1 timutaws 5 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ ا‑ور‑تشّحشّمت كرا ن‑وفقّير ءيغ‑يسكر كرا يُخشنّ، والاينّي سّفهم‑اس ما‑ت‑يخصّان زوند ءيغ‑يگا باباك.

² سكار د‑يعيّالن زوند ايتماك، ار‑تسكارت د‑تفقّيرين زوند ءينّاك، ار‑تسكارت د‑تفرخين زوند ءيستماك س‑وول ءيغوسن.

تيهجّالين

³ بيدّ د‑تهجّالين لّي‑ور دار يان.

⁴ والاينّي تاهجّالت نّا‑دار تاروا‑نس نغد تاروا ن‑تاروا‑نس، ءيقّان‑تن‑د اد‑يسّانّ ءيس‑گيسن‑يرا ربّي اد‑تهالّان غ‑تيلّي گانين تينسن. ءيلّا فلّاسن اد‑تراران لخير ءي‑ايت‑دارسن، اشكو ربّي ءيرضا س‑ماياد.

⁵ ءيمّا تاهجّالت نّا‑يقامان واحدوتّ بلا يان، تگا رّجا‑نس غ‑ربّي ار‑اس‑تّژالّا ار‑زگيس‑تّضالاب غ‑ييض ءولا ازال.

⁶ ءيمّا تاهجّالت نّا‑يسالان ما‑يرا ءيخف‑نس، هان تمّوت غ‑رّوح واخّا تسول غ‑دّات.

⁷ ءوصّا‑تن كولّو ف‑ماياد باش ا‑ور‑ييلي كرا غ‑يلّا لعيب.

⁸ اشكو وانّا ءور‑يتعاوانّ تاگُمات‑نس، هان ءيفّوغ اغاراس لّماسيح، يُخشن ءوگُّار ن‑ويلّي ءور‑اكُّ‑سّينّين اغاراس، د‑باهرا ءيغ‑ور‑ا‑يتعاوان ايت‑دارس.

⁹ شّكشم غ‑وارّا ن‑تهجّالين تانّا ءيرگلن سضيص ءيد‑مراو ن‑وسگُّاس، ءيغ‑تّين دارس ءيكّا غير يان‑ورگاز،

¹⁰ ار‑تّي‑تالغن مدّن ف‑لخير لّي‑تسكار، تربّو تاروا‑نس ف‑ما‑يفولكين، ار‑تسّمرحبا س‑ويلّي تمودّونين ار‑تّقاسا ءيمژلاين ن‑ربّي، ار‑تّعاوان وينّا لّانين غ‑تنوكموت، ار‑ن‑بدّا‑تّگّا تيقّي‑نس ا‑تسكار افولكي د‑كولّو مدّن.

¹¹ والاينّي ا‑ور‑تشّكشمت تيمژّيّين غ‑وارّا ن‑تهجّالين، اشكو را‑تّيرينت اد‑تاهلنت تيس سنات‑توال. را‑تّيدونت ارد تّونت لماسيح

¹² فّوغنت زغ‑واوال لّي‑س‑اس‑نّانت اويند‑د ف‑يخف‑نسنت لحوكم ن‑ربّي.

¹³ وان نتنتي ار‑تميارنت ءينيفسيسن ار‑تلولّينت زغ‑تگمّي س‑تايّاض. ءورد غايان كاد‑سكارنت والاينّي ار‑ساوالنت ف‑مدّن ار‑كشّمنت ما‑ور‑يگين وينسنت، ار‑تّينينت ما‑ور‑تند‑د‑يقّانّ ا‑تي‑تّينينت.

¹⁴ مايان ا‑ف‑ريغ تيهجّالين لّي‑مژّينين اد‑تاهلنت، ارونت تاروا اوينت‑ستّ غ‑تگمّي‑نسنت، باش ا‑ور‑ييلي دار ءينوّاشن‑نّغ ما‑س‑ا‑ياغ‑رگّمن.

¹⁵ اشكو كرا گيسنت ءيجلا، امژنت اغاراس ن‑شيطان.

¹⁶ والاينّي تامغارت تامومنت نّا‑دار تيهجّالين ءيست‑دارس، ءيلّا فلّاس ا‑تنتي‑تّعاوان باش ا‑ور‑يژّاينت ف‑ومناگّار ن‑يمومنّ. غمكاد ا‑س‑را‑ييژضار‑ومناگّار ا‑يتعاوان تيهجّالين نّا‑ور‑دار يان.

ءيمغارن ن‑ومناگّار

¹⁷ ءيمّا ءيمغارن لّي‑تنباضنين غ‑ومناگّار س‑نّييت د‑وفولكي، ءيقّان‑د ايتماتن ا‑تن‑توقّارن باهرا، س‑كيگان غويلّي تخدامنين ف‑تبرّاحت د‑ولمّود.

¹⁸ اشكو ءيتيارا غ‑وارّا ن‑ربّي: «ا‑ور‑تگت اغامو ءي‑وزگر لّي‑يسرواتن.» ءيتيارا‑داغ: «اخدّام ءيستهلّا تيغراد‑نس.»

¹⁹ ا‑ور‑تسفلدت س‑يان ءيتاشتكّان س‑ومغار ءيغ‑ور‑د‑ييوي سين نغد كراض ءيناگان.

²⁰ ءيمّا يان ءيسكارن دّنوب، ءيني‑اس ف‑ما‑يسكر غ‑لگدّام‑نسن كولّوتن باش اد‑يكساضن وييّاض.

²¹ ها‑يّي غ‑لگدّام ن‑ربّي د‑لماسيح ياسوع د‑لمالايكا ن‑يگنّا ا‑ك‑وصّاغ ا‑تزّگات تيغاوسيوين‑اد بلا‑دا‑تسكارت س‑وودماون ءولا‑دا‑تّيريت ا‑تّرضوت ءيخف‑نّك.

²² ا‑ور‑تزربت ا‑تسرست ءيفاسّن‑نّك ف‑يان ا‑تي‑تژليت ءي‑تووري ن‑ربّي، ا‑ور‑يميل‑تكشمت غ‑دّنوب ن‑وييّاض. گابل ءول‑نّك ا‑بدّا‑يغوس.

²³ ا‑ور‑سول‑تسّات غير امان، والاينّي زايد‑اسن ءيميكّ ن‑وين‑واضيل ءيكتين باش ا‑يجّي‑وديس‑نّك، اشكو منّاوت‑توال ايد تّاضنت.

²⁴ كرا ن‑مدّن، ار‑گيسن‑تبانّ دّنوب‑نسن، ار‑مالان ءيس‑را‑فلّاسن‑يتّوت لحوكم. ءيمّا وييّاض راد‑بانّ دّنوب‑نسن تيگيرا.

²⁵ غمكان ا‑دي‑تبانّ ءولا ءيفولكيتن لّي‑سكارن مدّن. ءولا افولكي لّي‑يرگسن را‑د‑يبان تيگيرا.