1 timutaws 4 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

ءيمسلمدن ن‑تكركاس

¹ ءيساول رّوح لقودوس غيلاد س‑واوال ءيزگان ييني: غ‑ووسّان گُّرانين راد‑فلن كرا ن‑مدّن اغاراس لّماسيح، ار‑سفليدن س‑تكركاس لّارواح أُخشنّين ءولا س‑ولمّود لّجنون

² دار ءيمسلمدن سّكيركيسنين ايت‑سين‑وودماون لّي‑مي‑قّورن‑وولاون‑نسن باهرا.

³ ءيمسلمدن‑ان ار‑سّحرامن ليتّيهال ءولا كرا ءيخلق ربّي ءي‑ومشّو، ءيفك‑ت ءي‑ويلّي سرس ومنّين ءيسّانّ لحقّ، باش ا‑ت‑شتّان ار‑ت‑فلّاس‑تشكارن.

⁴ اشكو ءيفولكي كولّو ما‑يخلق ربّي. ءيخصّا‑ياغ ا‑ور‑نسّحرام يات، والاينّي ا‑ت‑نشكر ف‑كولّو ما‑نشتّا.

⁵ اشكو ار‑ت‑يسّحلّا ربّي س‑واوال‑نس ءولا س‑تژالّيت لّي‑س‑ا‑ت‑فلّاس‑نتشكار.

اخدّام ءيشوان لّماسيح

⁶ ءيغ‑ا‑تمالات تيغاوسيوين‑اد ءي‑ايتماتن را‑تگت اخدّام ءيشوان لّماسيح ياسوع، تدوست س‑تنباضين لّيمان ءولا س‑ولمّود ءيفولكين لّي‑تومژت.

⁷ والاينّي انف ءي‑تحاجيّين خوانين ءولا لخرايف ن‑دّونيت‑اد، ار‑تسّدوست ءيخف‑نّك ا‑تّازّالت غ‑وغاراس ن‑ربّي.

⁸ اشكو يان ءيسّدوسن دّات‑نس، افولكي اين ءيسكر، والاينّي يان ءيسّدوسن رّوح‑نس س‑ما‑يرضان ربّي، راد‑اس‑يفولكي س‑وگُّار ءي‑تودرت‑نس ن‑دّونيت‑اد ءولا تين ليخرت.

⁹ ءيزگا مايد‑اك‑نّيغ، ءيقّان‑د كود يان ا‑ت‑يامن.

¹⁰ ف‑مايان ا‑ف‑ا‑نتخدام ار‑فلّاس‑نكّات تاكرّايت، اشكو نگا رّجا‑نّغ غ‑ربّي لّي‑يدّرن. نتّان ا‑يجّنجامن كولّو مدّن، س‑وگُّار غويلّي ءومنّين.

¹¹ سّلماد‑اسن تيغاوسيوين‑اد ار‑تن‑تّوصّات ا‑سرسنت‑سكارن.

¹² اد‑ور‑تادجت يان ا‑ك‑يحگر ف‑سّيبت ن‑ما‑سول‑تمژّيت، والاينّي سكار‑بدّا ف‑وفولكي س‑يواليون‑نّك د‑يسكّيرن‑نّك، ار‑تّحنّوت غ‑وييّاض ار‑تّامنت اوال ن‑ربّي س‑وول ءيغوسن، باش اد‑ژرن ءيمومنّ مامنك ا‑تسكارت ءيرين اد‑سكارن ءولا نتني غمكان.

¹³ لهو ءيخف‑نّك ار‑تاقرات ارّاتن ن‑ربّي ف‑ايتماتن ار‑تن‑تزّعامت ار‑تن‑تسّلمادت ارد‑ن‑اشكغ.

¹⁴ ا‑ور‑تتّوت تاوافكا ن‑رّوح لّي‑گيك‑يلّان، ءيفكا‑ياك‑ت ربّي س‑واوال لّي‑د‑يملا غاكود لّيغ‑ن‑مونّ ءيمغارن، سرسن فلّاك ءيفاسّن‑نسن.

¹⁵ فك ءيخف‑نّك ءي‑تووري‑اد ار‑سرس‑تّلهوت، باش اد‑ژرن كولّو مدّن مامنك ا‑گيس‑تّزايادت.

¹⁶ اوي‑تّ‑بدّا غ‑يخف‑نّك د‑ولمّود‑نّك، تزگات غ‑كولّو تيغاوسيوين‑اد، اشكو غمكاد ا‑س‑را‑تجّنجمت ءيخف‑نّك تجّنجمت ءولا ءيمسفليدن‑نّك.