1 timutaws 2 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تيژولّا ف‑كولّو مدّن

¹ ف‑مايان ا‑ف‑راد‑ضالبغ زغ‑ايتماتن اد‑تژالّان ف‑كولّو مدّن، ار‑تضالابن ربّي ا‑تن‑يرحم ءيبارك‑تن، ار‑تي‑تشكارن ف‑ما‑يسكار ءي‑كرايگاتّ يان.

² ءيلّا فلّاسن اد‑تژالّان ف‑يگلدان ءولا كولّو ويلّي تحكامنين، باش ا‑ندّر س‑لهنا د‑سّلامت نسكر افولكي ءولا كولّو ما‑يرا ربّي.

³ ءيشوا ماياد، ءيرضو سرس ربّي انجّام‑نّغ

⁴ لّي‑يران كولّو مدّن اد‑نجمن وورّين ءيسّانّ لحقّ.

⁵ اشكو ءيلّا يان ربّي، ييلي يان لّي‑يبيدّن غ‑گر ربّي د‑بنادم، ا‑ت‑يگان د‑لماسيح ياسوع لّي‑يگان بنادم.

⁶ ءيفكا ءيخف‑نس ا‑يفرو كولّو مدّن غ‑وزمز لّي‑يقصاد ربّي ا‑گيس‑يسّبايّن توگُّا-نس.

⁷ د‑غمكاد ا‑س‑يّي‑يگا د‑وبرّاح د‑ورقّاس غ‑گر ايت‑تميزار اگّوگنين، باش اد‑اسن‑سّلمادغ اغاراس لّيمان ءولا لحقّ. لحقّ اياد نّيغ، ءور‑اكُّ‑سّكاركسغ.

⁸ ريغ ءيرگازن غ‑كرايگاتّ امناگّار اد‑تژالّان ار‑تضالابن ربّي، ار‑ن‑تگّان ءيفاسّن‑نسن لّي‑س‑ا‑سكارن افولكي بلا‑دا‑تقلاقالن ءولا‑دا‑تژين.

⁹ ريغ اد‑حشمنت‑تمغارين لسنت مالسّا ءينگادّان لّي‑تنت‑يد‑يقّانّ، ءورد س‑تالّامين ن‑وازّار نغد ءورغ نغد لجوهر نغد تيملسا غُلانين،

¹⁰ والاينّي س‑يفولكيتن لّي‑سكارنت غمكلّي‑د‑يقّان تيمغارين لّي‑توقّارنين ربّي.

¹¹ ءيلّا ف‑تمغارين اد‑لمدنت ار‑تحشامنت بلا‑دا‑ساوالنت.

¹² ءور‑ودجيغ كرا ن‑تمغارت ا‑تسّلماد ءولا‑دا‑تّحكام غ‑يرگازن. ءيقّان‑تند‑د اد‑فسّانت.

¹³ اشكو ربّي ءيسكر ادام غ‑يسيزوار، ءيسكر ءيلمّا حوّا.

¹⁴ ءورد ادام ا‑ف‑تّ‑يزّري ءيبليس غ‑يسيزوار والاينّي تامغارت ا‑ف‑تّ‑يزّري، تفّوغ زغ‑واوال ن‑ربّي.

¹⁵ والاينّي را‑تنجم‑تمغارت س‑تلاليت ن‑تاروا ءيغ‑ا‑تّقاما غ‑ليمان ار‑تّحنّو غ‑وييّاض ار‑تّزگا غ‑يخف‑نس س‑وول ءيغوسن.