1 timutaws 6 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ ءيمّا غويلّي لّانين غ‑وزاگلو ن‑تووري ءيشقان، ءيلّا فلّاسن اد‑توقّارن ءيد‑سيديتسن، باش ا‑ور‑د‑يرار يان تيرگّام ءي‑يسم ن‑ربّي ءولا المّود‑نّغ.

² وانّا مي ءيگا سيديس امومن، ءيخصّا‑ت ا‑ور‑يحگر سيديس ف‑سّيبت ن‑ما‑يگا گماس. ءيلّا فلّاس ا‑يتخدام س‑وگُّار د‑نّييت، اشكو غوالّي ءيتامژن لخير غ‑تووري‑نس ءيگا امومن ءيگ زغ‑ايتماس عزّانين. سّلماد تيغاوسيوين‑اد ءي‑ايتماتن ار‑اسن‑تّينيت اد‑سكارن غمكاد.

لخير لّي‑اغ‑يلّان غ‑وغاراس ن‑ربّي

³ هان كرا ن‑مدّن ار‑سّلمادن تينباضين ياضني ءور‑د‑مشاشكانت د‑يواليون صحانين ن‑سيديتنّغ ياسوع لماسيح ءولا المّود لّي‑س‑يرضا ربّي.

⁴ نتني ار‑باهرا‑سّيمغورن ءيخف‑نسن والاينّي ءور‑سّينّ يات. ءيعجب‑تن اد‑تمحاكّان ار‑تمجاحادن ف‑يواليون، ايلّيغ ا‑توورّين ار‑تحسادن ار‑تژين ار‑رگّمن ار‑تّوهامن.

⁵ ءور‑ا‑تيژضارن مدّن‑ان اد‑د‑مشاشكان، ءيجلو‑اسن لعاقل فّوغن زغ‑لحقّ. غالن ءيس‑راد‑امژن ءيقاريدن ءي‑يخف‑نسن غ‑وغاراس ن‑ربّي.

⁶ ءيلّا‑نّيت لخير ءي‑يان ءيمونّ د‑وغاراس ن‑ربّي ءيقنعو س‑ماد‑دارس‑يلّان.

⁷ لّيغ‑د‑نكشم دّونيت‑اد ءور‑د‑نيوي يات. ءيغ‑را‑ستّ‑نفّوغ ءور‑را‑ناوي يات.

⁸ والاينّي ءيغ‑دارنّغ ما‑نشتّا د‑ما‑نلسّا نقنعو س‑مايان.

⁹ ءيمّا غويلّي رانين اد‑سّمونون ايدا ءيگّوتن، هاتي ار‑شّكشامن ءيخف‑نسن س‑تژقّورت ءولا تاسّاست. ار‑تن‑يتنرو كولّو ما‑يگان طّماع، ار‑تن‑يسّنوفول ار‑تن‑يسّياگّاس ار‑تن‑يتاوي س‑لهالاك.

¹⁰ اشكو تايري ن‑يقاريدن ار‑دي‑تّاوي كولّو ما‑يُخشنّ. لّان كرا ن‑مدّن ار‑باهرا‑تّيرين ءيقاريدن ايلّيغ فّوغن اغاراس لّماسيح، سّياگّاسن ءولاون‑نسن س‑تگوضي ءيگّوتن.

لوصيت ءي‑وخدّام ن‑ربّي

¹¹ ءيمّا كيّي اي‑اخدّام ن‑ربّي، اگّوگ زغ‑كولّو غايان. تگت‑ن تيقّي‑نّك ا‑بدّا‑تسكارت افولكي ءولا كولّو ما‑يرضان ربّي. امن اوال‑نس ار‑تّحنّوت غ‑وييّاض ار‑تّصبارت ار‑تّرخوت د‑كولّو مدّن.

¹² بكيس ار‑تكّاتّ تاكرّايت لّيمان، تامژت غ‑تودرت ءيدومن لّي‑س‑اك‑يغرا ربّي لّيغ تنّيت ءي‑يناگان گّوتنين ف‑مامنك ا‑تومنت س‑لماسيح.

¹³ ءيمّا غيلاد ءوصّاغ‑ك غ‑لگدّام ن‑ربّي لّي‑ياكّان تودرت ءي‑كرايگاتّ كرا، ءولا لماسيح ياسوع لّي‑يفكان توگّا لّحقّ غ‑دار بيلاطوس گو‑بونطوس،

¹⁴ ءينيغ‑اك ا‑بدّا‑تسكارت س‑تنباضين‑اد باش ا‑ور‑گيك‑ييلي كرا لّعيب ءولا كرا ف‑ا‑يرگّم يان، ار اسّ لّي‑غ‑را‑د‑ياشك سيديتنّغ ياسوع لماسيح ءيبايّن.

¹⁵ را‑د‑ياشك غ‑وزمز لّي‑يرا ربّي امباركي لّي‑يحكامن كولّو ما‑يلّان، ءيگ اگلّيد ن‑يگلدان ءيگ انمغور ن‑ينمغورن.

¹⁶ نتّان واحدوت ا‑بدّا‑يدّرن، ءيزدغ غ‑تيفاوت لّي‑س‑ور‑يژضار يان ا‑ن‑سرس‑ياكمور. ءور‑جّو‑ت‑يژري يان ءولا ءيژضار يان ا‑ت‑يژر. نتّان ا‑مي‑يلّا لمجد د‑لقوّا، غيلاد ءولا كولّو مايد‑د‑يفتان، امين.

¹⁷ ءيني ءي‑ويلّي دار ءيگّوت‑وايدا ن‑دّونيت‑اد، ا‑ور‑سّيمغورن ءيخف‑نسن ءولا‑دا‑تاوين رّجا س‑مايلّي ءور‑سّينّ ءيس‑راد‑دارسن‑يقاما. تينيت‑اسن اد‑گن رّجا غ‑ربّي لّي‑يرضان اد‑اغ‑ياكّا كولّو ما‑يگان لخير ا‑سرس‑نتفراح.

¹⁸ ءيني‑اسن اد‑سكارن افولكي، ءيگاتن دارسن ءيسكّيرن شوانين، ار‑تعاوانّ ار‑اكّان ءي‑وييّاض.

¹⁹ غمكان ا‑س‑راد‑سّمونّ ءي‑يخف‑نسن لخير لّيخرت، باش ا‑يگ لّساس ءيزگان ما‑ف‑ا‑بنّون تودرت لّي‑يگان تودرت ءيصحان.

²⁰ وا‑تيموتاوس، گابل لامانت لّي‑اك‑يفكا ربّي. انف ءي‑تجمّاعت ءيخوان د‑يمجاحادن ن‑ويلّي ءور‑سّينّين ربّي. ار‑تّينين ءيس‑دارسن لفهمت والاينّي ءور‑فهيمن يات.

²¹ اشكو لفهمت‑ان ا‑يجلان كرا گيسن زغ‑وغاراس لّماسيح. اد‑اون‑تيلي لباراكا ن‑ربّي.