1 timutaws 1 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ زغ‑بولُس ارقّاس لّماسيح ياسوع، غمكلّي يومر ربّي انجّام‑نّغ د‑لماسيح ياسوع لّي‑غ‑ن‑نرجا.

² ءي‑تيموتاوس ءيوي ءيعزّان غ‑تاگُمات لّماسيح. اد‑اك‑تيلي لباراكا د‑رّحمت د‑سّلامت زغ‑ربّي باباتنّغ د‑لماسيح ياسوع سيديتنّغ.

ءيمسلمدن لّي‑فّوغنين زغ‑ولمّود يُغژانّ

³ ضالبغ زغ‑گيك غيلاد ا‑ن‑تقامات غ‑تمدينت ن‑افسوس غمكلّي‑اك‑نّيغ غاكود لّيغ‑ن‑زريغ س‑تمازيرت ن‑ماكيدونيّا. اشكو لّان غين كرا ن‑مدّن ار‑سّلمادن ما‑ور‑يگين لحقّ. ريغ ا‑تن‑تامرت اد‑فسّان،

⁴ تينيت‑اسن ا‑ور‑تلهون ءيخف‑نسن س‑تحاجيّين خوانين ءولا س‑يسماون گّوتنين ن‑كولّو تاسوتين لّي‑زرينين. هان تيغاوسيوين‑ان، ار‑ترارانت مدّن اد‑تمجاحادن ءي‑نگراتسن. ءور‑ا‑تن‑تعاوانّت اد‑امنّ ار‑سكارن ما‑گيسن‑يتّيري ربّي.

⁵ غمكان ا‑س‑ك‑وصّاغ اشكو ريغ ا‑نزايد ار‑نتعمّار س‑لحنانت ن‑ويلّي دار ءول ءيغوسن ءيسّانّ ءيس‑ور‑گيسن لعيب امنّ س‑لماسيح س‑نّييت ءيكمّلن.

⁶ والاينّي كرا ن‑مدّن فّوغن اغاراس‑اد، ار‑جلّون ءيخفاون‑نسن س‑يمجاحادن خوانين.

⁷ ار‑تّيرين اد‑گن ءيمسلمدن ن‑شّرع، والاينّي ءور‑فهيمن ما‑تّينين ءولا سّنّ تيغاوسيوين لّي‑س‑ا‑سّلمادن س‑زّعامت.

⁸ نسّن نكُّني ءيس‑يفولكي شّرع غ‑دار وانّا سرس ءيسكارن ما‑يرا ربّي.

⁹ والاينّي ءيقّان‑د ا‑نيسّان ءيزد ف‑سّيبت ن‑ويلّي أُخشنّين ا‑ف‑د‑يفكا ربّي شّرع، ءورد ف‑سّيبت ن‑ويلّي فولكينين. ءيفك‑ت‑يد ف‑ويلّي ءور‑رينين شّرع فّوغن زغ‑گيس. ءيفك‑ت‑يد ف‑ويلّي رورنين تيغوردين‑نسن س‑ربّي ار‑تسالان دّنوب، ءور‑ا‑توقّارن ربّي ءولا‑دا‑تّيرين اغاراس‑نس. ءيفك‑ت‑يد ف‑ويلّي نقّانين باباتسن نغد ءينّاتسن ءولا غويلّي نقّانين وييّاض.

¹⁰ ءيفك‑ت‑يد ف‑ويلّي تفسادنين ءولا غويلّي تشتهونين يوتمان زوند نتني. ءيفك‑ت‑يد ف‑ويلّي تاكُرنين ءيحشماي ءولا غويلّي سّكيركيسنين ءولا غويلّي اكّانين توگّا ن‑تكركاس. ءيفك‑ت‑يد ف‑كولّو ويلّي سكارنين اينّا ءيفّوغن زغ‑ولمّود يُغژانّ.

¹¹ المّود‑اد ءيگا لخبار ءيفولكين لّمجد ءيگّوتن لّي‑يّي‑د‑يملا ربّي امباركي اد‑سرس‑تبرّاحغ.

ما‑يسكر لماسيح ءي‑بولُس

¹² ار‑تشكارغ لماسيح ياسوع سيديتنّغ اشكو ءيگا‑يّي د‑واد ءيزگان غ‑وفولكي. ءيژلي‑يّي ءيسّدوس‑يّي باش اد‑قاساغ تاووري‑نس.

¹³ كّيغ‑تّين ار‑رگّمغ لماسيح ار‑ت‑سّرفوفونغ ار‑ديدس‑تمّاغّ، والاينّي ءيرحم‑يّي‑د اشكو ءور‑سّينغ ماد‑سكارغ غ‑ووسّان‑ان، ءور‑تا‑سرس‑ومينغ.

¹⁴ غاكودان ءيبارك گيگي سيديتنّغ س‑لحنانت‑نس ءيگّوتن، ءيعمّر‑يّي س‑ليمان د‑تايري ن‑ويلّي گانين وين لماسيح ياسوع.

¹⁵ اوال ءيزگان اياد، ءيقّان‑د كود يان ا‑ت‑يامن: يوشكا‑د لماسيح ياسوع س‑دّونيت باش ا‑يجّنجم مدّن أُخشنّين، د‑نكّي ا‑كولّو‑گيسن‑يُخشنّ.

¹⁶ والاينّي ف‑مايان ا‑ف‑يّي‑د‑يرحم نكّي لّي‑گيسن‑يُخشنّ، باش ا‑يمل ءيس‑يژضار لماسيح ياسوع ا‑يصبر د‑وانّا كا‑يلّان، باش ا‑سرس‑امنّ وييّاض كشمن ءولا نتني س‑تودرت ءيدومن.

¹⁷ ءيمّا غيلاد راد‑باهرا‑نتالغ اگلّيد لّي‑يدومن. ءور‑را‑يمّت ءولا ءيژرا‑ت يان. نتّان واحدوت ا‑يگان ربّي، ييلي‑اس لمجد د‑لوقر، غيلاد ءولا كولّو مايد‑د‑يفتان، امين.

¹⁸ وا‑يوي تيموتاوس، فكيغ‑اك لوصيت‑اد غمكلّي فلّاك نّان ايتماتن غايد ءيزرين س‑يواليون لّي‑اسن‑يملا ربّي. امژ غ‑يواليون‑نسن باش ا‑تبكيست ار‑تكّاتّ تاكرّايت ف‑وفولكي.

¹⁹ زّگا ءيخف‑نّك غ‑وغاراس لّماسيح، د‑ا‑ور‑تادجت كرا يُخشنّ ا‑يكشم س‑وول‑نّك. هان كرا ن‑مدّن ءور‑ا‑ستّي‑تاوين غ‑ماد‑اسن‑يمالا‑وول‑نسن. د‑غايان ا‑ف‑ا‑ترژّا تاناوت لّيمان‑نسن،

²⁰ زگيسن هيمينايوس د‑يسكاندر. دحيغ‑تن‑ين نتني ءي‑شيطان باش اد‑لمدن ا‑ور‑رگّمن ربّي.