2 bṭrus 1 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ زغ‑سيمعان بطرُس اخدّام د‑ورقّاس ن‑ياسوع لماسيح. ءي‑ويلّي مي ءيتياوفكا ليمان ءيعزّان لّي‑اغ‑د‑يتياوفكان ءولا نكُّني س‑وفولكي ن‑ربّي‑نّغ د‑ونجّام‑نّغ ياسوع لماسيح.

² ا‑فلّاون‑تيگات لباراكا د‑سّلامت غيلاد غ‑تسّنم ربّي ءولا سيديتنّغ ياسوع.

زايدات تيمغورم غ‑وفولكي ن‑ربّي

³ س‑تحكيمت‑نس ءيتجهّدن ا‑س‑اغ‑د‑يفكا ربّي كولّو ما‑نحتاجّا باش ا‑ندّر غ‑دّونيت ار‑ت‑نترضو. اشكو نوورّي نسّن غوالّي‑اغ‑د‑يغران ا‑نكشم س‑لمجد‑نس د‑وفولكي‑نس.

⁴ د‑غمكاد ا‑س‑اغ‑لّانت لباراكات هيّانين عزّانين لّي‑ف‑ينّا راد‑اغ‑تنت‑يفك، باش ا‑توورّيم تگم غمكلّي ءيگا ربّي، تنجمّ زغ‑كولّو ما‑يتاوين غ‑دّونيت س‑لهالاك ف‑سّيبت ن‑مايلّي ءيتّيري بنادم ءي‑يخف‑نس.

⁵ ف‑مايان ا‑ف‑كُن‑د‑يقّان ا‑ن‑تگم تيقّي ا‑تزايدم ف‑ليمان‑نّون ا‑باهرا‑تفولكيم، تزايدم ف‑وفولكي ا‑باهرا‑تيسّانم ربّي،

⁶ تزايدم ف‑تواسّنا ن‑ربّي ا‑بدّا‑تغويم غ‑يخف‑نّون، تزايدم ف‑مايان ا‑باهرا‑تزگام غ‑لحقّ، تزايدم ف‑مايان ا‑بدّا‑ترضوم ربّي،

⁷ تزايدم ف‑مايان ا‑باهرا‑تّحوبّوم مدّن، تزايدم ف‑مايان ا‑بدّا‑تحنّوم غ‑وييّاض.

⁸ ءيغ‑ا‑گيگون‑تّيگاتنت كولّو‑تغاوسيوين‑اد، را‑تيژضارم ءي‑كيگان ار‑دي‑تّاويم لغلّت ءيگّوتن غيلاد غ‑تسّنم سيديتنّغ ياسوع لماسيح.

⁹ ءيمّا وانّا ءور‑دار تيغاوسيوين‑اد، هاتي ءيبوكض ءور‑ا‑يتّيسفيو يات، ءيتّو ءيس‑ت‑يسّغوس لماسيح زغ‑دّنوب لّي‑يسكر غايد ءيزرين.

¹⁰ واي‑ايتما، ف‑مايان ا‑ف‑راد‑اون‑ينيغ، گات‑ن تيقّي‑نّون س‑وگُّار ا‑باهرا‑تزگام غ‑وغاراس لّي‑س‑اون‑د‑يغرا ربّي ءيژلي‑كُن‑د سرس. اشكو ءيغ‑ا‑تسكارم س‑غمكان ءور‑را‑سار‑تجلوم،

¹¹ هاتي را‑تكشمّ س‑لفرح ءيگّوتن س‑تگلديت ءيدومن ن‑ونجّام سيديتنّغ ياسوع لماسيح.

¹² ريغ‑بدّا ا‑ياون‑د‑سّكتايغ تيغاوسيوين‑اد، واخّا‑تنتي‑تسّنم تزگام غ‑لحقّ لّي‑مي‑تسفلدم.

¹³ اشكو سوانگمغ ءيس‑يشوا ا‑بدّا‑سّرغاغ ما‑يلّان غ‑يخف‑نّون كولّو ماد‑سولغ غ‑وخيّام‑اد لّي‑يگان دّات‑ينو.

¹⁴ اشكو سّنغ يان ءيميكّ راد‑خووغ اخيّام‑اد. ماياد، ءيملا‑يّي‑ت‑يد سيديتنّغ ياسوع لماسيح،

¹⁵ والاينّي را‑ن‑تگّاغ تيقّي‑نو باش ا‑تيژضارم ا‑بدّا‑تسوينگيمّ غ‑تغاوسيوين‑اد غاكود لّيغ ءور‑را‑سول‑ديدون‑يليغ.

توگّا ف‑تموغرا لّماسيح

¹⁶ ءور‑ا‑نبنّو ف‑كرا ن‑تحاجيّين تياوسكارنين س‑لعاقل ن‑بنادم غاكود لّيغ‑اون‑نساول ف‑مامنك ا‑د‑يوشكا سيديتنّغ ياسوع لماسيح س‑تحكيمت ءيتجهّدن. اشكو نكُّني نژرا تيموغرا‑نس،

^17-18 نيلي ديدس ف‑وورير امژلاي، نسفلد ءي‑واوال زغ‑يگنوان لّيغ‑د‑يسّبايّن ربّي باباتنّغ لمجد لّماسيح د‑لهيبت‑نس. ءيساول‑د‑واوال زغ‑لمجد ن‑تاتّويت ءينّا: «غواد ءيگا ءيوي ءيعزّان. فرحغ سرس باهرا.»

¹⁹ مايان ا‑دارنّغ‑يزّگان ءيواليون لّانبيا س‑وگُّار. افولكي ا‑را‑تسكارم ءيغ‑ا‑ستّي‑تّاويم غ‑ماد‑نّان نتني، اشكو ءيگا‑واوال‑نسن زوند تيفاوت لّقنديل، ار‑يتّيسفيو غ‑تيلّاس ارد ءيفاو‑واسّ ءيغلي‑د ءيتري ن‑صّباح غ‑وولاون‑نّون.

²⁰ والاينّي تاغاوسا ءيهيّان ا‑ستّ‑يگان، ا‑تيسّانم ءيس‑ور‑يژضار يان س‑يخف‑نس ا‑يفهم لمعنا ن‑ماد‑نّان لانبيا غ‑وارّاتن ن‑ربّي.

²¹ اشكو ءور‑د‑يوشكي كرا ن‑واوال ن‑ربّي زغ‑لعاقل ن‑بنادم، والاينّي ار‑ساوالن مدّن‑ان س‑يواليون لّي‑اسن‑د‑يمالا ربّي غمكلّي‑تن‑يتگوّاد رّوح لقودوس.