2 bṭrus 3 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

يان ءيميكّ را‑د‑ياشك لماسيح

¹ واي‑ايتما عزّانين، تابرات‑اد تگا تيس سنات‑تبراتين لّي‑اون‑ين‑وريغ. سّكتيغ‑اون‑د سرسنت تيغاوسيوين‑اد باش ا‑تسوينگيمّ غ‑ما‑يُغژانّ.

² ريغ ا‑دي‑تكتيم ءيواليون لّي‑س‑نّان لانبيا ن‑ربّي غايد ءيزرين، تكتيم‑د المّود لّي‑ف‑كُن‑يوصّا‑ونجّام سيديتنّغ ف‑يمي ن‑يرقّاسن‑نّون.

³ والاينّي تاغاوسا ءيهيّان ا‑ستّ‑يگان، ا‑تيسّانم ءيس‑راد‑د‑اشكين كرا ن‑يطنّاژن غ‑ووسّان‑اد گُّرانين ار‑باهرا‑تطناژن ار‑سكارن ف‑كولّو ما‑تّيرين ءي‑يخف‑نسن

⁴ ار‑تّينين: «مانزا سيديتون؟ ءيس‑ور‑ينّي را‑د‑ياشك؟ ژرات، منشك اياد س‑زرين ءيمزوورا‑نّغ، والاينّي سول ءيقاما كولّو غمكلّي ءيگا زغ‑يسيزوار، غايكلّي تّياوخلاق دّونيت سول س‑غيلاد.»

⁵ ءيمّا نتني ار‑تّيرين اد‑تّون ءيزد س‑واوال‑نس ا‑س‑يخلق ربّي ءيگنوان غ‑يسيزوار، ءيسكر ءيكالّن غ‑گر‑وامان ءيسكر‑تن س‑وامان.

⁶ تدل ءيلمّا دّونيت ن‑ووسّان‑ان س‑وامان، تّياوهلاك كولّوتّ.

⁷ ءيمّا غيلاد س‑واوال‑نس ا‑س‑يحضا ربّي ءيگنوان د‑واكال، باش ا‑تياوهلاكن س‑لعافيت غ‑واسّ لّحساب لّي‑غ‑را‑يهلك غويلّي سرس رورنين تيغوردين.

⁸ واي‑ايتما عزّانين، ا‑ور‑تتّوم تاغاوسا‑ياد: ءيگا يان‑واسّ دار سيديتنّغ زوند الف ن‑وسگُّاس، ءيگ الف ن‑وسگُّاس زوند يان‑واسّ.

⁹ ءور‑يماطل سيديتنّغ ا‑يسكر مايلّي‑س‑ينّا، واخّا دا‑تّينين كرا ن‑مدّن ءيماطل. اشكو ار‑ديدون‑يتصبار. ءور‑يري نتّا ا‑يتياوهلاك يان، والاينّي ءيرا كولّو مدّن اد‑وورّين فلن ءيسكّيرن‑نسن أُخشنّين.

¹⁰ والاينّي اسّ ن‑سيديتنّغ را‑د‑ياشك زوند امخّار. راد‑يتّين ءيگنوان س‑يجّيج ءيتجهّدن، ءيفنو كولّو ما‑گيسن‑يلّان س‑لعافيت، تجدر اكال ءولا كولّو ما‑گيس‑سكرن مدّن.

¹¹ را‑يتياوهلاك كولّو ما‑يلّان. ف‑مايان ا‑ف‑را‑كُن‑سقساغ: مان مدّن زغ‑را‑تگم؟ ءيس‑ور‑را‑تّيريم ا‑تسكارم افولكي ار‑تّرضوم ربّي

¹² غيلاد غ‑ا‑تّقلم س‑واسّ ن‑ربّي، ار‑ت‑يد‑تسّاكمورم؟ غاسّان ا‑را‑تياوهلاكن ءيگنوان س‑لعافيت، ءيفسي كولّو ما‑يلّان س‑ترغي ءيگّوتن.

¹³ ءيمّا نكُّني ار‑نتقل س‑مايلّي‑س‑اغ‑ينّا ربّي، ار‑ن‑نترجو ءيگنّا لّجديد د‑واكال لّجديد، عمّرن س‑كولّو ما‑يرضان ربّي.

¹⁴ ءيمّا غيلاد غ‑ا‑تّقلم س‑ماياد، اي‑ايتما عزّانين، گات‑ن تيقّي‑نّون ا‑بدّا‑تيلي سّلامت غ‑گراتون د‑ربّي، بلا گيگون ءيلّا كرا لّعيب ءولا كرا يُخشنّ غ‑وولاون‑نّون.

¹⁵ سوينگيمات ف‑مامنك ا‑ديدون‑يصبر سيديتنّغ باش ا‑توورّيم تنجمّ، غمكلّي‑اون‑ين‑يورا ءولا گماتنّغ ءيعزّان بولُس س‑تحكيمت لّي‑اس‑يفكا ربّي.

¹⁶ غمكاد ا‑يتّيني ف‑تغاوسيوين‑اد غ‑كولّو تيبراتين‑نس. كرا غ‑ما‑يتارا، ءور‑يرخي ا‑ت‑نفهم، ءيمّا كرا ن‑يبوجاديين د‑مدّن فسّوسنين ار‑سّلولّين ءيواليون‑نس زوند ماد‑سّلولّين ءيگزمان ياضني غ‑وارّاتن ن‑ربّي. ار‑دي‑تراران لهالاك ف‑يخفاون‑نسن.

¹⁷ ءيمّا كونّي اي‑ايتما عزّانين، لّيغ تسّنم كولّو ماياد ءور‑تا‑يجري، رارات لعاقل ا‑كُن‑ور‑يلدي كرا ءيجلان ءيفّوغن زغ‑واوال ن‑ربّي ءولا تضرم زغ‑لامان‑اد غ‑تلّام.

¹⁸ زايدات ار‑تّيمغورم غ‑لباراكا د‑تواسّنا ن‑ونجّام سيديتنّغ ياسوع لماسيح. نتّان ا‑بدّا‑نتالغ غيلاد ءولا كولّو مايد‑د‑يفتان. امين.