1 timutaws 3 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

ءينگابالن ن‑ومناگّار

¹ ءيزگا‑واوال‑اد: وانّا ءيران ا‑يگ انگابال ن‑ومناگّار، هاتي تاووري ءيهيّان ايد ءيرا.

² ءيقّان‑د انگابال ا‑يگ واد غ‑ور‑يلّي لعيب، ءيطّاف غير يات‑تمغارت، ءيزگا‑بدّا غ‑لعاقل‑نس ار‑يتنباض غ‑كولّو ما‑يسكار، ار‑يتفولكي د‑مدّن ار‑يسّمرحبا س‑ويلّي تمودّونين، ييسّان مامنك ا‑يسّلماد وييّاض.

³ ا‑ور‑يگ واد باهرا ءيسّانّ تيسّي ءيكتين، نغد واد ءيتمّاغن د‑مدّن. ءيقّان‑د ا‑يگ واد ءيتصبارن، ءورد واد ءيتژين نغد واد دار عزّان ءيقاريدن.

⁴ ءيقّان‑ت‑يد ا‑يگ واد ءيتنباضن غ‑ايت‑تگمّي‑نس س‑سّلامت، ار‑سرس‑سفليدن تاروا‑نس ار‑تي‑توقّارن س‑نّييت‑نسن.

⁵ اشكو ءيغ‑ور‑يسّين مامنك ا‑يتنباض غ‑ايت‑تگمّي‑نس، مامنك ا‑را‑ييسّان ا‑يگابل امناگّار ن‑ربّي؟

⁶ ا‑ور‑يگ واد بحرا يومژن اغاراس لّماسيح، اد‑اس‑ور‑يمل ءيخف‑نس ءيس‑يگا كرا، ءيضر غ‑لهالاك ن‑يبليس.

⁷ ءيقّان‑د ا‑يگ واد‑ف‑اكّان ايت‑برّا توگّا شوانين، باش ا‑ور‑يضر تيگيرا غ‑ترگّام ن‑مدّن، تامژت‑ت‑يلمّا‑تژقّورت ن‑يبليس.

ءيمعاوانّ ن‑ومناگّار

⁸ ءولا ءيمعاوانّ ن‑ومناگّار، ءيقّان‑تن‑د اد‑گن ويد زگانين غ‑وفولكي. ا‑ور‑گن ويد سّكيركيسنين نغد ويد تّبلانين س‑تيسّي ءيكتين نغد ويد تّيرينين اد‑سّمونّ ما‑يگّوتن ءي‑يخف‑نسن.

⁹ ءيقّان‑تن‑د اد‑غوين س‑وول ءيغوسن غ‑ولمّود لّي‑اغ‑د‑يملا ربّي.

¹⁰ ءولا نتني ءيخصّا‑تن اد‑زوار‑تيارامن. ءيغ‑ور‑گيسن‑يتيافا كرا لّعيب، راد‑يژضارن اد‑قاسان تاووري‑اد ن‑يمعاوانّ.

¹¹ ءولا تيمغارين، ءيقّان‑تند‑د اد‑گنت تيد زگانين غ‑وفولكي، ار‑تنباضنت غ‑يخف‑نسنت، ار‑سكارنت س‑لحقّ. ا‑ور‑گنت تيد ساوالنين غ‑مدّن.

¹² ءيقّان‑د امعاون ا‑يطّاف غير يات‑تمغارت، ار‑يتنباض غ‑تاروا‑نس د‑ايت‑تگمّي‑نس س‑سّلامت.

¹³ وينّا سكارنين تاووري‑اد ن‑يمعاوانّ س‑نّييت‑نسن، راد‑عزّان دار مدّن، زعمن باهرا غ‑وغاراس لّماسيح ياسوع.

¹⁴ ار‑ترجوغ ا‑ن‑دارك‑اشكغ غ‑مايد‑د‑ياكمورن، والاينّي ءوريغ‑اك‑ن تيغاوسيوين‑اد باش ا‑تنتي‑تيسّانت ءيغ‑د‑ماطلغ،

¹⁵ تژرت ما‑د‑يقّانّ ا‑تي‑تسكار تاگُمات ن‑ربّي، ا‑ستّ‑يگان د‑ومناگّار ن‑ويلّي گانين وين ربّي لّي‑يدّرن، تگ لّساس ءولا تانّالت لّحقّ.

ليمان لّي‑اغ‑د‑يملا ربّي

¹⁶ مايلّي‑اغ‑د‑يملا ربّي، ار‑كولّو‑گيس‑نتعجّاب: ءيبان‑د غ‑سّيفت ن‑بنادم، ءينرو س‑تحكيمت ن‑رّوح، ژرن‑ت لمالايكا. ءيلكم لخبار‑نس تيميزار اگّوگنين، امنّ سرس غ‑كولّو دّونيت، ءيتيالال س‑لمجد.