1 tasaluniki 4 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تينباضين ن‑وغاراس ن‑ربّي

¹ ءيمّا غيلاد اي‑ايتماتنّغ را‑كُن‑نضالب، ننصح‑كُن س‑يسم ن‑سيديتنّغ ياسوع، ا‑تّيدوم غ‑وغاراس لّي‑زگينّغ‑تلمدم، ار‑بدّا‑تّناوالم ما‑يرضان ربّي. زايدات ف‑مايد تسكارم، ار‑تي‑تسكارم س‑وگُّار.

² تسّنم مايلّي‑ف‑كُن‑نوصّا س‑يسم ن‑سيديتنّغ ياسوع غايد ءيزرين،

³ اشكو ءيرا ربّي ا‑يسّغوس ءولاون‑نّون، ييري گيگون ا‑تانفم ءي‑لفساد.

⁴ ءيلّا ف‑كود يان ا‑ييسّان مامنك ا‑را‑يوقّر تامغارت‑نس ييلي‑تّ س‑وول ءيغوسن.

⁵ ا‑ور‑تگم زوند ايت‑تميزار لّي‑ور‑سّينّين ربّي، ار‑تن‑تنرونت شّهوات‑نسن.

⁶ ءيلّا ف‑كود يان ا‑ور‑يفّوغ زغ‑مايان ءولا ءيتعدّا ف‑گماس. اشكو ننّا‑ياون يادلّي س‑لمعقول، را‑يوت سيديتنّغ لعقوبيت ف‑كولّو وينّا سكارنين وان تيغاوسيوين‑ان.

⁷ اشكو ءيغرا‑ياغ‑د ربّي ا‑نغوس، ءور‑اكُّ‑يري ا‑نركو.

⁸ وانّا ياگُين ا‑يسفلد س‑واوال‑اد، ءورد بنادم ا‑ياگُي والاينّي ياگُي ربّي لّي‑اون‑يفكان ءولا كونّي رّوح‑نس لقودوس.

⁹ والاينّي ءور‑تحتاجّام ماد‑اون‑ين‑يتاران مامنك ا‑تّحوبّوم ايتماتون، اشكو ربّي اد‑اون‑يسّلمدن مامنك ا‑تّحنّوم ءي‑نگراتون.

¹⁰ س‑صّاحت ار‑تّحوبّوم كولّو ايتماتن غ‑تمازيرت ن‑ماكيدونيّا كولّوتّ، والاينّي را‑كُن‑سول‑نضالب اي‑ايتماتنّغ، ا‑تزايدم ار‑تن‑تّحوبّوم س‑وگُّار.

¹¹ ءيريات ا‑بدّا‑طّرّحم ار‑تّلهوم س‑تووري ن‑يخف‑نّون ار‑تّخدامّ س‑يفاسّن‑نّون، غمكلّي‑اون‑ننّا غايد ءيزرين.

¹² غمكاد ا‑ف‑را‑كُن‑توقّارن مدّن لّي‑ور‑گينين وين لماسيح، ءور‑را‑تحتاجّام يان.

تانكرا ن‑ويلّي مّوتنين

¹³ واي‑ايتماتنّغ، نرا ا‑تيسّانم ما‑را‑يجرو ءي‑ويلّي مّوتنين، باش ا‑كُن‑ور‑تاغ‑تگوضي زوند مدّن ياضني لّي‑ور‑دار رّجا.

¹⁴ اشكو نومن ءيس‑يمّوت ياسوع، ءينكر‑د زغ‑لموت. نامن ءيس‑را‑ديدس‑ياوي ربّي كولّو ويلّي مّوتنين ءومنّين س‑ياسوع.

¹⁵ مايلّي‑س‑اغ‑يملا سيديتنّغ ا‑راد‑اون‑نيني: نكُّني لّي‑را‑يقاما نسول ار اسّ لّي‑غ‑را‑د‑ياشك سيديتنّغ، ءور‑را‑نزوور غويلّي مّوتنين.

¹⁶ اشكو س‑لامر ءيتجهّدن، س‑واوال لّمالاك ءيمقّورن، س‑تيجّيجت ن‑نّفّار ن‑ربّي ا‑س‑را‑د‑يگّوز سيديتنّغ زغ‑يگنّا، نكرن‑د مدّن لّماسيح لّي‑مّوتنين، نتني ا‑را‑يزوور.

¹⁷ غاكودان را‑نتيالال ءولا نكُّني لّي‑يسولن، راد‑كولّو‑ديدسن‑نمون غ‑يمدلا، نمناگّار د‑سيديتنّغ غ‑يگنوان. غمكاد ا‑س‑راد‑بدّا‑نيلي د‑سيديتنّغ.

¹⁸ زّعامات ءي‑نگراتون س‑يواليون‑اد.