا ءور‑گيغ يات نكّي، ءور‑اكُّ‑يّي‑وفن مدّن‑ان لّي‑تگام د‑يرقّاسن هيّانين.

¹² كونّي تژرام گيگي تيميتار ن‑يان ءيگان ارقّاس ن‑صّاحت، اشكو سكرغ دارون لمعجيزات د‑لعجايب د‑لقوّات س‑صّبر ءيگّوتن.

¹³ ءيس‑يلّا كرا سكرغ‑ت ءي‑يمناگّارن ياضني ءور‑اون‑ت‑سكيرغ كونّي؟ غير تاغاوسا‑ياد ا‑يلّان: ءور‑زگيگون‑ومژغ ءيقاريدن. ءيس‑يُخشن مايد گيگون سكرغ باش ا‑كُن‑ضالبغ اد‑يّي‑تصامحم؟

¹⁴ ها‑يّي ءوجادغ غيلاد ا‑ن‑دارون‑اشكغ تيس كراطّ‑توال. ءور‑را‑زگيگون‑ضالبغ يات، اشكو كونّي اد‑ريغ ءورد ما‑يگان وينّون. ءور‑يلّي ف‑تاروا اد‑سّمونون ما‑س‑ا‑تعاوانّ ايت‑دارسن، والاينّي ءيلّا ف‑ايت‑دارسن اد‑تعاوانّ تاروا‑نسن.

¹⁵ راد‑فرحغ نكّي اد‑فكغ كولّو ماد‑داري‑يلّان، فكغ ءولا ءيخف‑ينو ف‑سّيبت‑نّون. ءيس‑ور‑را‑دارون‑عزّاغ ءيميكّ لّيغ داري تعزّام كونّي غونشكان؟

¹⁶ تسّنم ءيس‑ور‑فلّاون‑ژّايغ غ‑ووسّان‑ان. والاينّي ءيس‑سول‑گيگون‑يلّا ما‑يتّينين «بولُس ءيگا بو‑لحيلت، ءيزّري‑تّ فلّاون س‑تكركاس»؟

¹⁷ مامنك؟ ءيس‑جّو‑كُن‑شّيغ ف‑وفوس ن‑ويلّي‑اون‑ين‑وزنغ؟

¹⁸ نكّي ا‑يضالبن تيطوس ا‑ن‑ياشك س‑دارون، ازنغ‑ن ديدس گماتنّغ ياضني. والاينّي ءينيات‑يّي، ءيس‑جّو‑كُن‑يشّا تيطوس؟ ءيمّا نكّي د‑تيطوس، ار‑بدّا‑نسكار زوند زوند، ار‑نتنباض زوند زوند.

¹⁹ ءيس‑تغالم ءيس‑ننّا كولّو ماياد باش ا‑فلّانّغ‑تحكامّ كونّي، تينيم ءور‑گينّغ كرا لّعيب؟ والاينّي غ‑لگدّام ن‑ربّي ا‑غ‑ا‑نساوال س‑يسم لّماسيح. د‑كولّو ما‑نسكار، اي‑ايتما عزّانين، ار‑ت‑نسكار باش ا‑كُن‑نسّدوس.

²⁰ والاينّي كسوضغ ا‑كُن‑ين‑افغ ءور‑تگيم غمكلّي ريغ غاكود نّا‑ن‑دارون‑وشكيغ، تافم‑يّي‑ن ءولا نكّي ءور‑گيغ غمكلّي ترام. ءور‑ريغ ا‑كُن‑ين‑افغ ار‑تژيم ءي‑نگراتون ءولا‑دا‑تّيريم ما‑يگان وين وييّاض ءولا‑دا‑تّقلاقالم ءولا‑دا‑يكّات كود يان غير ف‑يخف‑نس ءولا‑دا‑ترگّمّ ءولا‑دا‑تساوالم غ‑وييّاض ءولا‑دا‑تسّيمغورم ءيخفاون‑نّون ءولا‑دا‑تسّروايم ماد‑دارون‑يلّان.

²¹ كسوضغ ا‑يّي‑يادج ربّي ارد‑يّي‑تيگُراژ غ‑گراتون غاكود نّا‑ن‑دارون‑وشكيغ، ار‑الّاغ ف‑ما‑گيگون‑يگّوتن ءور‑رين اد‑فلن لخُشانت لّي‑ميارن غايد ءيزرين، ار‑سول‑تفسادن ار‑تزنون ار‑تشتهون ءي‑نگراتسن.