2 kurintus 11 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

بولُس ءور‑يضالب يات ءي‑يخف‑نس

¹ صبرات ديدي ءيغ‑يّي‑تژرام ار‑ساوالغ ءيميكّ زوند يان ءيفّوغن ءيخف‑نس.

² تصبرم ديدي اشكو ار‑كُن‑تّيريغ س‑تايري ن‑ربّي، فكغ‑كُن ءي‑لماسيح زوند يات‑تسليت لّي‑غ‑ور‑يلّي كرا لّعيب، باش ا‑ور‑تيليم ءي‑كرا ن‑يان ياضني.

³ كسوضغ ا‑كُن‑يجلّو كرا ن‑يان ف‑يسوينگيمن‑نّون غمكلّي‑ستّ‑يزّري‑ولگمّاض س‑تكركاس‑نس ف‑يمّاتنّغ حوّا. ءيكساضغ ا‑توورّيم زغ‑تايري ءيصفان لّي‑س‑تّين تكّام ار‑تّيريم لماسيح س‑نّييت‑نّون.

⁴ اشكو ار‑تسفليدم س‑وانّا‑ن‑دارون‑يوشكان ار‑يتبرّاح س‑كرا ن‑ياسوع ءور‑يگي ياسوع لّي‑س‑اون‑نبرّح نكُّني. هاتي ار‑تّقبالم وانّا‑ياون‑ياكّان كرا ن‑رّوح ءور‑يگي رّوح لّي‑تقبلم يادلّي. ار‑تّامنم وانّا‑ياون‑ين‑يتاوين كرا لّخبار ءيفولكين ءور‑يگي لخبار ءيفولكين لّي‑س‑تومنم ف‑يمي‑نّغ.

⁵ والاينّي ءيرواس‑يّي ءيس‑ور‑يّي‑اكُّ‑وفن مدّن‑ان لّي‑تگام د‑يرقّاسن هيّانين.

⁶ واخّا دا‑تّينين كرا ن‑مدّن ءور‑سّينغ اد‑ساولغ، ها‑يّي سّنغ باهرا ما‑يُغژانّ. ءولا كونّي كولّوكن تژرام مايان غ‑كولّو ما‑نسكر غ‑گراتون.

⁷ غاكود لّيغ‑اون‑ين‑يويغ لخبار ءيفولكين ن‑ربّي ءور‑جّو‑زگيگون‑ضالبغ ءيقاريدن. ءودرغ ءي‑يخف‑ينو باش‑ا‑تالّم كونّي ءيخفاون‑نّون. ءيس‑يعيب ماين سكرغ؟

⁸ غ‑ووسّان‑ان ار‑تامژغ ماد‑حتاجّاغ زغ‑يمناگّارن ياضني، ار‑شتّاغ زغ‑لخير‑نسن باش اد‑اون‑خدمغ.

⁹ ءيمّا غاكود لّيغ لكمغ ف‑كرا غ‑دارون ءور‑ضالبغ يان ف‑يات، اشكو ايتماتن لّي‑ن‑وشكانين زغ‑ماكيدونيّا ءيوين‑يّي‑ن كولّو ماد‑حتاجّاغ. غمكلّي سكرغ غ‑ووسّان‑ان ا‑راد‑بدّا‑سكارغ. ءور‑سار‑را‑زگيگون‑ضالبغ يات ءي‑يخف‑ينو.

¹⁰ س‑لحقّ لّماسيح لّي‑گيگي‑يلّان، ءور‑را‑ييژضار يان غ‑تمازيرت ن‑اخايا كولّوتّ ا‑يّي‑يسّفسّا ف‑واوال‑اد.

¹¹ ماخ ايلّيغ‑اون‑ساولغ غمكاد؟ ءيس‑ور‑داري‑تعزّام؟ ربّي ا‑يسّنّ مامنك ا‑داري‑تعزّام باهرا.

¹² غمكان ا‑راد‑بدّا‑سكارغ، باش ا‑ور‑يژضارن كرا ن‑مدّن اد‑تالغن ءيخف‑نسن ار‑تّينين ءيزد زوند نكُّني اد‑سكارن.

¹³ اشكو وان مدّن‑ان ءورد ءيرقّاسن ن‑صّاحت اد‑گان، والاينّي گان ءيخدّامن ءيمغضارن ار‑تبدّالن سّيفت‑نسن باش اد‑رواسن ءيرقّاسن لّماسيح.

¹⁴ ءور‑يگي غاياد لعجب، اشكو شيطان ءولا نتّان ار‑يتبدّال سّيفت‑نس باش ا‑يرواس يا‑لّمالاك ءيفاون.

¹⁵ ا‑ور‑نتعجّاب ءيغ‑نژرا ءيخدّامن‑نس ار‑تبدّالن سّيفت‑نسن باش اد‑رواسن ءيخدّامن ن‑وفولكي. ءيمّا نتني راد‑اسن‑ييلي ماد‑اسن‑يگان.

تارفوفنت ن‑بولُس

¹⁶ راد‑اون‑داغ‑ينيغ ا‑ور‑تغالم ءيس‑فّوغّ ءيخف‑ينو. والاينّي ءيغ‑سول‑گيگون‑يلّا ما‑يغالن غمكان، راد‑اس‑ينيغ ا‑يّي‑يقبل زوند يان ءينوفلن، باش اد‑الغّ ءيخف‑ينو ءولا نكّي يان ءيميكّ.

