1 tasaluniki 5 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

غمكلّي‑س‑را‑د‑يوورّي لماسيح

¹ واي‑ايتماتنّغ، ءور‑اغ‑يخصّا اد‑اون‑ين‑نارا كرا ف‑ووسّان ءولا ءيزماز لّي‑غ‑راد‑جرونت‑تغاوسيوين‑اد،

² اشكو تسّنم ءيزد زوند امخّار ن‑ييض ا‑س‑را‑د‑يلكم‑واسّ ن‑سيديتنّغ.

³ را‑تّينين مدّن «لاباس تهنّا لوقت،» ءيميل ءيگّوز‑د فلّاسن لهالاك. حاينا را‑تن‑يغوي غمكلّي ءيقُّاي‑ونگاژ تامغارت لّي‑را‑يارو، ءور‑اكُّ‑راد‑نجمن.

⁴ ءيمّا كونّي اي‑ايتماتنّغ، ءور‑تلّيم غ‑تيلّاس. ءور‑را‑كُن‑يامژ‑واسّ‑ان زوند امخّار.

⁵ اشكو كونّي كولّوكن تگام ايت‑تيفاوت، تگم ايت‑وزال. هاتي ءورد وين‑ييض ا‑نگا نغد وين تيلّاس.

⁶ ماياد ا‑ف‑اغ‑د‑يقّان ا‑ور‑نطّاس زوند مدّن ياضني. ءيلّا فلّانّغ ا‑بدّا‑نرار لعاقل ار‑نتنباض غ‑يخف‑نّغ.

⁷ هاتي غ‑ييض ا‑غ‑ا‑طّاسن مدّن ار‑سّنوفولن ءيخف‑نسن س‑تيسّي.

⁸ ءيمّا نكُّني نگا وين‑وزال، ييلي فلّانّغ ا‑نتنباض غ‑يخف‑نّغ، نگ ءي‑يدمارن‑نّغ ابانّك ن‑‹تّيقا غ‑ربّي› ءولا ‹لحنانت›، نگ ءي‑يخف‑نّغ اسدّول ن‑‹رّجا ن‑وجنجم›.

⁹ اشكو ءور‑يقصاد ربّي ا‑فلّانّغ‑يوت لعقوبيت، والاينّي ءيقصاد اد‑اغ‑يجّنجم ف‑وودم ن‑سيديتنّغ ياسوع لماسيح.

¹⁰ ءيمّوت نتّان ف‑سّيبت‑نّغ باش ا‑ديدس‑ندّر، ءيغ‑نمّوت نغد ءيغ‑نّيت‑نسول ارد‑د‑ياشك.

¹¹ زايدات ار‑تزّعامّ ار‑تّمعاوانم ءي‑نگراتون غمكلّي تميارم ا‑تسكارم.

تامونت لّفرح ءولا سّلامت

¹² ءيمّا غيلاد اي‑ايتماتنّغ، را‑كُن‑نضالب ا‑تّوقّارم غويلّي سكارنين تاووري ن‑ربّي غ‑گراتون، ار‑كُن‑تگابالن س‑يسم ن‑سيديتنّغ ار‑كُن‑تنصاحن.

¹³ ملات‑اسن منشك ا‑س‑دارون‑عزّان ف‑سّيبت ن‑تووري‑نسن. گات س‑سّلامت ءي‑نگراتون.

¹⁴ را‑كُن‑نضالب اي‑ايتماتنّغ، ا‑تّنصاحم وانّا ءور‑يتّيرين ا‑يخدم، ار‑تزّعامّ وانّا ءيتيكساضن، ار‑تّعاوانم وانّا ءيضعفن، ار‑تّصبارم د‑كرايگاتّ يان.

¹⁵ رارات لعاقل ءيغ‑يلّا ماد‑اون‑يسكرن كرا يُخشنّ، اد‑اس‑ت‑ور‑ترارم س‑لخُشانت. گات‑ن تيقّي‑نّون ا‑بدّا‑تّيريم ا‑تسكارم افولكي غ‑گراتون ءولا د‑كولّو مدّن.

¹⁶ فرحات‑بدّا،

¹⁷ ار‑تّژالّام غ‑كرايگاتّ لوقت،

¹⁸ ار‑تّشكارم ربّي غمكنّا ءيگا لحال، اشكو غمكاد ا‑گيگون‑يرا غ‑تامونت لّماسيح ياسوع.

¹⁹ ا‑ور‑تسّخسيم رّوح لقودوس،

²⁰ ءولا‑دا‑تّحگارم ءيواليون ن‑يان ءيتّينين س‑ماد‑اس‑يمالا ربّي.

²¹ سّماقّلات كرايگاتّ كرا، تامژم غ‑ما‑يفولكين،

²² تانفم ءي‑كولّو ما‑يُخشنّ.

²³ ءيمّا غيلاد ضالبغ زغ‑ربّي لّي‑بدّا‑ياكّان سّلامت ا‑كُن‑يسّغوس زغ‑كولّو ما‑گيگون‑يُخشنّ، ءيجّنجم ءول‑نّون ءولا رّوح‑نّون ءولا دّات‑نّون زغ‑كولّو كرا ءيگان لعيب ارد‑د‑ياشك سيديتنّغ ياسوع لماسيح.

²⁴ غمكان ا‑را‑يسكر ربّي لّي‑اون‑د‑يغران، اشكو ءيقاما‑بدّا غ‑واوال‑نس.

²⁵ واي‑ايتماتنّغ، ژّالّات تضالبم ربّي ف‑سّيبت‑نّغ ءولا نكُّني.

²⁶ نسالّامات د‑ايتماتن كولّوتن س‑ونسالّام ن‑تاگُمات.

²⁷ را‑كُن‑وصّاغ س‑يسم ن‑سيديتنّغ ا‑تغرم تابرات‑اد ف‑ايتماتن كولّوتن.

²⁸ اد‑اون‑تيلي لباراكا ن‑سيديتنّغ ياسوع لماسيح.