2 bṭrus 2 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

ءيمسلمدن ن‑تكركاس

¹ غايد ءيزرين كّان‑تّين كرا ن‑مدّن غ‑گر ايت‑ربّي ار‑تّينين ءيزد لانبيا اد‑گان والاينّي ار‑سّكيركيسن. غمكان ا‑س‑راد‑داغ‑يلين ءيمسلمدن ايت‑تكركاس غ‑دارون. س‑تنتلا ا‑س‑را‑ن‑شّكشامن ءيسوينگيمن ءور‑أُغژانّين ار‑تّاوين س‑لهالاك. راد‑تراران تيغوردين‑نسن س‑سيديتسن ءيتجهّدن لّي‑تن‑يفران اد‑گن وينس. راد‑زّوگزن لهالاك ف‑يخف‑نسن غ‑يات‑تاساعت.

² ءيگّوت ما‑را‑يتامژ اغاراس‑نسن لّفساد. ف‑سّيبت‑نسن ا‑ف‑راد‑رگّمن مدّن غ‑وغاراس لّحقّ.

³ را‑كُن‑شتّان س‑يواليون خوانين، اشكو ار‑بدّا‑تّيرين ما‑يگان وين وييّاض. والاينّي زغ‑يسيزوار ا‑گيسن‑يتمناد غوالّي را‑فلّاسن‑يوت لحوكم. ءور‑ا‑يگان غوالّي را‑تن‑يهلك.

⁴ اشكو ءور‑يصامح ربّي ءي‑لمالايكا لّي‑فّوغنين زغ‑واوال‑نس، والاينّي ءيلوح‑تن‑ين غ‑تدروت، ءيدحي‑تن‑ين س‑توگّوگت ن‑تيلّاس ا‑غين‑تياماژن ار اسّ لّحساب.

⁵ ءور‑يصامح ربّي ءي‑يسيزوار ن‑دّونيت، والاينّي يولّ‑د امان ايلّيغ دلن كولّو دّونيت ن‑ويلّي سرس رورنين تيغوردين‑نسن. ءور‑زگيسن‑يجّنجم ابلا نوح لّي‑يتبرّاحن س‑مايلّي ءيرضان ربّي، نتّا د‑سّا ن‑مدّن ياضني.

⁶ يوت ءيلمّا ربّي لحوكم ف‑تمدينين ن‑سادوم د‑عامورا، ءيهلك‑تنت س‑لعافيت، باش اد‑ژرن كولّو ويلّي سرس رورنين تيغوردين ما‑يجران ءي‑تمدينين‑ان، ءيسّانّ ما‑راد‑اسن‑يجرو ءولا نتني.

⁷ والاينّي ءيجّنجم لوط لّي‑يگان ارگاز ءيفولكين، اشكو طيّر‑اس ءي‑لوط باهرا ف‑مامنك اد‑فسادن مدّن‑ان أُخشنّين.

⁸ ءيزدغ‑ورگاز‑ان ءيفولكين غ‑گراتسن. اسّ ف‑واسّ ار‑تي‑تّاغ‑تگوضي غ‑وول‑نس ءيفولكين غاكود لّيغ ا‑يتمناد ار‑يسفليد ءي‑يسكّيرن‑نسن أُخشنّين.

⁹ كولّو مايان ءيملا‑ياغ ءيس‑يسّن سيديتنّغ مامنك ا‑يجّنجام غويلّي توقّارنين ربّي زغ‑تنوكموت نّا‑تن‑يتارمن، ييسّان مامنك ا‑يتحضو غويلّي أُخشنّين ار اسّ لّحساب لّي‑غ‑را‑فلّاسن‑يوت لعقوبيت لّي‑اسن‑يگان.

¹⁰ را‑ستّ‑يوت س‑وگُّار ف‑ويلّي سكارنين س‑شّهوات لّي‑باهرا‑ركانين حگرن غوالّي فلّاسن ءيحكامن. ءيمّا ءيمسلمدن‑ان شقان باهرا. ار‑زّعامن ءيخفاون‑نسن، ار‑رگّمن ءولا غ‑ينمغورن ن‑يگنوان بلا‑دا‑تيكساضن.