¹⁷ ءورد اوال ن‑سيديتنّغ ايد‑اون‑تّينيغ غيلاد، هاتي راد‑الغّ ءيخف‑ينو زوند يان ءينوفلن.

¹⁸ گّوتن مدّن ار‑تالغن ءيخفاون‑نسن ف‑ماد‑اسن‑يلّان غ‑دّونيت‑اد. هاتي راد‑ساولغ ءولا نكّي غمكان،

¹⁹ اشكو ار‑كُن‑يتعجاب ا‑تّصبارم د‑ينافالن كونّي لّي‑يگان ءيخف‑نّون د‑ايت‑لعاقل.

²⁰ هاتي ار‑تّصبارم د‑كولّو وانّا ءيران ا‑كُن‑يگ د‑يسمگان ييري ا‑كُن‑يژيگ ءيشّ‑كُن ءيحگر‑كُن يوت‑كُن ف‑وودم.

²¹ ءيمّا نكُّني، ءور‑جّو‑نزعم اد‑اون‑نسكر غمكان، ها‑يّي حشمغ اد‑اون‑ت‑ينيغ. والاينّي ءيغ‑يلّا ما‑يزعمن ا‑يالغ ءيخف‑نس ف‑كرا، ءولا نكّي راد‑زعمغ اد‑الغّ ءيخف‑ينو ف‑مايان. ها‑يّي ساولغ غيلاد زوند يان ءينوفلن.

²² ءيزد س‑يواليون ن‑ايت‑يودايا ا‑س‑ا‑ساوالن مدّن‑ان؟ ءولا نكّي ار‑ساوالغ س‑يواليون ن‑ايت‑يودايا. ءيزد زغ‑ايت‑ربّي ا‑زغ‑گان؟ ءولا نكّي گيغ زغ‑ايت‑ربّي. ءيزد زغ‑تاسوت ن‑يبراهيم ا‑زغ‑گان؟ ءولا نكّي گيغ زغ‑تاسوت ن‑يبراهيم.

²³ ءيس‑گان ءيخدّامن لّماسيح؟ گيغ ءولا نكّي اخدّام لّماسيح ءوگُّار‑نسن. ها‑يّي غيلاد ار‑ساوالغ زوند يان ءينوفلن. ار‑تخدامغ ءوگُّار ن‑مدّن‑ان، ار‑تّيليغ غ‑لحبس ءوگُّار‑نسن. شّيغ اكوراي ءوگُّار‑نسن. منّاوت‑توال ا‑ن‑تمناگّارغ د‑لموت.

²⁴ سمّوست‑توال ا‑يّي‑سّغورشن ايت‑يودايا ار‑يّي‑شّوشان كراطّ ءيد‑مراوت د‑تژا (39) ن‑ضّربت.

²⁵ كراطّ‑توال ا‑يّي‑تنت‑شّوشان ايت‑رّومان س‑وكوراي. يات‑توال رجمن‑يّي مدّن س‑يژران. كراطّ‑توال اد‑يّي‑ترژا تاناوت غ‑ومدا، كغ ءيض د‑واسّ غ‑وامان.

²⁶ ار‑باهرا‑تمودّوغ. زريغ غ‑لخاطار ن‑يسافّن د‑يقطّاعن. زريغ غ‑لخاطار غ‑گر مدّن‑ينو ن‑ايت‑يودايا ءولا غ‑گر ايت‑تميزار ياضني. زريغ زغ‑گيس غ‑تمدينين ءولا لخلا ءولا امدا. زريغ زغ‑گيس غ‑گر ايت‑تكركاس لّي‑يتّينين ءيس‑گان ايت‑لماسيح.

²⁷ ار‑كّاتغ تاكرّايت ار‑كّاتغ تامّارا. منّاوت‑توال اد‑سّيكّيغ ءيطس، ءور‑شّيغ ءولا سويغ. ءور‑داري ماد‑شتّاغ ءولا ماد‑لسّاغ ءولا مانيغ ا‑تنتالغ ءي‑وسمّيض.

²⁸ گّوتنت تاسّاسين ياضني، والاينّي زوويدغ‑اسنت كولّوتنت تاژايت ن‑تاغوفت لّي‑بدّا‑تاسيغ كرايگاتّ اسّ ف‑كولّو ءيمناگّارن ن‑ايتماتن.

²⁹ غاكود نّا‑يلّا ما‑يضعفن، ها‑يّي سّحسّاغ س‑ضّعف‑نس. غاكود نّا‑يلّا ما‑يضرن، ار‑يتبّي غ‑تاسا‑نو.

³⁰ ءيغ‑يّي‑د‑يقّان اد‑ساوالغ ف‑ماد‑سكرغ، راد‑ساولغ ف‑ضّعف‑ينو.

³¹ ربّي باباس ن‑سيديتنّغ ياسوع ا‑يسّنّ ءيس‑ور‑ا‑سّكيركيسغ. نتّان ا‑يستهلّان ا‑ت‑نتالغ غيلاد ءولا كولّو مايد‑د‑يفتان.

³² لّيغ تّين كّيغ غ‑تمدينت ن‑ديماشق، ءينكر لحاكم لّي‑يلّان غ‑دّو‑وگلّيد حاريت، يوصّا ءيعسكرين اد‑ضوفن ءيماون ن‑تمدينت باش ا‑يّي‑امژن.

³³ والاينّي گان‑يّي كرا ن‑مدّن غ‑يان‑وريال، زّوگزن‑يّي زغ‑يان‑وارّياح ءيلّا غ‑وغُراب ن‑تمدينت، نجمغ زغ‑وفوس‑نس.