2 kurintus 10 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

اوال لّي‑يرور بولُس ءي‑ويلّي گيس ساوالنين

¹ ءيمّا غيلاد را‑كُن‑ضالبغ نكّي بولُس س‑يسم لّماسيح لّي‑بدّا‑يحنّان ءيصبر د‑كود يان، اشكو ار‑فلّا‑تّينين كرا ن‑مدّن ءيس‑ضعفغ غاكود نّا‑دارون‑لّيغ، شقوغ ديدون غاكود نّا‑فلّاون‑اگّوگغ.

² والاينّي را‑كُن‑ضالبغ ا‑تسكرم ما‑كُن‑د‑يقّانّ، باش ا‑ور‑يّي‑يخصّا اد‑ديدون‑شقوغ غاكود نّا‑ن‑وشكيغ، غمكلّي‑يّي‑يخصّا اد‑شقوغ د‑كرا ن‑مدّن لّي‑غالنين ءيس‑ا‑نسكار س‑ما‑يتّيري ءيخف‑نّغ.

³ واخّا نزدغ غ‑دّونيت‑اد، ءور‑ا‑نتمّاغ س‑غايلّي‑س‑ا‑تمّاغن مدّن ن‑دّونيت‑اد.

⁴ ءيمقلاد لّي‑س‑ا‑نتمّاغ نكُّني ءور‑گين وين دّونيت‑اد، والاينّي تلّا‑گيسن‑تحكيمت ءيتجهّدن ن‑ربّي ا‑سرسن‑نسّضار لبروج دوسنين.

⁵ ار‑نسّگريويل ءيسوينگيمن ن‑بنادم، ار‑نخلّو ءيواليون ن‑كولّو ما‑يتالّن ءيخف‑نس ا‑يضاضّ تاواسّنا ن‑ربّي، ار‑نكّرس كولّو تينباضين ن‑مدّن باش اد‑وورّين س‑تنباضين لّماسيح.

⁶ ءيمّا كونّي، ءيغ‑ترام ا‑تسكارم كولّو س‑تنباضين لّماسيح، نوجاد نكُّني ا‑نحكام ف‑وانّا ءور‑سرسنت‑يسكارن.

⁷ والاينّي كونّي ار‑تژرّام غير ما‑يلّان غ‑برّا. ءيس‑دارون‑يلّا ما‑يتّينين ءيگا اخدّام لّماسيح؟ ءيلّا فلّاس ا‑ور‑يتّو ماياد: ءولا نكُّني نگا ءيخدّامن لّماسيح.

⁸ ءور‑اكُّ‑راد‑حشمغ، واخّا دا‑ساوالغ باهرا ف‑مامنك اد‑اغ‑يژلي سيديتنّغ اد‑اون‑نمالا ما‑كُن‑د‑يقّانّ ا‑تي‑تسكارم. اشكو ءيژلي‑اغ ءورد ف‑ا‑كُن‑نهلك والاينّي ف‑ا‑كُن‑نعاون.

⁹ ا‑ور‑تغالم ءيس‑ريغ ا‑كُن‑ين‑سّيويدغ س‑تبراتين‑ينو.

¹⁰ ءيلّا ما‑يتّينين «غاكود نّا‑ياغ‑د‑يورا بولُس ءيتجهّد ءيشقو ديدنّغ، والاينّي غاكود نّا‑د‑دارنّغ‑يوشكا ءيضعف ءور‑يسّين مامنك ا‑يساوال.»

¹¹ ءيمّا وان مدّن‑ان، ءيلّا فلّاسن اد‑يسّانّ ماياد: غاكود نّا‑ن‑دارون‑نوشكا ار‑بدّا‑نسكار كولّو س‑مكلّي‑اون‑ين‑ننّا لّيغ‑د‑ناگّوگ.

¹² ءور‑نزعم ا‑نسّنگادّا ءيخفاون‑نّغ د‑كرا ن‑مدّن لّي‑تالغنين ءيخف‑نسن، ءولا را‑نيني ءيس‑تن‑نوف. اشكو لّيغ ا‑تّينين ءي‑نگراتسن «كرا يوف كرا» نغد «كرا يوگُر كرا» ءيبان فلّاسن ءيس‑ور‑فهيمن يات.

¹³ ءيمّا نكُّني ءور‑را‑ن‑نتياگّال س‑ما‑ن‑فلّانّغ‑ياگّوگن، والاينّي را‑نگ غمكلّي نگا غ‑تووري‑اد‑اغ‑يفكا ربّي لّي‑س‑اغ‑ن‑ييوي ءولا س‑دارون.

¹⁴ ءور‑نري ا‑نسّورف يووتّا س‑يلّي ءور‑اغ‑يفكي ربّي. والاينّي ءيفكا‑ياغ كرا غ‑دارون، اشكو نكُّني ا‑يزوارن ءيس‑ن‑نمودّا نسّلكم‑اون‑ين لخبار ءيفولكين لّماسيح.

¹⁵ ءور‑اكُّ‑ا‑نتالغ ءيخف‑نّغ ف‑كرا‑ور‑نسكير ءولا ف‑ماد‑سكرن وييّاض، والاينّي ار‑ن‑نترجو غ‑يگر ن‑دارون ا‑گيس‑تيگات‑تمگرا لّيغ ا‑تّزايادم غ‑ليمان.

¹⁶ غمكان ا‑س‑را‑ندّو تيگيرا، ار‑نتبرّاح س‑لخبار ءيفولكين غ‑تميزار ياضني اگّوگن‑ين فلّاون، بلا‑دا‑نتالغ ءيخف‑نّغ ف‑ما‑يتياوسكارن غ‑يگران ن‑مدّن ياضني.

¹⁷ غمكلّي ءيتياران: «وانّا ءيران ا‑يالغ، يالغ سيديتنّغ.»

¹⁸ اشكو ءورد يان ءيرضان ءيخف‑نس ا‑را‑يتياوقبال، والاينّي يان ف‑يرضا سيديس.