¹¹ واخّا‑تن‑وگُرن لمالايكا تجهّدن فلّاسن باهرا، ءور‑ا‑رگّمن نتني غ‑مدّن‑ان غ‑دار ربّي.

¹² والاينّي ءيمسلمدن‑ان ار‑رگّمن غ‑ما‑ور‑فهيمن، گن زوند لوحوش شقانين لّي‑سكارنين والاينّي ءور‑سّينّ ماخ ايلّيغ ا‑سكارن، ار‑تلالن غير باش ا‑تياماژن تياوهلاكن. ءولا مدّن‑ان را‑تياوهلاكن زوند لوحوش.

¹³ راد‑اسن‑د‑يرار ربّي ارفوفن ف‑ورفوفن لّي‑سكارن ءي‑وييّاض. نتني ءيعجب‑تن اد‑سكارن ما‑يتّيري ءيخف‑نسن ءولا غ‑وزال غ‑لگدّام ن‑مدّن. ءيركان د‑لعار اد‑گان غ‑دارون، ار‑تفراحن س‑تيلّاي‑نسن لّيغ ا‑ديدون‑تمونون ف‑يمنسيون‑نّون.

¹⁴ ار‑بدّا‑تّيرين اد‑ژرن لفساد، ءور‑ا‑تشباعن زغ‑دّنوب، ار‑ن‑لدّين غويلّي ءور‑زگانين، ميورن اد‑سّمونون ماد‑ران ءي‑يخف‑نسن. تاروا ن‑خزيت اد‑گان.

¹⁵ فّوغن اغاراس لّي‑ينمن، مونّ د‑وغاراس ن‑بالعام يوس ن‑باعور لّي‑دار ءيعزّا ا‑يامژ ءيقاريدن س‑ما‑يُخشنّ.

¹⁶ نتّا، ءيژي ديدس ءولا ءوغيّول‑نس ف‑دّنوب لّي‑يسكر. واخّا ءور‑ا‑ساوالنت لبهايم، تساول سرس لبهيمت‑ان س‑واوال ن‑بنادم، باش ا‑تحصار نّابي‑ان غ‑ونوفل‑نس.

¹⁷ ءيمّا مدّن‑ان، زوند لعيون قّورنين اد‑گان، ءولا زوند ءيمدلا ءيدحي‑تن‑واضو ءيتجهّدن. ءيسكر‑اسن ربّي ادغار غ‑تيلّاس اگّوگنين.

¹⁸ اشكو ار‑سّفورّوگن س‑يواليون خوانين. س‑شّهوات أُخشنّين ا‑س‑ا‑ن‑لدّين مدّن لّي‑بحرا‑د‑وورّينين زغ‑گر ويلّي جلانين.

¹⁹ ار‑تّينين راد‑اسن‑فسّين زغ‑يسكراف، ءيمّا نتني سول گان ءيسمگان ءي‑لفساد. اشكو كولّو وانّا ءينرا كرا، ءيگا ءيسمگ ءي‑غايلّي‑ت‑ينران.

²⁰ ءيغ‑د‑نجمن مدّن زغ‑يركان ن‑دّونيت س‑تواسّنا ن‑ونجّام سيديتنّغ ياسوع لماسيح والاينّي وورّين تيگيرا تياسّاسن‑داغ س‑يركان‑ان ايلّيغ‑تن‑نران، هاتي يوورّي ءيسيگُّرا ن‑مدّن‑ان يُخشن ءوگُّار ن‑يسيزوار‑نسن.

²¹ يوف‑اسن مراد ءيس‑ور‑اكُّ‑سّينّ اغاراس ن‑وفولكي، ءولا ارد‑ت‑يسّانّ رارن ءيلمّا تيغوردين س‑واوال لّي‑ف‑تن‑يوصّا ربّي.

²² سكرن نتني زوند لمعنا‑ياد ءيلّان: يوضا‑ويدي س‑يراران‑نس، توورّي تيلفت لّي‑يارودن ا‑ترورض غ‑تالّاغت.